ສຳນັກຂ່າວຕ່າງປະເທດ ລາຍງານໃນວັນທີ 3 ກໍລະກົດນີ້ວ່າ ບໍລິສັດເຜີຍແຜ່ພາບກະຈາຍສຽງອັງກິດ ຫລື ບີບີຊີ (BBC) ເຊິ່ງເປັນສະຖານີໂທລະພາບຊື່ດັງຂອງໂລກ ໄດ້ມີແຜນຈະປັບຫລຸດພະນັກງານລົງ ຫລາຍກ່ວາ 1,000 ຕຳແໜ່ງ ເຊິ່ງເປັນສ່ວນໜຶ່ງໃນການຫລຸດຜ່ອນຄ່າໃຊ້ຈ່າຍ ເນື່ອງຈາກຊາວອັງກິດໄດ້ຫັນປ່ຽນໄປເສບສື່ສັງຄົມອອນລາຍ ຢູ່ເທິງແທັບເລັດ ແລະ ສະມາດໂພນຫລາຍຂຶ້ນ ແທນການເບິ່ງໂທລະພາບຄືໃນເມື່ອກ່ອນ.

ທັງນີ້ ບີບີຊີ ແມ່ນມີອາຍຸເກືອບ 100 ປີ ແມ່ນມີລາຍຮັບຈາກເງິນພາສີຂອງປະຊາຊົນ ໂດຍທຸກຄົວເຮືອນທີ່ມີການຮັບຊົມລາຍການໂທລະພາບ ຈະຕ້ອງຈ່າຍຄ່າທຳນຽມປະຈຳປີໃຫ້ແກ່ສະຖານີ ເປັນເງິນ 145.50 ປອນ ຫລື 227 ໂດລາສະຫະລັດຕໍ່ປີ, ແຕ່ພາຍຫລັງມານີ້ ປະຊາຊົນຫັນໄປຮັບຊົມລາຍງານຕ່າງໆທາງອອນລາຍຫລາຍຂ້ນ ເຮັດໃຫ້ຈຳນວນຄົວເຮືອນທີ່ຍອມຈ່າຍຄ່າທຳນຽມດັ່ງກ່າວຫລຸດລົງເກີນຄາດໝາຍ ຈົນເຮັດໃຫ້ບໍລິສັດມີບັນຫາທາງດ້ານການເງິນ ສົ່ງຜົນເຮັດໃຫ້ມີການປັບຫລຸດຈຳນວນພະນັກງານລົງພັນກ່ວາຕຳແໜ່ງ ເພື່ອຊ່ວຍປະຢັດງົບປະມານ 50 ລ້ານປອນຕໍ່ປີ.