Homeຂ່າວພາຍ​ໃນລມຕ. ການເງິນ ເຜີຍ​ຄວາມ​ຫຍຸ້ງຍາກການ​​ເກັບ​ລາຍ​ຮັບ! ລັດວິສາຫະກິດການບິນລາວ - ETL ກຳລັງຕົກໃນສະພາວະຂາດທິນ!

ລມຕ. ການເງິນ ເຜີຍ​ຄວາມ​ຫຍຸ້ງຍາກການ​​ເກັບ​ລາຍ​ຮັບ! ລັດວິສາຫະກິດການບິນລາວ – ETL ກຳລັງຕົກໃນສະພາວະຂາດທິນ!

Published on

lian thikeo

​ໃນ​ວາລະ​ກອງ​ປະຊຸມ​ສະ​ໄໝ​ສາມັນ​ເທື່ອ​ທີ່ IX ຂອງ​ສະພາ​ແຫ່ງ​ຊາດ​ຊຸດ​ທີ VII ​ເຊິ່ງ​ໄຂ​ຂຶ້ນມື້ທຳ​ອິດ​ໃນ​ຕອນ​ເຊົ້າວັນ​ທີ 1 ກໍລະກົດ 2015 ຢູ່​ນະຄອນຫລວງ​ວຽງ​ຈັນ, ທ່ານ ລຽນ ທິ​ແກ້ວ ລັດຖະມົນຕີ​ວ່າການ​ກະຊວງ​ການ​ເງິນ ​ໄດ້​ຂຶ້ນລາຍ​ງານ​ການຈັດຕັ້ງປະຕິບັດ​ແຜນ​ງົບປະມານ​ແຫ່ງ​ລັດ 6 ​ເດືອນ​ຕົ້ນສົກ​ປີ 2014-2015 ​ບັນດາ​ມາດ​ຕະການ​ເພື່ອ​ສູ້​ຊົນ​ປະຕິບັດ​ຄາດໝາຍ 6 ​ເດືອນ​ທ້າຍ ​ແລະ ທິດ​ທາງ​ແຜນງົບປະມານ​ແຫ່ງ​ລັດ ສົກ​ປີ 2015-2016,ຊຶ່ງ ທ່ານ​ລັດຖະມົນຕີ​ໄດ້​ຍົກ​ໃຫ້​ເຫັນ​ຈຸດ​ດີ,ຈຸດ​ອ່ອນ ​ແລະ ຂໍ້ຄົງຄ້າງ​ຢູ່​ໃນ​ຂະ​ແໜງ​ການ​ຂອງ​ຕົນ​ທີ່​ເກີດ​ຂຶ້ນ​ໃນ​ແຕ່ລະ​ຂົງ​ເຂດ.

