ທ່ານ ດຣ. ທອງລຸນ ສີສຸລິດ ຮອງນາຍົກລັດຖະມົນຕີ ລັດຖະມົນຕີວ່າການກະຊວງການຕ່າງປະເທດ ໄດ້ຕ້ອນຮັບການເຂົ້າຢ້ຽມຂ່ຳນັບຂອງທ່ານ Nikolai Snopkov ລັດຖະມົນຕີວ່າການ ກະຊວງເສດຖະກິດ ແຫ່ງ ສາທາລະນະລັດເບລາຣຸສ ພ້ອມດ້ວຍຄະນະ ໃນຕອນບ່າຍວັນທີ 8 ເມສາ 2013 ຢູ່ກະຊວງການຕ່າງປະເທດ ເນື່ອງໃນໂອກາດທີ່ຄະນະຜູ້ແທນດັ່ງກ່າວ ໄດ້ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ແຕ່ວັນທີ 7-9 ເມສາ 2013.
ໂອກາດນີ້ ທັງສອງຝ່າຍກໍໄດ້ສະແດງຄວາມຍິນດີ ທີ່ເຫັນວ່າການພົວພັນ ແລະ ການຮ່ວມມືລະຫວ່າງ ສປປ ລາວ ແລະ ສ.ເບລາຣຸສ ໃນຂອບເຂດສອງຝ່າຍ ກໍຄືຫຼາຍຝ່າຍ ໄດ້ມີບາດກ້າວຂະຫຍາຍຕົວດີຂຶ້ນເປັນລຳດັບ ພ້ອມນີ້ ທັງສອງຝ່າຍຍັງໄດ້ສະແດງເຈດຕະນາລົມອັນໜັກແໜ້ນ ທີ່ຈະເສີມຂະຫຍາຍການຮ່ວມມືກັນໃນອະນາຄົດ ທາງດ້ານການເມືອງ ເສດຖະກິດ-ການຄ້າ ການລົງທຶນ ແລະ ການທ່ອງທ່ຽວ ໂດຍອີງໃສທ່າແຮງຂອງສອງປະເທດ ແລະ ເພື່ອຜົນປະໂຫຍດລວມຂອງສອງຊາດ ລາວ-ເບລາຣຸສ.
ການສົນທະນາໄດ້ດຳເນີນໄປດ້ວຍບັນຍາກາດອັນອົບອຸ່ນ ສະໜິດສະໜົມ ແລະ ໃນຕອນທ້າຍ ທ່ານຮອງນາຍົກລັດຖະມົນຕີ ກໍໄດ້ອວຍພອນໃຫ້ທ່ານ Nikolai Snopkov ພ້ອມດ້ວຍຄະນະ ຈົ່ງເດີນທາງກັບຄືນປະເທດດ້ວຍຄວາມສະຫວັດດີພາບ.
ທ່ານ Nikolai Snopkov ໄດ້ນຳພາຄະນະ ເຊິ່ງປະກອບດ້ວຍຜູ້ແທນຂັ້ນສູງຂະແໜງການຄ້າ ເສດຖະກິດ ກະສິກຳ ຕ່າງປະເທດ ເດີນທາງຢ້ຽມຢາມ ພົບປະ ແລະ ແລກປ່ຽນທັດສະນະແຫ່ງການເພີ່ມທະວີການພົວພັນ ແລະ ການຮ່ວມມືກັບພາກສ່ວນທີ່ກ່ຽວຂ້ອງຂອງລາວ ເຊິ່ງແມ່ນການສືບຕໍ່ຜົນສຳເລັດຂອງການຢ້ຽມຢາມ ຂອງຄະນະຜູ້ແທນຂັ້ນສູງກະຊວງການຕ່າງປະເທດເບລາຣຸສ ທີ່ ສປປ ລາວ ໃນປີ 2012 ຜ່ານມາ.