ສຳນັກຂ່າວຕ່າງປະເທດ ລາຍງານໃນວັນທີ 6 ກໍລະກົດນີ້ວ່າ ທ່ານ ເຢນສ໌ ໄວດ໌ມັນ ຜູ້ວ່າການທະນາຄານກາງເຢຍລະມັນ ໄດ້ອອກເຕືອນລັດຖະບານຂອງຕົນ ເຖິງຜົນກະທົບອັນໃຫຍ່ຫລວງ ຕໍ່ກັບສະພາວະທາງດ້ານງົບປະມານຂອງເຢຍລະມັນທີ່ຈະຕາມມາ ຫາກວ່າເກຣັກຕ້ອງໄດ້ອອກຈາກເອີໂຣໂຊນ ຫລື ກຸ່ມ 19 ປະເທດທີ່ໃຊ້ເງິນສະກຸນເອີໂຣຮ່ວມກັນ ໂດຍສະເພາະແມ່ນຜົນກະທົບທາງດ້ານງົບປະມານ ທີ່ເຢຍລະມັນເອງຈະຕ້ອງໄດ້ເປັນຜູ້ແບກຮັບ ເພາະບໍ່ສາມາດຫາງົບປະມານມາສຳຮອງໄວ້ ເພື່ອຮອງຮັບຄວາມເສຍຫາຍທາງເສດຖະກິດ ທີ່ຈະເກີດຂຶ້ນຕາມມາ.
ທັງນີ້ ກ່ອນໜ້າທີ່ເກຣັກຈະລົງປະຊາມະຕິບໍ່ຮັບຮອງເງື່ອນໄຂຂອງສະຫະພາບເອຣົບ ແລະ ກອງທຶນການເງິນລະຫວ່າງປະເທດນັ້ນ ທະນາຄານກາງຂອງເຢຍລະມັນ ແມ່ນໄດ້ມີການກັນເງິນສຳຮອງໄວ້ ເພື່ອຮອງຮັບຄວາມສ່ຽງຈາກວິກິດການໜີ້ສິນເອີໂຣໂຊນໄວ້ແລ້ວ ກ່ວາ 14,400 ລ້ານເອີໂຣ.