ໃນໄລຍະ 9 ເດືອນ ແຂວງຫົວພັນໄດ້ມີມູນຄ່າການນຳເຂົ້າ ແລະ ສົ່ງອອກລວມທັງໝົດ 29 ລ້ານກວ່າໂດລາ ຫຼື ປະມານ 237,92 ຕື້ກວ່າກີບ ໃນນີ້ມີມູນຄ່າຂອງການນຳເຂົ້າ 88 ຕື້ກີບ ແລະ ສົ່ງອອກ 149,92 ຕື້ກວ່າກີບ.
ອີງຕາມຂໍ້ມູນຈາກພະແນກອຸດສາຫະກຳ ແລະ ການຄ້າ ແຂວງຫົວພັນໃຫ້ຮູ້ວ່າ: ວຽກງານການນຳເຂົ້າ ແລະສົ່ງອອກສິນຄ້າຂອງແຂວງຫົວພັນໃນ 9 ເດືອນຂອງສົກປີ 2014-2015 ສາມາດປະຕິບັດໄດ້ທັງໝົດ 29,74 ລ້ານໂດລາ ຫຼື ປະມານ 237,92 ຕື້ກວ່າກີບ ທຽບໃສ່ແຜນການປະຕິບັດໄດ້ 104% ແລະທຽບໃສ່ແຜນການປີປະຕິບັດໄດ້ 78% ສຳລັບການສົ່ງອອກມີມູນຄ່າປະມານ 18,74 ລ້ານໂດລາ ຫຼື ປະມານ 149,92 ຕື້ກວ່າກີບ ທຽບໃສ່ແຜນການປະຕິບັດໄດ້ 99% ທຽບໃສ່ແຜນການປີປະຕິບັດໄດ້ 74% ໝວດສິນຄ້າສົ່ງອອກຕົ້ນຕໍແມ່ນ:
ໄມ້ ແລະຜະລິດຕະພັນໄມ້, ແຮ່ທາດ (ແຮ່ເຫຼັກ, ຖ່ານຫີນ ແລະ ແຮ່ມັງກອນ), ຜົນຜະລິດ ແລະເຄື່ອງປ່າຂອງດົງ ສ່ວນວ່າການນຳເຂົ້າ ມີມູນຄ່າປະມານ 11 ລ້ານໂດລາ ຫຼື ປະມານ 88 ຕື້ກີບ ທຽບໃສ່ແຜນການປະຕິບັດໄດ້ 114% ທຽບໃສ່ແຜນການປີໄດ້ 85% ໃນນັ້ນ ໝວດສິນຄ້ານຳເຂົ້າຕົ້ນຕໍແມ່ນ: ນ້ຳມັນເຊື້ອໄຟ, ວັດສະດຸກໍ່ສ້າງ, ເຄື່ອງຮັບໃຊ້ການຜະລິດ, ໝວດສະບຽງອາຫານ, ເຄື່ອງໃຊ້ສອຍປະຈຳວັນ, ເຄື່ອງໄຟຟ້າ ແລະ ອຸປະກອນຕ່າງໆ.
ຂໍ້ມູນແຂວງຍັງໃຫ້ຮູ້ຕື່ມອີກວ່າ: ສຳລັບວຽກງານທະບຽນ ແລະ ຄຸ້ມຄອງວິສາຫະກິດໃນໄລຍະດຽວກັນແມ່ນໄດ້ເອົາໃຈໃສ່ປັບປຸງການຂຶ້ນທະບຽນວິສາຫະກິດໃຫ້ວ່ອງໄວດີຂຶ້ນ ໂດຍນຳໃຊລະບົບໂປແກຣມໃນການຄຸ້ມຄອງທະບຽນນັບແຕ່ຂັ້ນພະແນກລົງຮອດຂັ້ນເມືອງ, ແກ້ໄຂການຄຸ້ມຄອງທຸລະກິດຄົນຕ່າງປະເທດທີ່ມາຄ້າ-ຂາຍບໍ່ຖືກຕ້ອງຕາມລະບຽບກົດໝາຍຢູ່ທົ່ວແຂວງໃຫ້ສຳເລັດ, ລົງຊີ້ນຳ ແລະໃຫ້ບົດຮຽນໃນການຄຸ້ມຄອງຫົວໜ່ວຍທຸລະກິດຢູ່ຫ້ອງການອຸດສາຫະກຳ ແລະການຄ້າເມືອງຊຳເໝືອໄດ້ອອກບົດ ແນະນຳແບ່ງຂັ້ນຄຸ້ມຄອງກ່ຽວກັບວຽກງານ ແລະ ຄຸ້ມຄອງວິສາຫະກິດລະຫວ່າງເມືອງກັບພະແນກ ແລະ 9 ເດືອນ ແຂວງສາມາດອອກທະບຽນວິສາຫະກິດໄດ້ທັງໝົດ 100 ຫົວໜ່ວຍທຶນຈົດທະບຽນ 44,42 ຕື້ກີບ ໃນນັ້ນ ອອກທະບຽນໃໝ່ໄດ້ 83 ຫົວໜ່ວຍ ແລະ ດັດແກ້ທະບຽບເກົາໄດ້ 17 ຫົວໜ່ວຍ.
