ພາຍຫຼັງຜົນອອກເລກລາງວັນຫວຍພັດທະນາ ງວດຄັ້ງວັນອັງຄານທີ 7 ກໍລະກົດ 2015 ຜ່ານມາ ເລກທີ່ອອກ 4473 ໃນນັ້ນແມ່ນເລກ 3 ໂຕ 473 ແມ່ນອອກເລກໂຕດຽວກັນກົງກັບງວດຄັ້ງວັນສຸກທີ 3 ກໍລະກົດ 2015 ຄືເລກ 3 ໂຕແມ່ນ 473 (ເລກ 4 ໂຕແມ່ນ 5473) ອັນໄດ້ເຮັດໃຫ້ມີຫາງສຽງຈົ່ມວ່າ ແລະ ວິພາກວິຈານຈາກສັງຄົມ ໂດຍສະເພາະ ຜູ້ມັກຊິງໂຊກຊິງລາງວັນ ວ່າຫວຍພັດທະນາມີການລ໊ອກຜົນການອອກເລກລາງວັນ ແລະ ອື່ນໆ ທີ່ຕີລາຄາໄປໃນທາງທີ່ບໍ່ຖືກຕ້ອງປັ່ນປ່ວນສັງຄົມ.
ຕໍ່ບັນຫາດັ່ງກ່າວນີ້ ທ່ານ ຄຳເພັງ ທິນນະກອນ ຜູ້ອຳນວຍການບໍລິສັດ ລັດວິສາຫະກິດຫວຍພັດທະນາ ໄດ້ໃຫ້ສຳພາດຕໍ່ສື່ຂ່າວພວກເຮົາ ໃນວັນທີ 8 ກໍລະກົດ 2015 ເຊິ່ງທ່ານໄດ້ໃຫ້ເຫດຜົນວ່າ: ການອອກເລກລາງວັນຫວຍພັດທະນາທີ່ໂຕເລກຄືກັນກັບຄັ້ງຜ່ານມາ ມັນແມ່ນຄວາມບັງເອີນເກີດຂຶ້ນ ແລະ ຜ່ານມາກໍ່ເຄີຍມີເລື້ອຍໆທີ່ເປັນແບບນີ້ ຄືຄັ້ງງວດວັນທີ 4 ມີນາ 2014 ເລກທີ່ອອກ 4772 ແລະ ຄັ້ງວັນທີ 27 ພຶດສະພາ 2014 ເລກທີ່ອອກ 3772 ເຊິ່ງເລກ 3 ໂຕທ້າຍແມ່ນເລກດຽວກັນ ຕໍ່ກັບຫາງສຽງວ່າມີການລ໊ອກຜົນການອອກລາງວັນນັ້ນ ແມ່ນບໍ່ມີຄວາມຈິງແຕ່ຢ່າງໃດ ເນື່ອງຈາກການອອກເລກລາງວັນແຕ່ລະຄັ້ງນັ້ນ ໄດ້ມີຄະນະກຳມະການ 7 ທ່ານຈາກພາກສ່ວນກ່ຽວຂ້ອງເຂົ້າຮ່ວມເປັນສັກຂີພິຍານ ສ່ວນອຸປະກອນທີ່ນຳໃຊ້ເຂົ້າໃນການໝູນວົງລໍ້ ແລະ ໝາກບານກໍ່ລ້ວນແລ້ວເປັນຢາງປຣາສະຕິກທັງນັ້ນ ແຕ່ການອອກເລກລາງວັນຄັ້ງຫຼ້າສຸດນີ້ ທາງພວກເຮົາກໍ່ໄດ້ປ່ຽນອຸປະກອນໜ່ວຍໝາກຕຸ້ມໃໝ່ ຈາກຢາງປຣາສະຕິກມາເປັນສະແຕນເລດ ແຕ່ໜ່ວຍໝາກບານຍັງເປັນຢາງຄືເກົ່າ ແລະ ມື້ອອກເລກລາງວັນ ກໍ່ໄດ້ມີບັນດາຕົວແທນຈຳໜ່າຍຫວຍ ແລະ ມວນຊົນທົ່ວໄປ ເຂົ້າຮ່ວມເປັນສັກຂີພິຍານເປັນຈຳນວນຫຼວງຫຼາຍ ເລກລາງວັນອອກແຕ່ລະຄັ້ງແມ່ນມີຄວາມປອດໃສ ໂດຍເຫັນນຳກັນຢ່າງຈະແຈ້ງ ແລະ ຖ້າຫາກພາກສ່ວນໃດ ຫຼື ບຸກຄົນໃດຫາກມີຄວາມສົນໃຈ ຕໍ່ກັບການອອກເລກລາງວັນແຕ່ລະຄັ້ງນັ້ນ ກໍ່ສາມາດມາເບິ່ງດ້ວຍຕົນເອງໄດ້ ທີ່ອາຄານອອກຫວຍບ້ານທົ່ງຂັນຄຳ ເມືອງຈັນທະບູລີ ນະຄອນຫຼວງວຽງຈັນ ເລີ່ມແຕ່ເວລາ 20:00 ໂມງເປັນຕົ້ນໄປ ເຖິງຢ່າງໃດກໍ່ຕາມ ໃຫ້ສັງຄົມເຂົ້າໃຈວ່າຫວຍພັດທະນາເປັນຫວຍຂອງລັດຖະບານ ໂດຍຢູ່ພາຍໃຕ້ການຄຸ້ມຄອງຂອງກະຊວງການເງິນ ຈະບໍ່ມີພາກເອກະຊົນພາຍໃນ ແລະ ຕ່າງປະເທດມາສຳປະທານແຕ່ຢ່າງໃດທັງນັ້ນ ຕໍ່ກັບບັນຫາທີ່ວ່າ ເປັນຫຍັງຈຶ່ງບໍ່ຖ່າຍທອດສົດພາບອອກອາກາດທາງໂທລະພາບນັ້ນ ປັດຈຸບັນກໍ່ໄດ້ສະເໜີຫາຂັ້ນເທິງພິຈາລະນາແລ້ວ ຖ້າເພິ່ນເຫັນດີອະນຸຍາດ ກໍ່ຈະໄດ້ຈັດຕັ້ງປະຕິບັດ ຖືວ່າປັດຈຸບັນຍັງລໍຖ້າຢູ່.
ທ່ານຜູ້ອຳນວຍການຫວຍພັດທະນາ ຍັງກ່າວຕື່ມວ່າ: ຕໍ່ກັບບັນຫາທີ່ສັງຄົມຈົ່ມວ່າ ຊອກຊື້ເລກລາງວັນທີ່ຕ້ອງການບໍ່ໄດ້ ເຕັມກ່ອນນັ້ນ ບັນຫານີ້ແມ່ນຍ້ອນວ່າການຂາຍເລກລາງວັນມັນມີເພດານ ດັ່ງນັ້ນ ເລກລາງວັນທີ່ຄົນນິຍົມ ຖ້າຜູ້ຊື້ກ່ອນກໍ່ຈະໄດ້ ແຕ່ຜູ້ທີ່ໄປຊື້ນຳຫຼັງ ບາງຄັ້ງກໍ່ຈະບໍ່ໄດ້ ແລະ ຖ້າໄດ້ກໍ່ບໍ່ໄດ້ຕາມຄວາມປະສົງ ຕໍ່ບັນຫານີ້ ໃຫ້ສັງຄົມເຂົ້າໃຈວ່າ ເລກລາງວັນແຕ່ລະຮູນັ້ນ ມັນມີຈຳກັດ ແລະ ມີເພດານ ຖ້າຂາຍເຕັມແລ້ວກໍ່ຈະໝົດ ຜ່ານມາມີຫາງສຽງສັງຄົມຈົ່ມວ່າເລກເຕັມຍ້ອນແມ່ເລກອັ້ນໄວ້ (ບໍ່ຂາຍໃຫ້) ຢ້ານຄົນຖືກຈະຂາດທຶນ ຕໍ່ບັນຫານີ້ ບໍ່ແມ່ນຄວາມຈິງແຕ່ຢ່າງໃດ ມີແຕ່ວ່າເລກຮູໃດຂາຍໝົດກໍ່ໝົດ ຈະບໍ່ມີອີກສຳລັບງວດນັ້ນ.
ຂອບໃຈຂ່າວຈາກ: ໜັງສືພິມວຽງຈັນໃໝ່