ຊາວສວນບ້ານນ້ຳຄຽນ ເມືອງຮົ່ມ ແຂວງວຽງຈັນ ໄດ້ເລີ່ມລົງມືປາດຢາງພາລາຂອງຕົນຂາຍເປັນສິນຄ້າແລ້ວ ພາຍຫຼັງຢຸດມາໄດ້ 2-3 ເດືອນຜ່ານມາ ຊຶ່ງປີນີ້ ຊາວສວນບ້ານດັ່ງກ່າວຈະມີຫຼາຍຄອບຄົວປາດຢາງພາລາເພີ່ມຂຶ້ນອີກເກືອບເຄິ່ງໜຶ່ງ ຂະນະທີ່ປີຜ່ານມາ ບາງຄອບຄົວສາມາດປາດຢາງຂາຍສ້າງລາຍຮັບເຂົ້າສູ່ຄອບຄົວໄດ້ເກືອບ 3 ລ້ານກີບຕໍ່ 15 ມື້.
ທ່ານ ດົວຊົງ ນາຍບ້ານນ້ຳຄຽນ ເມືອງຮົ່ມ ແຂວງວຽງຈັນ ໄດ້ໃຫ້ສຳພາດຕໍ່ນັກຂ່າວໜັງສືພິມປະເທດລາວມື້ວານນີ້ (ວັນທີ 22 ເມສາ 2013) ວ່າ: ມາຮອດປັດຈຸບັນ ປະຊາຊົນບ້ານຕົນ 200 ກວ່າຄອບຄົວ ໄດ້ປູກຢາງພາລາກວ່າ 36.500 ຕົ້ນ ໃນເນື້ອທີ່ 700 ກວ່າເຮັກຕາ ເຊິ່ງສົກປີຜ່ານມາ ມີ 22 ຄອບຄົວ ສາມາດປາດຢາງພາລາຂາຍເປັນສິນຄ້າ ໂດຍບັນລຸຜົນຜະລິດ 1,6 ໂຕນຕໍ່ 15 ມື້ ໃນນັ້ນ ສາມາດສ້າງລາຍຮັບເຂົ້າຄອບຄົວປະຊາຊົນບ້ານຕົນເກືອບ 3 ລ້ານກີບຕໍ່ຄອບຄົວ ແນວໃດກໍດີ ສຳລັບສົກປີນີ້ ກໍມີປະຊາຊົນຈຳນວນໜຶ່ງ ໄດ້ລົງມືປາດຢາງພາລາຂອງຕົນມາແຕ່ຕົ້ນເດືອນນີ້ແລ້ວ ແລະ ກໍມີຫຼາຍຄອບຄົວຈະລົງມືປາດຢາງພາລາຂອງຕົນເປັນປີທຳອິດເກືອບເຄິ່ງໜຶ່ງ ຊຶ່ງຄາດວ່າຈະໄດ້ຜົນຜະລິດຫຼາຍກວ່າຜ່ານມາເຄິ່ງໜຶ່ງ.
ນາຍບ້ານກ່າວຕື່ມວ່າ: ສຳລັບລາຄາຊື້-ຂາຍຢາງພາລາຢູ່ໃນບ້ານຕົນແມ່ນ 8.200 ກີບຕໍ່ກິໂລ ແລະ ຈາກການເອົາໃຈໃສ່ສ້າງສາພັດທະນາເສດຖະກິດນັ້ນ ໄດ້ເຮັດໃຫ້ປະຊາຊົນບ້ານຕົນມີຊີວິດການເປັນຢູ່ດີຂຶ້ນຄື ມີຢູ່ມີກິນ ແລະ ມີເງິນໃຊ້ຈ່າຍຕໍ່ສິ່ງທີ່ຈຳເປັນ ຄາດວ່າອີກບໍ່ດົນກໍຈະມີລາຍຮັບເປັນກອບເປັນກຳ ໂດຍສະເພາະພາຍຫຼັງຕົ້ນຢາງພາລາມີອາຍຸຄົບກຳນົດປາດແລ້ວ ແນວໃດກໍດີ ບ້ານຕົນເປັນອີກບ້ານໜຶ່ງທີ່ພັກ-ລັດ ໄດ້ຮັບຮອງເອົາເປັນບ້ານທົດລອງວຽກງານ 3 ສ້າງ ດັ່ງນັ້ນ ຈະເອົາໃຈໃສ່ປຸກລະດົມປະຊາຊົນຈັດຕັ້ງປະຕິບັດວຽກງານດັ່ງກ່າວໃຫ້ປະກົດຜົນເປັນຈິງ ໂດຍສະເພາະການເພີ່ມພູນຜະລິດຜົນໃຫ້ກາຍເປັນສິນຄ້າສົ່ງອອກ ທັງນີ້ເພື່ອສາມາດສ້າງລາຍຮັບເຂົ້າສູ່ຄອບຄົວກ້າວໄປສູ່ການລຶບລ້າງຄວາມທຸກຍາກໄດ້ເທື່ອລະກ້າວ.