ທ່ານ​ລັດຖະມົນຕີ​ ​​ຊີ້ບອກ​ວ່າ: ກະຊວງ​ການ​ເງິນ ​ໄດ້​ພະຍາຍາມ​ຈັດຕັ້ງປະຕິບັດ​ບັນດາ​ມາດ​ຕະການ​ໄລຍະ​ສັ້ນ, ​ໄລ ຍະ​ຍາວ​ທີ່​ໄດ້​ສະ​ເໜີ​ຕໍ່​ລັດຖະບານ ​ແລະ ສະພາ​ແຫ່ງ​ຊາດ, ​ແຕ່​ໃນ​ຕົວ​ຈິງ​ຫລາຍ​ຂະ​ແໜງ​ການ​ສູນ​ກາງ ​ແລະ ອົງການ​ປົກຄອງ​ທ້ອງ​ຖິ່ນ​ຍັງ​ບໍ່​ໄດ້​ປະສານ​ສົມທົບ ​ແລະ ​ໃຫ້ການ​ຮ່ວມ​ມື​ດີ​​ເທົ່າ​ທີ່​ຄວນ ​ເຊິ່ງສະ​ແດງ​ອອກ​ລາຍ​ຮັບ​ຊັບ​ສິນ, ຄ່າ​ຊັບພະຍາກອນ​ທຳ​ມະ​ຊາດ ​ແລະ ລາຍ​ຮັບ​ວິຊາ​ການ​ຈຳນວນ​ໜຶ່ງ​ບໍ່​ທັນ​ລວມສູນ​ເຂົ້າງົບປະມານ​ແຫ່ງ​ລັດ, ຈ່າຍ​*ນອກ​ແຜນ​ທີ່​ສະພາ​ແຫ່ງ​ຊາດ​ຮັບຮອງ, ຍົກ​ເວັ້ນພາສີອາກອນ​ນອກ​ກົດໝາຍ​ກຳນົດ, ການ​ນຳ​ເຂົ້າພາຫະນະ​ບໍ່​ຖືກຕ້ອງ​ຕາມ​ກົດໝາຍ​ຍັງ​ແຜ່​ຫລາຍ, ການ​ລັກລອບ​ໜີ້ພາສີ​ຍັງ​ບໍ່​ໄດ້​ຄຸ້ມ​ຄອງ​ຢ່າງ​ຮັດກຸມ, ລະດັບ​ຄວາມ​ສາມາດ​ກວດກາ ​ແລະ ຕິດຕາມ​ຈັດ​ເກັບ​ລາຍ​ຮັບ​ຈາກ​ວິ​ສາ​ຫະກິດ​ລົງທຶນ​ຕ່າງປະ​ເທດ ​ເປັນຕົ້ນຂະ​ແໜງ​ບໍ່​ແຮ່​ຂອງ​ລັດ​ເຮົາ​ຍັງ​ຈຳກັດ​ໃນ​ຫລາຍ​ດ້ານ. ​ເຖິງ​ວ່າ​ກະຊວງ​ການ​ເງິນ​ໄດ້​ປັບປຸງ​ກົນ​ໄກ​ການ​ດຸ່ນງົບປະມານ​ໃຫ້​ທ້ອງ​ຖິ່ນ​ໄດ້​ໄວ​ຂຶ້ນ ​ແລະ ສາມາດ​ປະຕິບັດ​ໄດ້​ຕາມ​ແຜນການ, ​ແຕ່​ສະພາບ​ການ​ເບີກ​ຈ່າຍ​ເງິນ​ເດືອນ​ຂອງ​ທ້ອງ​ຖິ່ນ​ທີ່​ຊັກ​ຊ້າຍັງ​ບໍ່​ສາມາດ​ແກ້​ໄຂ​ບັນຫາ​ທີ່​ຊ້ຳ​ເຮື້ອ​ແກ່ຍາວ​ມາ​ດົນ​ນານ​ໄດ້ ສາ​ເຫດ​ຍ້ອນ​ກົນ​ໄກ​ການ​ຢັ້ງຢືນ​ບັນຊີ​ຈຳນວນພົນ​ຂອງ​ບັນດາ​ຂະ​ແໜງ​ການ ​ແລະ ທ້ອງ​ຖິ່ນ​ຍັງ​ຊັກ​ຊ້າ, ກົນ​ໄກ​ການ​ປະສານ​ງານ​ລະຫວ່າງ​ຂັ້ນ​ແຂວງ​ຮອດ​ຂັ້ນ​ເມືອງ​ຍັງ​ບໍ່​ໄດ້​ຮັບ​ການ​ແກ້​ໄຂ. ອີກ​ສາ​ເຫດ​ໜຶ່ງ​ທີ່​ສຳຄັນ​ແມ່ນ​ຍ້ອນ​ການຈັດ​ເກັບ​ລາ​ຍຮັບ​ຂອງ​ທ້ອງ​ຖິ່ນ​ບໍ່​ສາມາດ​ປະຕິບັດ​ໄດ້​ຕາມ​ແຜນການ. ການ​ເຜີຍ​ແຜ່​ໂຄສະນາ​ບັນດາ​ລະບຽບ​ກົດໝາຍ​ໃຫ້​ແກ່​ສັງຄົມ​ເຂົ້າ​ໃຈ​ຍັງ​ເຮັດ​ບໍ່​ທັນ​ໄດ້​ດີ, ​ເຮັດ​ໃຫ້ການ​ຄຸ້ມ​ຄອງ​ການຈັດ​ເກັບ​ພົບ​ຄວາມ​ຫຍຸ້ງຍາກ, ການ​ນຳ​ໃຊ້​ລະບົບ​ທັນ​ສະ​ໄໝ​ເຂົ້າ​ໃນ​ການ​ຄຸ້ມ​ຄອງ​ເກັບ​ລາຍ​ຮັບ​ຍັງ​ຢູ່​ໃນ​ຂັ້ນຕອນ​ກະກຽມ ​ແລະ ລິ​ເລີ່​ມ ​ເຊິ່ງປັດຈຸບັນ​ນຳ​ໃຊ້​ມີ​ພຽງ​ແຕ່​ຢູ່​ກົມ ​ແລະ ບາງ​ແຂວງ​ໃຫຍ່​ເທົ່າ​ນັ້ນ. ການ​ເກັບ​ລາຍ​ຮັບ​ນຳ​ບັນດາ​ຫົວໜ່ວຍທຸລະ​ກິດ​ພົບ​ຄວາມ​ຫຍຸ້ງຍາກ ບໍ່​ສາມາດ​ເລັ່ງທວງ​ ຫລື ນຳ​ໃຊ້ມາດ​ຕະການ​ທາງ​ກົດໝາຍ​ຢ່າງ​ເດັດຂາດ​ໄດ້, ທ່ານລັດຖະມົນຕີ ກ່າວວ່າ:ສັງ​ລວມທົ່ວ​ປະ​ເທດ​ມີໜີ້ຄ້າງ​ມອບ ສະ​ເພາະ​ຂະ​ແໜງ​ອາກອນ​ມີ​ເຖິງ 400 ຕື້ກີບ ຫລື ປະມານ 4% ຂອງ​ແຜນ​ລາຍ​ຮັບ​ສ່ວຍສາ​ອາກອນ, ບັນດາ​ບໍລິສັດ ​ແລະ ກຸ່ມ​ບໍລິສັດ​ຂະໜາດ​ໃຫຍ່​ຈຳນວນ​ຫລວງຫລາຍ​ຍັງ​ຫລົບ​ຫລີກ​ການ​ເສຍ​ພັນທະ​ອາກອນ​ໃຫ້​ລັດ, ການ​ຍົກ​ເວັ້ນພາສີ​ອາກອນ​ໃນ​ໄລຍະ 6 ​ເດືອນ​ຕົ້ນປີ ມີ​ມູນ​ຄ່າ​ທັງ​ໝົດ 996 ຕື້ກີບ ​ເຊິ່ງ​ເປັນ​ການ​ຍົກ​ເວັ້ນຕາມ​ນະ​ໂຍບາຍ​ສົ່ງ​ເສີມ​ການ​ລົງທຶນ ​ແລະ ນະ​ໂຍບາຍ​ຂອງຂັ້ນ​ເທິງ, ບໍ່​ສາມາດ​ປະຕິບັດ​ການ​ເກັບ​ລາຍ​ຮັບ​ຈາກ​ໄມ້​ທີ່​ຂຶ້ນ​ແຜນ​ໄວ້ 100 ຕື້ກີບ ​ເນື່ອງ​ຈາກ​ວ່າ​ທ້ອງ​ຖິ່ນ​ໄດ້​ສະ​ເໜີ​ນຳ​ໃຊ້​ລາຍ​ຮັບ​ຈາກ​ໄມ້​ໄປ​ຊຳລະ​ໂຄງການ​ສະ​ເພາະ ​ໂດຍ​ບໍ່​ໄດ້​ຈົດ​ຮັບ-ຈົດ​ຈ່າຍ​ເຂົ້າ​ໃນ​ແຜນ​ງົບປະມານ, ລາຍ​ຮັບ​ຈາກ​ຂະ​ແໜງ​ຊັບພະຍາກອນ​ທຳ​ມະ​ຊາດ​ໄດ້​ຫລຸດ​ລົງ​ຢ່າງ​ຫລວງຫລາຍ ​ເນື່ອງ​ຈາກ​ລາຄາ​ແຮ່​ທາດ​ໃນ​ຕະຫລາດ​ໂລກ​ໄດ້​ຫລຸດ​ລົງ, ຖ້າ​ສົມ​ທຽບ​ກັບ​ຊຸມ​ຕົ້ນປີ​ຂອງ​ແຜນລາຍ​ຮັບ​ຈາກ​ຂະ​ແໜງ​ດັ່ງກ່າວ​ມີ​ຫລາຍ​ກວ່າ 1.600 ຕື້ກີບ​ຕໍ່​ປີ, ​ແຕ່​​ປັດຈຸບັນ​ໄດ້​ພຽງ​ແຕ່ 518 ຕື້ກີບຫລຸດ​ລົງ​ສອງ​ສ່ວນ​ສາມ,ສະ​ເພາະ​ບໍລິສັດ​ພູ​ເບ້ຍ​ມາຍ​ນິງ​ ​ໃນ​ສົກ​ປີ​ງົບປະມານ​ນີ້ບໍ່​ມີ​ອາກອນ​ກຳ​ໄລ ​ແລະ ​ເງິນ​ປັນ​ຜົນ​ມອບ​ໃຫ້​ລັດ ​ເນື່ອງ​ຈາກ​ບໍລິສັດ​ແຈ້ງ​ຫລຸບ​ທຶນ, ບັນດາ​ທຸລະ​ກິດ​ຂອງ​ລັດ ​ໂດ​ຍສະ​ເພາະ​ບັນດາ​ລັດ​ວິ​ສາ​ຫະກິດ​ກຳລັງ​ຢູ່​ໃນ​ສະພາວະ​ຂາດທຶນ ​ເປັນຕົ້ນບໍລິສັດ​ການບິນ​ລາວ, ບໍລິສັດ ETL, ບັນດາ​ທະນາຄານ​ຈຳນວນ​ຫລາຍ ບໍ່​ສາມາດ​ມອບ​ອາກອນ​ກຳ​ໄລ ​ແລະ ​ເງິນ​ປັນ​ຜົນ​ໃຫ້​ລັດ, ການ​ປັບປຸງ​ການຈັດຕັ້ງຂອງ​ຂະ​ແໜງ​ການ​ເງິນ​ຢູ່​ຂັ້ນສູນ​ກາງ ​ແລະ ທ້ອງ​ຖິ່ນ​ຍັງ​ມີ​ຄວາມ​ຊັກ​ຊ້າ​ບໍ່​ທັນ​ບັນລຸ​ໄດ້​ຕາມ​ຄາດໝາຍ​ຕາມ​ທິດ​ຊີ້ນຳ​ຂອງ​ຂັ້ນ​ເທິງ.

