ສຳນັກຂ່າວຕ່າງປະເທດ ລາຍງານໃນວັນທີ 9 ກໍລະກົດນີ້ວ່າ ບໍລິສັດໄມໂຄຣຊອບ ໄດ້ປະກາດແຜນປົດພະນັກງານອອກ 7,800 ຄົນ ໃນມື້ວານນີ້ (8 ກໍລະກົດ) ເພື່ອປັບໂຄງສ້າງອົງກອນ ຫລັງປະສົບບັນຫາດ້ານການແຂ່ງຂັນໃນຕະຫລາດມືຖື ໂດຍຕຳແໜ່ງທີ່ຈະຖືກປົດອອກນີ້ ສ່ວນໃຫຍ່ແມ່ນຢູ່ໃນພະແນກໂທລະສັບ ແລະ ບໍລິສັດຈະຫລຸດມູນຄ່າທາງບັນຊີຂອງທຸລະກິດ ເຊິ່ງຊື້ມາຈາກໂນເກຍລົງ ປະມານ 7,600 ລ້ານໂດລາ.
ທັງນີ້ ບໍລິສັດໄມໂຄຣຊອບ ໄດ້ຫລົ້ມເຫລວໃນຄວາມພະຍາຍາມທີ່ຈະຊຸກດັນໃຫ້ວິນໂດໂຟນ ທີ່ພັດທະນາຂຶ້ນໃຊ້ໃນໂທລະສັບໂນເກຍ ເພື່ອແຂ່ງຂັນໃນຕະຫລາດສະມາດໂຟນ ແຕ່ວ່າໃນຕົວຈິງແລ້ວແມ່ນຍາດສ່ວນແບ່ງໄດ້ພຽງ 3.2% ເທົ່ານັ້ນ ສຳລັບປີນີ້.