ເສດຖະກິດຂອງ ສປປ ລາວ ຄາດວ່າຈະຂະຫຍາຍຕົວປະມານ 7,7% ໃນປີ 2013 ເນື່ອງຈາກບັນດາອຸດສາຫະກຳທີ່ອີງໃສ່ຊັບພະຍາກອນທຳມະຊາດ ອຸດສາຫະກຳຕັດຫຍິບ ແລະ ຂະແໜງບໍລິການ ຈະສືບຕໍ່ຂະຫຍາຍຕົວຢ່າງແຂງແຮງ ອີງຕາມບົດລາຍງານຂອງທະນາຄານພັດທະນາອາຊີ ADB.
ການເພີ່ມຂຶ້ນຂອງການບໍລິໂພກຂອງພາກເອກະຊົນ ແລະ ການຄ້າ ພາຍໃນພາກພື້ນທີ່ແຂງແຮງຂຶ້ນ ຈະຍູ້ດັນເຮັດໃຫ້ການຈະເລີນເຕີບໂຕຂອງການພັດທະນາອາຊີສູງຂຶ້ນໃນປີ 2013 ແລະ 2014 ເນື່ອງຈາກກິດຈະກຳທາງດ້ານເສດຖະກິດຕ່າງໆຂອງສະຫະລັດອາເມລິກາ ແລະ ເອີຣົບຍັງຄົງລ່າຊ້າ ອີງຕາມບົດລາຍງານປະຈຳປີດ້ານການຄາດຄະເນ ການພັດທະນາຂອງອາຊີ ປະຈຳປີ 2013.
ສປປ ລາວ ຈະສືບຕໍ່ເຫັນການຈະເລີນເຕີບໂຕໃນອີກ 2-3 ປີຕໍ່ໜ້າ ອີງໃສ່ຜົນສຳເລັດຕະຫຼອດໄລຍະ 5 ປີກວ່າທີ່ຜ່ານມາ ກ່າວໂດຍທ່ານ ຈອງ ຈີນາຍ ຜູ້ຕາງໜ້າທະນາຄານພັດທະນາອາຊີ ປະຈຳ ສປປ ລາວ ໃນຕໍ່ໜ້າ ສິ່ງທ້າທາຍຈະແມ່ນການປ່ຽນຍ້າຍຈຸດສຸມ ຈາກການຖືເອົາລະດັບຂອງການຈະເລີນເຕີບໂຕຂຶ້ນ ມາຖືເອົາຄຸນນະພາບຂອງການຈະເລີນເຕີບໂຕ ເພື່ອຮັບປະກັນວ່າ ສປປ ລາວ ຍັງຮັກສາແນວທາງຂອງການພັດທະນາໃນແບບທີ່ຍືນຍົງ ແລະ ທົ່ວເຖິງໝົດທຸກຄົນ.
ການຂະຫຍາຍຕົວຂອງເສດຖະກິດໃນອັດຕາ 7,9% ໃນປີ 2012 ແມ່ນໄດ້ຮັບແຮງຍູ້ໜູນຈາກລາຍຮັບຂອງຂະແໜງບໍ່ແຮ່ທີ່ເພີ່ມຂຶ້ນ ພ້ອມດ້ວຍລາຍຮັບຈາກຜົນຜະລິດທອງແດງທີ່ເພີ່ມຂຶ້ນປະມານ 8% ແລະ ຜົນຜະລິດຄຳເພີ່ມຂຶ້ນ 61% ໃນຂະນະລາຍຮັບຈາກຂະແໜງພະລັງງານເພີ່ມຂຶ້ນ 29% ໃນຕະຫຼອດປີ ແລະ ການເພີ່ມຂຶ້ນຂອງຈຳນວນນັກທ່ອງທ່ຽວທີ່ເຂົ້າມາລາວເພີ່ມຂຶ້ນ 22% ເທົ່າກັບ 3,3 ລ້ານເທື່ອຄົນ ໃນຂະນະດຽວກັນ ການຈະເລີນເຕີບໂຕຂອງຂະແໜງກະສິກຳແມ່ນ 2,5% ຍ້ອນຜົນໄດ້ຮັບຈາກການເກັບກ່ຽວມັນຕົ້ນຜະລິດທາດແປ້ງຕ່າງໆ ສັດລ້ຽງ ແລະ ສັດປີກທີ່ເພີ່ມຂຶ້ນ ຜົນເກັບກ່ຽວເຂົ້າໄດ້ຫຼຸດລົງເລັກໜ້ອຍ ເນື່ອງຈາກໄດ້ຮັບຜົນກະທົບຈາກໄພນ້ຳຖ້ວມ ອັດຕາເງິນເຟີ້ແມ່ນຢູ່ທີ່ລະດັບ 4,3% ໃນປີ 2012.
ໃນຕໍ່ໜ້າການລົງທຶນຂະໜາດໃຫຍ່ຈະຫຼັ່ງໄຫຼເຂົ້າມາໃນຂະແໜງພະລັງງານ ແລະ ບໍ່ແຮ່ ພ້ອມດ້ວຍການລົງທຶນໃນກິດຈະກຳກໍ່ສ້າງໂຮງແຮມ ຫ້ອງການ ແລະ ອາຄານທີ່ຢູ່ອາໃສ ຊຶ່ງຈະຍູ້ດັນໃຫ້ອັດຕາການຈະເລີນເຕີບໂຕຕໍ່ຫົວຄົນ (ຈີດີພີ) ເພີ່ມຂຶ້ນ ບັນດາໂຄງການພະລັງງານໄຟຟ້າທີ່ໄດ້ສຳເລັດໃນປີຜ່ານມາ ຈະປະກອບສ່ວນເຮັດໃຫ້ຂະແໜງການພະລັງງານສ້າງລາຍຮັບເພີ່ມຂຶ້ນ 12% ໃນປີ 2013 ການຈະເລີນເຕີບໂຕຂອງຂະແໜງກະສິກຳ ເຊິ່ງຈະຈ້າງແຮງງານເພີ່ມປະມານ 60% ແມ່ນຄາດວ່າຈະຂະຫຍາຍຕົວໃນອັດຕາທີ່ໄວພາຍໃນປີນີ້ ເນື່ອງຈາກຜົນເກັບກ່ຽວເຂົ້າໄດ້ຮັບການຟື້ນໂຕ ແລະ ການເພາະພັນສັດລ້ຽງກໍສືບຕໍ່ຂະຫຍາຍຕົວ ຈຳນວນນັກທ່ອງທ່ຽວທີ່ເຂົ້າມາຄາດວ່າຈະເພີ່ມຂຶ້ນປະມານ 10-15%.