ສັງ​ລວມ​ແລ້ວ​ບັນດາ​ສາ​ເຫດ​ຕົ້ນຕໍ​ແມ່ນ​ພວກ​ເຮົາ​ບໍ່​ທັນ​ໄດ້​ຜັນ​ຂະຫຍາຍ​ຈັດຕັ້ງປະຕິບັດ​ດ້ວຍ​ຄວາມ​ຮັບຜິດຊອບ​ຕໍ່​ຄຳ​ສັ່ງ​ຂອງ​ນາຍົກ ສະບັ​ບ​ເລກທີ 14/ນຍ ປີ 2014 ກ່ຽວ​ກັບ​ມາດ​ຕະການ​ຮັກສາ​ສະຖຽນ​ລະ​ພາບ​ຂອງ​ເສດຖະກິດ​ມະ​ຫາ​ພາກ ​ເພື່ອ​ຊຸກຍູ້​ການ​ເຕີບ​ໃຫຍ່​ທີ່​ຕໍ່​ເນື່ອງ ​ແລະ ຍືນ​ຍົງ​ທີ່​ໄດ້​ກຳນົດ 3 ຄາດໝາຍ​ໃຫຍ່, 6 ກຸ່ມ​ມາດ​ຕະການ​ທີ່​ຈະ​ແຈ້ງ.ນາຍົກລັດຖະມົນຕີ​ຍັງ​ໄດ້​ມອບ​ໜ້າ​ທີ່​ໃຫ້ 6 ກະຊວງ​ເສດຖະກິ​ດຕົ້ນຕໍ ​ແລະ ບັນດາ​ຂະ​ແໜງ​ການ, ອົງການ​ສູນ​ກາງ, ຄະນະ​ພັກ, ອົງການ​ປົກຄອງທ້ອງ​ຖິ່ນ​ປະຕິບັດ​ສົມທົບ​ແໜ້ນ​ກັບ​ການ​ແກ້​ໄຂ 9 ຂອດ​ປະສານ​ງານ​ຕາ​ມມະຕິ​ກອງ​ປະຊຸມ​ລັດຖະບານ​ເປີດ​ກວ້າງ ປີ 2013. ນອກຈາກ​ນັ້ນ​ແລ້ວ ກໍ​ກຳນົດ​ແຈ້ງ​ກົນ​ໄກ​ໃນ​ການ​ປະຕິບັດ​ໃຫ້ 3 ຂັ້ນ ຄື​ຄະນະ​ຮັບ ຜິດຊອບ​ຕິດຕາມ​ເສດຖະກິດ​ມະຫາ​ພາກ ​ແລະ ຊີ້ນຳ​ການ​ເກັບ​ລາຍ​ຮັບ​ຂັ້ນລັດຖະບານ, ຄະນະ​ຮັບຜິດຊອບ​ຂັ້ນກະຊວງ, ອົງການ ​ແລະ ຄະນະ​ຮັບຜິດຊອບ​ຂັ້ນນະຄອນຫລວງ ​ແລະ ບັນດາ​ແຂວງ, ຖ້າ​ພວກ​ເຮົາ​ຫາກ​ຕັ້ງໜ້າ​ປະຕິບັດ​ກໍ​ຈະ​ເຮັດ​ໃຫ້​ຄວາມ​ຫຍຸ້ງຍາກ​ດ້ານ​ການ​ເງິນ​ຜ່ອນຄາຍ​ລົງ​ຫລາຍ​ກວ່າ​ນີ້.

