ຂປລ. ວັນທີ 12 ກໍລະກົດ 2015 ນີ້, ທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ, ຜູ້ຊີ້ນຳວຽກງານ ຂົງເຂດການຜະລິດ ແລະ ຈໍລະຈອນ, ພ້ອມຄະນະ ໄດ້ລົງມາຢ້ຽມຢາມ ເຂດກະສິກຳປູກເຂົ້າທົດລອງ ຂອງບໍລິສັດເປີຍຕ້າຫວງ ໃນເຂດທົດລອງ ປູກເບ້ຍຜັກອີຮູມ ແລະ ປູກເຂົ້າແບບທັນສະໄໝ ເຊິ່ງມີແນວພັນນໍາເຂົ້າ ຈາກປະເທດຈີນ ແລະ ໄທ, ພ້ອມທັງໄດ້ສຳຫລວດ ຄອງຊົນລະປະທານ ປະຕູນ້ຳປ່ອງທີ 3 ຢູ່ເມືອງຍົມມະລາດ ແຂວງຄຳມ່ວນ ເພື່ອສຳຫລວດເບິ່ງເຂົ້ານາ ຂອງປະຊາຊົນ ແລະ ສຳຫລວດເບິ່ງການນຳໃຊ້ ນ້ຳໃນຄອງຊົນລະປະທານ ຫລັງຈາກນັ້ນ ທ່ານ ສົມສະຫວາດ ເລັ່ງສະຫວັດ, ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມ ເພື່ອຮັບຟັງການລາຍງານ ສະພາບການຕ່າງໆ ໃນການເຮັດກະສິກຳປູກເຂົ້າທົດລອງ, ການນຳໃຊ້ນ້ຳໃນຄອງຊົນລະປະທານ ປະຕູນ້ຳປ່ອງທີ 3 ວ່າມີຂໍ້ສະດວກ ແລະ ຂໍ້ຫຍຸ້ງຍາກອັນໃດແດ່ ເພື່ອຈະນຳເອົາໄປປັບປຸງແກ້ໄຂ.
ໂອກາດດັ່ງກ່າວ ທ່ານ ຮອງນາຍົກລັດຖະມົນຕີ ໄດ້ໃຫ້ທິດຊີ້ນໍາແກ່ປະຊາຊົນ ໃນການນໍາໃຊ້ຊົນລະປະທານ ໃຫ້ເກີດປະໂຫຍດສູງສຸດ, ພ້ອມແນະນໍາ ໃຫ້ເພີ່ມຄວາມເອົາໃຈໃສ່ ປົກປັກຮັກສາ ຄອງຊົນລະປະທານ ໃຫ້ມີອາຍຸການນຳໃຊ້ທີ່ຍາວນານ.
ແຫລ່ງຂ່າວ: ສຳນັກຂ່າວສານປະເທດລາວ