ການພັດທະນາຂອງອາຊີສຳລັບປີ 2013 ຄາດວ່າບັນດາກິດຈະກຳດ້ານເສດຖະກິດໃນຂົງເຂດອາຊີຈະແຂງແຮງຂຶ້ນ ເພື່ອກະຕຸ້ນສ້າງແຮງກົດດັນໃຫ້ລາຄາສິນຄ້າມີການດັດປັບ ພ້ອມດ້ວຍອັດຕາເງິນເຟີ້ທີ່ສູງຂຶ້ນຈາກ 3,7% ໃນປີ 2012 ເປັນ 4% ໃນປີ 2013 ໃນປີ 2014 ສປປ ລາວ ສຳລັບປີ 2013 ອັດຕາເງິນເຟີ້ທີ່ຄາດວ່າຢູ່ທີ່ 5,5% ຄວາມກົດດັນທາງດ້ານລາຄາ ຍັງສາມາດຄວບຄຸມໄດ້ໃນປັດຈຸບັນ ແຕ່ຈະຕ້ອງໄດ້ຕິດຕາມຢ່າງໃກ້ຊິດ ໂດຍສະເພາະການໄຫຼເຂົ້າຂອງເງິນທຶນທີ່ແຂງແຮງເພີ່ມຂຶ້ນ ຊຶ່ງຈະເປັນເງື່ອນໄຂເຮັດໃຫ້ຕະຫຼາດອະສັງຫາລິມມະຊັບຢືດໂຕສູງຂຶ້ນ.
ພາກພື້ນອາຊີຕາເວັນອອກສຽງໃຕ້ ແມ່ນຍັງຄົງເປັນອະນຸພາກພື້ນທີ່ມີການຈະເລີນເຕີບໂຕໃນປີ 2012 ຊຶ່ງໄດ້ຮັບແຮງຍູ້ດັນຈາກເສດຖະກິດທີ່ຟື້ນໂຕຂອງປະເທດໄທ ແລະ ລາຍຈ່າຍພາກລັດຂອງປະເທດຟີລິບປິນທີ່ເຂັ້ມແຂງ ການດັດສົມລາຄາຈະຍັງຄົງສືບຕໍ່ເປັນແຮງຍູ້ດັນຕໍ່ການເພີ່ມຂຶ້ນຂອງພາກບໍລິໂພກ ການລົງທຶນເພີ່ມຂຶ້ນ ແລະ ການຄ້າພາຍໃນພາກພື້ນເພີ່ມຂຶ້ນ ຊຶ່ງຈະສົ່ງຜົນໃຫ້ຈີດີພີຂະຫຍາຍຕົວ ຄາດວ່າໃນອັດຕາ 5,4% ສຳລັບປີ 2013 ແລະ 5,7% ສຳລັບປີ 2014 ການເລີ່ມຕົ້ນຂອງການຮວມໂຕເປັນປະຊາຄົມອາຊຽນ ໃນປີ 2015 ທີ່ພວມຫຍັບມໍ່ເຂົ້າມາ ຈະເຮັດໃຫ້ການຄ້າພາຍໃນຂອບເຂດບັນດາປະເທດເສດຖະກິດຂະຫຍາຍຕົວໃນປະລິມານທີ່ເພີ່ມຂຶ້ນ ຊຶ່ງຈະຊ່ວຍເຮັດໃຫ້ຕະຫຼາດສົ່ງອອກສິນຄ້າມີຫຼາຍ.
ການເຜີຍແຜ່ການຄາດຄະເນການພັດທະນາຂອງອາຊີ ປະຈຳປີ 2013 ດັ່ງກ່າວນີ້ໄດ້ຈັດຂຶ້ນໃນວັນທີ 9 ເມສາ 2013 ນີ້ ຢູ່ທີ່ສຳນັກງານທະນາຄານພັດທະນາອາຊີ ປະຈຳ ສປປ ລາວ ໂດຍເປັນກຽດເຂົ້າຮ່ວມ ແລະ ເຜີຍແຜ່ຂອງທ່ານ ຈອງ ຈີນາຍ ຜູ້ຕາງໜ້າທະນາຄານພັດທະນາອາຊີ ປະຈຳ ສປປ ລາວ ພ້ອມດ້ວຍທ່ານ ບາເລັນ ພີລິງ ຮອງຜູ້ຕາງໜ້າທະນາຄານພັດທະນາອາຊີ ປະຈຳລາວ ແລະ ທ່ານ ສຸລິນທອນ ເລືອງຄຳສິງ ວິຊາການດ້ານເສດຖະກິດທະນາຄານພັດທະນາອາຊີ ປະຈຳ ສປປ ລາວ ພ້ອມດ້ວຍພະນັກງານ ແລະ ສື່ມວນຊົນທຸກຂະແໜງການເຂົ້າຮ່ວມ.