ລາຊະອານາຈັກອັງກິດຈະເປີດສະຖານເອກອັກຄະລະຊະທູດປະຈຳ ສປປ ລາວ ທີ່ນະຄອນຫລວງວຽງຈັນ ພ້ອມທັງຈະຈັດຫລາຍກິດຈະກຳສະຫລອງນັບແຕ່ວັນທີ 2-5 ເມສາ 2013 ທັງນີ້, ເພື່ອເປັນການອຳນວຍຄວາມສະດວກແກ່ຄົນອັງກິດຢູ່ລາວ, ຄົນລາວຈະໄປອັງກິດ ແລະ ບັນຫາອື່ນໆ.
ທ່ານ ຟີລີບ ມາໂລນ ເອກອັກຄະລາຊະທູດອັງກິດປະຈຳ ສປປ ລາວ ຖະແຫລງຕໍ່ສື່ມວນຊົນໃນມື້ວານນີ້ວ່າ: ການເປີດສະຖານເອກອັກຄະລາຊະທູດຂອງອັງກິດທີ່ນະຄອນຫລວງວຽງຈັນ ປະຈຳ ສປປ ລາວ ເພື່ອເປັນການສ້າງຄວາມອຳນວຍສະດວກແກ່ຄົນອັງກິດທີ່ຈະເດີນທາງມາ ສປປ ລາວ ແລະ ຄົນ ລາວ ຈະເດີນທາງໄປອັງກິດ ແລະ ກໍ່ພ້ອມທີ່ຈະໃຫ້ການຊ່ວຍເຫລືອພົນລະເມືອງອັງກິດໃນລາວ ແລະ ຜົນປະໂຫຍດອື່ນໆຂອງຄົນອັງກິດໃນພາກພື້ນທີ່ສຳຄັນຈະໄດ້ໃຫ້ການຊ່ວຍເຫລືອເມື່ອສະພາບແວດລ້ອມບໍ່ເອື້ອອຳນວຍ ຫລື ສິ່ງທີ່ບໍ່ຄາດຄິດເກີດຂຶ້ນກັບຄົນອັງກິດຢູ່ລາວ ໂດຍຈະໄດ້ມີພິທີເປີດອາຄານສະຖານເອກອັກຄະລາຊະທູດອັງກິດປະຈຳລາວເປັນທາງການໃນວັນທີ 2 ເມສາ 2013 ທີ່ຖະຫນົນເນຫລູ ເມືອງຈັນທະບູລີ ນະຄອນຫລວງວຽງຈັນ.
ທ່ານ ຟີລີບ ມາໂລນ ກ່າວອີກວ່າ: ເພື່ອເປັນການສະເຫລີມສະຫລອງໃນການເປີດສະຖານທູດອັງກິດປະຈຳລາວທາງສະຖານທູດຈະໄດ້ມີການຈັດກິດຈະກຳຫລາຍຢ່າງນັບແຕ່ວັນທີ 2 ເມສາ ຈະໄດ້ມີງານພົບປະສ້າງສັນ ແລະ ບາສີສູ່ຂວັນອາຄານຫລັງໃຫມ່, ວັນທີ 3 ເມສາງານພົບປະສ້າງສັນກັບສະມາຄົມນັກທຸລະກິດອັງກິດທີ່ໂຮງແຮມເສດຖາປາລາດ ເພື່ອດຶງເອົາບຸກຄົນ ແລະ ບັນດາບໍລິສັດມາປຶກສາຫາລື, ວັນທີ 4 ເມສາ ຈະໄດ້ຈັດງານພົບປະອະດີດນັກສຶກສາຈາກກອງທຶນການສຶກສາເຊເວນນິງ ແລະ ນັກສຶກສາລາວຜູ້ທີ່ໄດ້ສຶກສາທີ່ອັງກິດ ແລະ ໃນວັນທີ 5 ເມສາ ທາງສະຖານທູດອັງກິດຈະໄດ້ເປີດໂອກາດໃຫ້ຄົນອັງກິດເຂົ້າມາພົວພັນວຽກງານ ແລະ ປຶກສາບັນອື່ນໆ.
ທີ່ມາhttp://www.ecom.org.la