ສຳລັບຜົນ​ການ​ເກັບ​ລາຍ​ຮັບ 6 ​ເດືອນ​ຕົ້ນປີ 2015 ທ່ານ​ລັດຖະມົນຕີ​ກະຊວງ​ການ​ເງິນ ​ໄດ້​ໃຫ້​ຄຳ​ຊີ້​ແຈ້ງວ່າ: ຜ່ານ​ການຈັດຕັ້ງປະຕິບັດ​ຈັດ​ເກັບ​ລາຍ​ຮັບ 6 ​ເດືອນ​ຕົ້ນປີ ສາມາດ​ປະຕິບັດ 12.021 ຕື້ກີບ ​ເທົ່າ​ກັບ 46,57% ຂອງ​ແຜນ ການ​ປີ, ສະ​ເພາະ​ລາຍ​ຮັບ​ພາຍ​ໃນ​ປະຕິບັດ​ໄດ້ 9.301 ຕື້ກີບ ​ເທົ່າ​ກັບ 45,29% ຂອງ​ແຜນການ​ປີ, ​ໃນ​ນັ້ນ ສູນ​ກາງກວມ 47,21% ​ແລະ ທ້ອງ​ຖິ່ນ 39% ຂອງ​ແຜນການ​ປີ. ການຈັດຕັ້ງປະຕິບັດ​ລາຍ​ຮັບ 9 ​ເດືອນ (ຮອດ​ວັນ​ທີ 26/6/2015) ບັນລຸ​ໄດ້ 17.320 ຕື້ກີບ ​ເທົ່າ​ກັບ 67,10% ຂອງ​ແຜນການ​ປີ, ສະ​ເພາະ​ລາຍ​ຮັບ​ພາຍ​ໃນ​ປະຕິບັດ​ໄດ້ 13.975 ຕື້ກີບ ​ເທົ່າ​ກັບ 68,05% ຂອງ​ແຜນການ​ປີ, ທຽບ​ໃສ່​ໄລຍະ​ດຽວ​ກັນ​ຂອງ​ສົກ​ປີຜ່ານມາ​ເພີ່ມ​ຂຶ້ນປະມານ 18%, ​ໃນ​ນັ້ນ ສູນ​ກາງປະຕິບັດ​ໄດ້ 71,19% ​ແລະ ທ້ອງ​ຖິ່ນ 57,71% ຂອງ​ແຜນການ​ປີ.

