ຂ່າວ: ບຸນທຽມ
ເຄື່ອງເຟີນີເຈີ, ໄມ້ຄວັດແກະສະຫລັກ, ດ້ວຍການອອກແບບຄວາມປານີດ ເນັ້ນວັດທະນະທຳລາວປະສົມປະສານກັບສາກົນຈາກບໍລິສັດ ຄຳທະນະພອນຄວັດແກະສະຫລັກຫັດຖະກຳໄມ້ ຈຳກັດຜູ້ດຽວ ປະຈຸບັນກາຍເປັນທີ່ຕ້ອງການສູງໃນຕະຫລາດ ສປ ຈີນ, ຂະນະ ທີ່ປີຜ່ານມາທຸລະກິດຂະຫຍາຍຕົວເກີນ ເປົ້າລູກຄ້າຈາກຈີນສັ່ງຈອງແຫນ້ນສາມາດສ້າງລາຍຮັບໄດ້ຫລາຍຕື້ກີບຕໍ່ເດືອນ.
ທ່ານ ວິລັດ ປັນຍາລາດ ປະທານບໍລິສັດຄຳທະນະພອນຄວັດແກະສະຫລັກຫັດຖະກຳໄມ້ ຈຳກັດຜູ້ດຽວ ໃຫ້ສຳພາດກັບທີມຂ່າວເສດຖະກິດວ່າ: ເຄື່ອງເຟີນີເຈີ, ໄມ້ຄວັດແກະສະຫລັກ, ເຄື່ອງທີ່ລະນຶກ, ເຄື່ອງແອ້ປະດັບປະດາ ແລະ ເຄື່ອງໃຊ້ໃນຄົວເຮືອນອື່ນໆ ໂດຍການອອກແບບດ້ວຍສີມືຄົນລາວເນັ້ນວັດທະນະທຳລາວ ປະສົມປະສານກັບສາກົນຂອງບໍລິສັດຄຳທະນະພອນຄວັດແກະສະຫລັກຫັດຖະກຳໄມ້ ກຳລັງເປັນທີ່ຕ້ອງການໃນຕະຫລາດ ສປ ຈີນ ແລະ ໄທ ນອກຈາກນີ້ ຕະຫລາດອາຊຽນກໍ່ໃຫ້ຄວາມສົນໃຈສັ່ງຊື້ນັບມື້ນັບເພີ່ມ.
ປະຈຸບັນ ທາງບໍລິສັດກຳລັງກຽມຄວັດແກະສະຫລັກໄມ້ວັດທະນະທຳລາວ ເປັນເອກະລັກດັ້ງເດີມ ພ້ອມທັງໄດ້ມີການປະສົມປະສານກັບສາກົນເພື່ອໄປວາງສະແດງສູ່ສາຍຕາມວນຊົນ ແລະ ຊາວຕ່າງຊາດ ໃນງານວາງສະແດງສິນຄ້າເຟີນີເຈີ ແລະ ເຄື່ອງໃຊ້ພາຍໃນເຮືອນ ເພື່ອເຊື່ອມໂຍງທາງດ້ານການຕະຫລາດລະຫວ່າງປະເທດໃກ້ຄຽງປະຈຳປີ 2013 ທີ່ຈະຈັດຂຶ້ນວັນທີ 28 ພຶດສະພາ-2 ມິຖຸນາ 2013 ທີ່ສູນການຄ້າລາວ-ໄອເຕັກ ນະຄອນຫລວງວຽງຈັນ ທີ່ສຳຄັນ ຜະລິດຕະພັນດັ່ງກ່າວກຽມຈະນຳເອົາໄປອວດສູ່ສາຍຕາຊາວໂລກ ໃນງານວາງສະແດງສິນຄ້າຈີນອາຊຽນປະມານທ້າຍເດືອນກັນຍາ ທີ່ເມືອງຫນານຫນິງ ແຂວງກວາງຊີ ສປ ຈີນ ເປັນຕົ້ນ: ຮູບຈຳລອງວັດຊຽງທອງ, ວັດພູຈຳປາສັກ, ນາງສາວລາວ, ຄົນເປົ່າແຄນລາວ ແລະ ອື່ນໆ ທີ່ເປັນວັດທະນະທຳລາວ ແລະ ເອກະລັກຂອງແຕ່ລະຊົນເຜົ່າ ແຕ່ລະທ້ອງຖິ່ນໃຫ້ຊາວໂລກຮັບຮູ້ໄດ້ສີມືຄົນລາວກໍ່ບໍ່ນ້ອຍຫນ້າ.
ທ່ານປະທານບໍລິສັດຄຳທະນະພອນ ກ່າວອີກວ່າ: ປະຈຸບັນ ຜະລິດຕະພັນຈາກບໍລິສັດຄຳທະນະພອນຄວັດແກະສະຫລັກຫັດຖະກຳໄມ້ ຈຳກັດຜູ້ດຽວ ກາຍເປັນທີ່ຮູ້ຈັກກັນຢ່າງກວ້າງຂວາງໃນຕະຫລາດ ສປ ຈີນ ແລະ ອາຊຽນ ເດັ່ນກວ່າຫມູ່ໃນປີ 2012 ຜ່ານມາທາງບໍລິສັດສາມາດສ້າງລາຍຮັບໄດ້ຫລາຍທີ່ສຸດ ແລະ ມີລູກຄ້າຈາກ ສປ ຈີນ ມາເຮັດສັນຍາສັ່ງ ຊື້ 6 ບໍລິສັດ, ສ້າງລາຍຮັບໃຫ້ບໍລິສັດເດືອນຫນຶ່ງນັບຫລາຍຕື້ກີບຕໍ່ເດືອນ ຂະນະທີ່ປະຈຸບັນທາງບໍລິສັດໄດ້ເລ່ງຜະລິດທັງເວັນທັງຄືນ ເພື່ອໃຫ້ຖ່ວງທັນກັບການສັ່ງຊື້ຂອງລູກຄ້າ.
ເຊື່ອແນ່ວ່າການເປີດປະຊາຄົມເສດຖະກິດອາຊຽນ ຫລື AEC ອີກ 2 ປີຂ້າງຫນ້າຜະລິດຕະພັນລາວ (ໄມ້ແກະສະຫລັກ) ຈະສາມາດແຂ່ງຂັນກັບຕະຫລາດສາກົນໄດ້ ເພາະວ່າການສ້າງຜະລິດຕະພັນເປັນຂອງລາວເນັ້ນຄວາມລະອຽດຄວາມປານີດໃສ່ໃຈເລື່ອງວັດທະນະທຳ ເອກະລັກຂອງຊາດຄຽງຄູ່ກັບສາກົນ ສ້າງຄວາມຫລາກຫລາຍໃຫ້ເປັນທີ່ຍອມຮັບຈາກລູກຄ້າ, ທ່ານ ວິລັດ ປັນຍາ ລາດ ກ່າວ.
ທີ່ມາhttp://www.ecom.org.la