ສູນຂ່າວສານການແພດ, ກະຊວງສາທາລະນະສຸກ ແລະ ພະແນກໂຍທາທິການ-ຂົນສົ່ງນະຄອນຫລວງວຽງຈັນ ມອບຫມາຍໃຫ້ ບໍລິສັດບລູກຣາດສ໌ ດີຊາຍ ກຣຸບ ຈຳກັດຜູ້ດຽວ (BlueGrass) ເຮັດຫນ້າທີ່ໂຄສະນາລົດເມສີຂຽວ ເພື່ອເປັນການຫລຸດຜ່ອນການສັນຈອນທີ່ແອອັດພາຍໃນຕົວເມືອງນະຄອນຫລວງວຽງຈັນ ແລະ ເປັນການປະຊາສຳພັນໃຫ້ຄົນໃນສັງຄົມຮັບຮູ້ເຖິງຂ່າວສານທາງດ້ານສຸຂະອະນາໄມຫລາຍຂຶ້ນ.
ຈຸດປະສົງຂອງການປະຊາສຳພັນກ່ຽວກັບການນຳໃຊ້ລົດເມສາທາລະນະໃນຄັ້ງນີ້ ທາງບໍລິສັດຜູ້ສຳປະທານໄດ້ມີແນວຄິດໃນການສ້າງຄ່ານິຍົມໃຫ້ແກ່ຄົນໃນສັງຄົມໃຫ້ພາກັນຫັນມານຳໃຊ້ລົດເມສາທາລະນະໃຫ້ຫລາຍຂຶ້ນດ້ວຍວິທີການສ້າງໃຫ້ລົດເມສີຂຽວກາຍເປັນ ລົດເມສາທາລະນະທີ່ມີຄວາມທັນສະໄຫມທີ່ສຸດຂອງນະຄອນຫລວງວຽງຈັນ ໂດຍຈະເນັ້ນທີ່ຄວາມສະດວກສະບາຍ, ຄວາມເຢັນຂອງລະບົບປັບອາກາດພາຍໃນລົດເມ, ຄວາມສະອາດ, ຄວາມງາມ ແລະ ທີ່ສຳຄັນດ້ານໃນຂອງລົດເມສີຂຽວ ແມ່ນໄດ້ຕິດຕັ້ງໂທລະທັດ ທີ່ນຳສະເຫນີສື່ໂຄສະນາກ່ຽວກັບສຸຂະອະນາໄມ.
ນອກຈາກນີ້ ບໍລິສັດ ບລູກຣາດສ໌ ດີຊາຍກຣຸບ ຈຳກັດຜູ້ດຽວ (BlueGrass) ຍັງໄດ້ຮັບຄວາມໄວ້ວາງໃຈຈາກສູນຂ່າວສານການແພດກະຊວງສາທາລະນະສຸກ ໃຫ້ເປັນຜູ້ດຳເນີນການເຜີຍແຜ່ຂໍ້ມູນ-ຂ່າວສານທີ່ຈຳເປັນກ່ຽວກັບທາງດ້ານສຸຂະອະນາໄມໃຫ້ແກ່ຜູ້ໂດຍສານໄດ້ຮັບຮູ້ເຊັ່ນ: ການລ້ຽງລູກດ້ວຍນົມແມ່, ການນຳໃຊ້ຢາປົວພະຍາດຢ່າງຖືກວິທີ, ການປ້ອງກັນໄຂ້ຫວັດສັດປີກ ແລະ ຂ່າວສານກ່ຽວກັບສຸຂະພາບອື່ນໆທີ່ຈຳເປັນອີກຢ່າງຫລວງຫລາຍ, ດັ່ງນັ້ນ ບໍລິສັດ ຂໍຖືໂອກາດນີ້ເຊີນຊວນບັນດາທ່ານໃນທົ່ວສັງຄົມພາກັນຫັນມານຳໃຊ້ລົດເມສາທາລະນະໃຫ້ຫລາຍຂຶ້ນ ແລ້ວຈະພົບກັບມິຕິໃຫມ່່ຂອງການເດີນທາງທີ່ທ່ານອາດຈະເບິ່ງຂ້າມຄວາມສະດວກສະບາຍທີ່ມີຢູ່ໃກ້ຕົວທ່ານ.
ທີ່ມາhttp://www.ecom.org.la