 

ແຫລ່ງຂ່າວ: ລາວພັດທະນາ

 

ບົດຄວາມຫຼ້າສຸດ

ນາຍົກລັດຖະມົນຕີລາວ ພົບປະກັບ ປະທານສະພາແຫ່ງຊາດຫວຽດນາມ ໃນໂອກາດເດີນທາງຢ້ຽມຢາມ ສສ ຫວຽດນາມ ແລະ ເຂົ້າຮ່ວມກອງປະຊຸມເວທີອະນາຄົດອາຊຽນ ຄັ້ງທີ 3

ໃນຕອນບ່າຍວັນທີ 8 ມິຖຸນາ 2026, ທີ່ ນະຄອນຫຼວງຮ່າໂນ້ຍ ສສ ຫວຽດນາມ, ສະຫາຍ ສອນໄຊ ສີພັນດອນ ກໍາມະການກົມການເມືອງສູນກາງພັກ, ນາຍົກລັດຖະມົນຕີ ແຫ່ງ...

ແຈ້ງການມອດໄຟຟ້າຊົ່ວຄາວ ລັດວິສາຫະກິດໄຟຟ້າລາວ ນວ 2 ໄດ້ອອກແຈ້ງການງົດຈ່າຍກະແສໄຟຟ້າຊົ່ວຄາວ ເລີ່ມແຕ່ວັນທີ 9-14 ມິຖຸນາ 2026

​ລັດວິສາຫະກິດໄຟຟ້າລາວ (EDL) ຝ່າຍຄຸ້ມຄອງລະບົບໄຟຟ້າພາກກາງ ສາຂານະຄອນຫຼວງວຽງຈັນ 2 ໄດ້ອອກແຈ້ງການງົດຈ່າຍກະແສໄຟຟ້າຊົ່ວຄາວ (ມອດໄຟ) ເພື່ອປັບປຸງ, ສ້ອມແປງລະບົບຕາໜ່າງໄຟຟ້າ ແລະ ຕິດຕັ້ງເສົາໄຟຟ້າໃໝ່ ໃຫ້ມີຄວາມປອດໄພ ແລະ ກຽມພ້ອມຮອງຮັບການຊົມໃຊ້ທີ່ດີຂຶ້ນ....

ກຽມໄປແຂ່ງຕໍ່ທີ່ຍີ່ປຸ່ນ MAZDA GB FC U12 ຄວ້າແຊ້ມ ບານເຕະເຍົາວະຊົນທີ່ອິນໂດເນເຊຍ ພ້ອມໄດ້ໄປແຂ່ງຕໍ່ຮອບສຸດທ້າຍທີ່ປະເທດຍີ່ປຸ່ນ

ເກັ່ງຫຼາຍ MAZDA GB FC ຢູ 12 ຄວ້າແຊ້ມບານເຕະເຍົາວະຊົນ ທີ່ອິນໂດເນເຊຍ ພ້ອມໄດ້ສິດບິນລັດຟ້າໄປແຂ່ງຂັນທີ່ປະເທດຍີ່ປຸ່ນ. ນ້ອງໆເຍົາວະຊົນຈາກສະໂມສອນ Mazda Laos GB FC ໂຊຊຟອງເກັ່ງຄວ້າແຊ້ມລາຍການແຂ່ງຂັນບານເຕະເຍົາວະຊົນລະດັບພາກພື້ນ...

ນາຍົກລັດຖະມົນຕີລາວ ສົ່ງຈົດໝາຍເຖິງນາຍົກລັດຖະມົນຕີໄທ ເພື່ອສະແດງຄວາມຂອບໃຈຕໍ່ການຊ່ວຍເຫຼືອຄົ້ນຫາ ແລະ ກອບກູ້ເອົາຊິວິດປະຊາຊົນທີ່ຕິດຄ້າງຢູ່ໃນຖໍ້າ

ວັນທີ 7 ມິຖຸນາ 2026 ທີ່ນະຄອນຫຼວງວຽງຈັນ, ທ່ານ ສອນໄຊ ສີພັນດອນ ນາຍົກລັດຖະມົນຕີລາວ ໄດ້ສົ່ງຈົດໝາຍຂອບໃຈເຖິງທ່ານ ອະນຸທິນ ຊານວີຣະກູນ, ນາຍົກລັດຖະມົນຕີ ແຫ່ງ...