ເມື່ອທ້າຍອາທິດຜ່ານມານີ້, ເຈົ້າໜ້າທີ່ສະກັດກັ້ນ ແລະ ຕ້ານຢາເສບຕິດແຂວງ ອຸດົມໄຊ ສາມາດມ້າງເຄືອຂ່າຍຄ້າ-ຂາຍຢາເສບຕິດລາຍໃຫຍ່ຢູ່ເສັ້ນທາງເລກ 13 ເໜືອ ເຂດບ້ານກໍນ້ອຍ ເມືອງໄຊ ແຂວງດັ່ງກ່າວ, ຈັບຜູ້ຕ້ອງຫາສອງຄົນ ພ້ອມ ຂອງກາງເຮໂຣອິນໜັກ 77ກິໂລທີ່ຊຸກເຊື່ອງໄວ້ຢູ່ຝາທ້າຍ ແລະ ຕີນສຳຮອງຂອງ ລົດກະບະນິສັນສີຟ້າໝາຍເລກທະບຽນ ບຊ 1395 ຈັງຫວັດຕາກ(ປະເທດໄທ), ພ້ອມເງິນສົດ 57 ພັນບາດໄທ, ກະເປົາ 4 ໜ່ວຍ ແລະ ໂທລະສັບມືຖື 3 ໜ່ວຍ, ຈຶ່ງໄດ້ຢຶດໄວ້ເປັນຫລັກຖານໃນການດຳເນີນຄະດີຕາມລະບຽບກົດໝາຍ.
ຜ່ານການສືບສວນ-ສອບສວນຂອງເຈົ້າໜ້າທີ່ພວກກ່ຽວຮັບສາລະພາບວ່າ: ເຮໂຣອິນຈຳນວນດັ່ງກ່າວແມ່ນເອົາມາຈາກຂະບວນການຄ້າຢາເສບຕິດຢູ່ແຂວງບໍ່ແກ້ວເພື່ອຈະໄປສົ່ງໃຫ້ລູກຄ້າຢູ່ແຂວງ ຊຽງຂວາງ ເຊິ່ງປັດຈຸບັນກຳລັງເຈົ້າໜ້າທີ່ພວມເລັ່ງ ດຳເນີນການສືບສວນ-ສອບສວນເພື່ອຂະຫຍາຍຜົນຊອກຫາຜູ້ຮ່ວມ ຂະບວນການ.
ຂ່າວຈາກ: ປກສ-ລາວພັດທະນາ