ທີມບານເຕະຊາຍ ສຶກສາທິການ ແລະ ກີລາແຂວງຫົວພັນ (ສກຂ) ຫວັງສ້າງປະຫວັດສາດຄວ້າແຊ້ມ ບານເຕະຊີງຂັນເຈົ້າແຂວງຫົວພັນ ປະຈໍາປີ 2015 ໃຫ້ໄດ້ ຫຼັງສະແດງຟອມຢ່າງໂດດເດັ່ນ ທັງທີ່ຫາກໍ່ເຂົ້າຮ່ວມການແຂ່ງຂັນບານເຕະຊີງຂັນເຈົ້າແຂວງໆຫົວພັນຄັ້ງທໍາອິດ ແຕ່ສ້າງຜົນງານໄດ້ຢ່າງໂດດເດັ່ນເຖິງວ່າຈະເປັນນ້ອງໃໝ່ ໄລ່ຖະຫຼົ່ມ ບັກຊາ ເອຟຊີ 7-0 ໃນຮອບຮອງຊະນະເລີດ ເມື່ອທ້າຍເດືອນມິຖຸນາທີ່ຜ່ານມາ ຜ່ານເຂົ້າຮອບຊີງຊະນະເລີດ ພົບກັບ ໄຟຟ້າລາວ.

ການແຂ່ງຂັນບານເຕະຊາຍ ຊີງຂັນເຈົ້າແຂວງໆຫົວພັນ ປະຈໍາປີ 2015 ເພື່ອຕ້ອນຮັບກອງປະຊຸມໃຫຍ່ຂອງອົງຄະນະພັກແຂວງໆຫົວພັນ ຄັ້ງທີ IX ທີ່ກຽມຈະເປີດສາກຂຶ້ນໃນເດືອນກໍລະກົດນີ້ ໂດຍມີ 14 ທີມເຂົ້າຮ່ວມໃນທົ່ວແຂວງຫົວພັນ, ແບ່ງອອກເປັນ 4 ກຸ່ມ ຜ່ານການແຂ່ງຂັນຕັ້ງແຕ່ວັນທີ 20 ພືດສະພາທີ່ຜ່ານມາ ຈົນເຖິງທ້າຍເດືອນມິຖຸນາທີ່ຜ່ານມາ ປະກົດວ່າ: ສສກ ແຂວງຫົວພັນ ເຂົ້າຮອບຊີງຊະນະເລີດກັບ ໄຟຟ້າລາວ.
ໂດຍ ສກຂ ແຂວງຫົວພັນ ສ້າງຜົນງານຢ່າງໂດດເດັ່ນທັງຮອບແບ່ງກຸ່ມ ແລະ ຮອບ 8 ທີມສຸດທ້າຍ ຈົນຜ່ານເຂົ້າຮອບ 4 ທີມສຸດທ້າຍພົບກັບ ບັກຊາ ເອຟຊີ ເຊິ່ງກໍ່ສາມາດໄລ່ຖະຫຼົ່ມທີມດັ່ງກ່າວເຖິງ 7-0 ເມື່ອທ້າຍເດືອນມິຖຸນາທີ່ຜ່ານມາ ເຮັດໃຫ້ຜ່ານເຂົ້າຮອບຊີງຊະນະເລີດເປັນຄັ້ງປະຫວັດສາດຂອງບານເຕະດັ່ງກ່າວ ໂດຍຈະໄປພົບກັບ ໄຟຟ້າລາວ ແຊ້ມເກົ່າ 2 ສະໄໝ ທີ່ເອົາຊະນະ ໂຍທາທິການ 1-0 ໃນຮອບ 4 ທີມທີ່ຜ່ານ.
ຈາກເຫດການດັ່ງກ່າວ ທ່ານ ສີສົມສັກ ຜູ້ຮັກສາປະຕູຂອງທີມ ສກຂ ແຂວງຫົວພັນ ກ່າວວ່າ: ຜ່ານການແຂ່ງຂັນຈາກຫຼາຍນັດທີ່ຜ່ານ ເຮັດໃຫ້ພວກເຮົາໝັ້ນໃຈຫຼາຍຂຶ້ນ ໂດຍສະເພາະນັດທີ່ຖະຫຼົ່ມ ບັກຊາ ເອຟຊີ 7-0 ເຊິ່ງນັດຊີງຊະນະເລີດນີ້ແນ່ນອນມັນມີຄວາມທ້າທາຍຫຼາຍຢ່າງ ເປັນຕົ້ນກໍ່ແມ່ນທີມຂອງພວກເຮົາຍັງເປັນທີມນ້ອງໃໝ່ ແລະ ນັກເຕະກໍ່ໜຸ່ມໜ້ອຍ ຫາກໍ່ເຂົ້າຮ່ວມການແຂ່ງຂັນລາຍການດັ່ງກ່າວນີ້ເປັນຄັ້ງທໍາອິດ ຂະນະທີ່ ໄຟຟ້າລາວ ເປັນທີມທີ່ເຂົ້າຮ່ວມມາຕັ້ງແຕ່ເລີ່ມຈັດການແຂ່ງຂັນປະມານປີ 2000 ທີ່ຜ່ານມາ ຢ່າງໃດກໍ່ຕາມ ພວກເຮົາມີຄວາມໝັ້ນໃຈສຸດ ແລະ ຕັ້ງເປົ້າຄວ້າແຊ້ມຄັ້ງປະຫວັດສາດໃຫ້ໄດ້.
ສຳລັບນັດຊີງຊະນະເລີດນັ້ນແມ່ນຍັງບໍ່ທັນກຳນົດໄດ້ເທື່ອ ເພາະວ່າກອງປະຊຸມອົງຄະນະພັກແຂວງຫົວພັນ ຄັ້ງທີ IX ມີການເລື່ອນເວລາເປີດກອງປະຊຸມ, ສະນັ້ນໃນຮອບຊີງຊະນະເລີດແມ່ນຈະລໍຖ້າຊີງໃສ່ມື້ສຳເລັດກອງປະຊຸມດັ່ງກ່າວ ສ່ວນນັດຊີງອັນດັບທີ 3 ແມ່ນຈະແຂ່ງຂັນໃສ່ມື້ເປີດກອງປະຊູມດັ່ງກ່າວ ເຊິ່ງຄາດວ່າຈະເລີ່ມເປີດສາກໃນກາງເດືອນກໍລະກົດນີ້