ສວນວັດທະນະທຳຊຽງຄວນ ຕັ້ງຢູ່ເທິງຝັ່ງແມ່ນ້ຳຂອງ, ເຂດບ້ານຊຽງຄວນ, ເມືອງຫາດຊາຍຟອງ, ໃກ້ກັບຂົວມິດຕະພາບລາວ-ໄທ ແຫ່ງທີ 1, ຫ່າງຈາກຈຸດໃຈກາງນະຄອນຫລວງວຽງຈັນ ໄປທາງໃຕ້ປະມານ 24 ກິໂລແມັດ. ສວນວັດທະນະທຳແຫ່ງນີ້ ຖືກສ້າງຂຶ້ນໃນປີ ຄສ 1958 ໂດຍປູ່ບຸນເຫລືອ ສຸຣິຣັດ ເຊິ່ງປະກອບມີຮູບປັ້ນຢັງຢາຍກວ່າ 200 ແບບ ໃນນັ້ນ ມີທັງຮູບຄົນ, ຜີ, ເທວະດາ, ພະ, ສັດເດລະສານ ແລະ ອື່ນໆ ທີ່ຢູ່ໃນອະລິຍະບົດຕ່າງໆ ແລະ ມີການປະສົມປະສານລະຫວ່າງຄະຕິພຸດ ແລະ ຮິນດູ ຊວນໃຫ້ເກີດຄວາມຮູ້ສຶກຊື່ນຊົມ, ອັດສະຈັນ ແລະ ພິດສະຫວົງສົງໃສປະປົນກັນໄປ ເມື່ອໄດ້ພົບເຫັນ. ສິ່ງທີ່ໂດດເດັ່ນຢູ່ໃນອຸທະຍານແຫ່ງນີ້ ກໍ່ຄືພະພຸດທະຮູບປາງນອນ (ປາງພຸດທະໄສຍາດ)ທີ່ມີຄວາມຍາວປະມານ 50 ແມັດ ແລະ ປະຕິມະກຳຣາຫູຍັກທີ່ກຳລັງອ້າປາກຢູ່ ເຊິ່ງເປັນປະຕູເດີນທາງຂຶ້ນໄປສູ່ສະຫວັນຊັ້ນ 7 (ອອກຈາກປາກຣາຫູໄປສູ່ຊັ້ນດາດຟ້າ). ສິ່ງເຫລົ່ານີ້ ໄດ້ສ້າງຄວາມສົນໃຈ ແລະ ດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດໃຫ້ມາທ່ຽວຊົມເປັນຈຳນວນຫລວງຫລາຍ.
ທ່ານສາມາດມາທ່ຽວຊົມສວນວັດທະນະທຳແຫ່ງນີ້ໄດ້ທຸກມື້ ໃນລະຫວ່າງເວລາ 8:30-18:00 ໂມງ