ທ່ານ ເດດສົງຄາມ ທຳມະວົງ ຫົວໜ້າພະແນກໂຍທາທິການ ແລະ ຂົນສົ່ງ ນະຄອນຫຼວງວຽງຈັນ ໄດ້ກ່າວວ່າ: ໂຄງການກໍ່ສ້າງຮ່ອງລະບາຍນ້ຳ ແລະ ສະຖານີສູບນ້ຳເຂດດອນຈັນ ແມ່ນໂຄງ ການບູລິມະສິດຂອງລັດຖະບານລາວ ກໍຄືນະຄອນຫຼວງວຽງຈັນ ເພື່ອກຽມຮັບໃຊ້ກອງປະຊຸມສຸດຍອດອາຊີ-ເອີຣົບ ຄັ້ງທີ 9 ເປັນການປ້ອງກັນນ້ຳຖ້ວມດອນຈັນ ແລະ ການກໍ່ສ້າງສວນສາທາລະນະໃນຂອບເຂດຂອງໂຄງການໃຫ້ສວຍງາມ. ໂຄງການນີ້ມີຄວາມຍາວທັງໝົດ 2.332 ແມັດ ແລະ ກວ້າງ 23 ແມັດ (ລວມທາງຍ່າງ 2 ຝາກຂ້າງ) ພື້ນທີ່ໂຄງການກວມເອົາ 5 ບ້ານທີ່ລຽບເຂດດອນຈັນ ຄື:ບ້ານເກົ້າຍອດເພຍວັດ ທາດຂາວ ບຶງຂະຫຍອງ ແລະ ບ້ານວັດນາກ ເມືອງສີສັດຕະນາກ ໂຄງການດັ່ງກ່າວປະກອບມີສະຖານີສູບນ້ຳ ໄດ້ຕິດຕັ້ງປ້ຳສູບນ້ຳ 5 ໜ່ວຍ ສາມາດລະບາຍນ້ຳໄດ້ 21,5 ແມັດກ້ອນຕໍ່ວິນາທີ ມີການປັບປຸງສວນສາທາລະນະ ປູກຫຍ້າ ປູກຕົ້ນໄມ້ ໄມ້ດອກ ໄມ້ປະດັບ ມີຫ້ອງນ້ຳສາທາລະນະ 1 ແຫ່ງ ບ່ອນເດັກນ້ອຍຫຼິ້ນ 1 ບ່ອນ ມີຂົວຂ້າມຮ່ອງ 2 ຈຸດ ມີສາລາພັກຜ່ອນ 5 ຈຸດ ມີລະບົບໄຟຟ້າ-ນ້ຳປະປາ ລວມທັງຖັງຂີ້ເຫຍື້ອ ບ່ອນຈອດລົດ 3 ບ່ອນ ແລະ ສິ່ງອຳນວຍຄວາມສະດວກອື່ນໆ ລວມມູນຄ່າໂຄງການທັງໝົດ 25.000.000 ໂດລາສະຫະລັດ ເປັນເງິນກູ້ຢືມດອກເບຍຕ່ຳຈາກທະນາຄານ EXIM BANK ຂອງ ສປ ຈີນ ໂດຍແມ່ນບໍລິສັດ ແຄມຊີ ວິສະວະກຳ ສປ ຈີນ ຈຳກັດ ເປັນຜູ້ກໍ່ສ້າງ. ໄດ້ເລີ່ມລົງມືກໍ່ສ້າງມາແຕ່ຕົ້ົນເດືອນມີນາ 2012 ມາເຖິງປັດຈຸບັນສຳເລັດ 100% ໄດ້ຈັດພິທີ ມອບ-ຮັບໂຄງການໃນວັນທີ 21 ມີນາ 2013 ທີ່ຜ່ານມາ ທີ່ສະຖານີສູບນ້ຳໂຄງການ (ເຂດດອນຈັນ) ໂດຍມີບັນດາທ່ານການນຳຈາກນະຄອນຫຼວງວຽງຈັນ ບັນດາທ່ານລັດຖະມົນຕີຊ່ວຍວ່າການ ຜູ້ຕາງໜ້າຈາກສະຖານທູດ ແຫ່ງ ສປ ຈີນ ປະຈຳລາວ ແຂກຖືກເຊີນ ແລະ ພາກສ່ວນກ່ຽວຂ້ອງເຂົ້າຮວມ.
ທີ່ມາhttp://www.vientianemai.net