ວາລະສານຟອບ ໄດ້ເປີດເຜີຍບົດຄວາມຍົກໃຫ້ນັກສະແດງສາວຄົນຈີນ “ເຈົ້າ ເຫວີ່ຍ” (Zhao Wei) ໃຫ້ເປັນນັກສະແດງສາວທີ່ລວຍທີ່ສຸດໃນໂລກ ຈາກການເຮັດວຽກຢູ່ໃນວົງການຮູບເງົາ ລະຄອນທີວີ ທີ່ສ້າງລາຍໄດ້ຫລາຍລ້ານໂດລາ ຕະຫລອດຈົນງານອື່ນໆ ທີ່ສ້າງລາຍໄດ້ມະຫາສານໃຫ້ກັບນາງບໍ່ວ່າຈະເປັນການຮັບງານໂຄສະນາຜະລິດຕະພັນຕ່າງໆຕະຫລອດໄປຈົນເຖິງການເຮັດວຽກງານເບື້ອງຫລັງລວມເຖິງການລົງທຶນອັນສະຫລາດຂອງນາງ
ທີ່ຜ່ານມານອກຈາກຜົນງານການສະແດງທີ່ສ້າງຊື່ສຽງກັບນາງເປັນຢ່າງຫລວງຫລາຍແລ້ວ ເຈົ້າ ເຫວີ່ຍ ຍັງເປັນເຈົ້າແມ່ໂຄສະນາ ທີ່ເປັນພີເຊັນເຕີໃຫ້ສິນຄ້າກວ່າ 120 ຜະລິດຕະພັນ ນັບຕັ້ງແຕ່ຜະລິດຕະພັນສຸຂະພາບ ຄວາມງາມ ວາຍ ລົດຈັກລວມໄປເຖິງສິນຄ້າແບຣນຕາເວັນຕົກກໍ່ຄື Mercedes Benz, DeBeers, Versace, Zegna, Dior, Jaeger-LeCoultre, Motorola ແລະອື່ນ ໆ
ນອກຈາກນີ້ ເຈົ້າ ເຫວີ່ຍ ຍັງມີການລົງທຶນໃນທຸລະກິດທີ່ຫລາກຫລາຍແຕ່ສິ່ງທີ່ພາໃຫ້ນາງຂຶ້ນມາເປັນດາລາສາວທີ່ມີລາຍໄດ້ຫລາຍທີ່ສຸດໃນໂລກນັ້ນ ຈະໜີບໍ່ພົ້ນການລົງທຶນໃນ Alibaba Pictures Group ຂອງ ແຈັກ ໝ່າ ມະຫາເສດຖີໃຫຍ່ທີ່ເປັນໝູ່ສະນິດຂອງນາງ ໃນໄລຍະເດືອນທັນວາ 2014 ຊຶ່ງເຖິງວ່ານາງຈະລົງທຶນໃນຫຸ້ນພຽງ 9.18% ດ້ວຍມູນຄ່າ 400 ລ້ານໂດລາ(ປະມານ ສອງແສນສາມໝື່ນລ້ານກີບ) ແຕ່ລາຄາຫຸ້ນດັ່ງກ່າວກັບສູງຂຶ້ນຈົນມີມູນຄ່າເຖິງ 880 ລ້ານໂດລາ ໃນ 6 ເດືອນຕໍ່ມາ (ປະມານ ເຈັດແສນສີ່ພັນລ້ານກີບ)
