ການແຂ່ງຂັນເຕະບານຊີງແຊhມແຫ່ງທະວີບອາເມລິກາ ຫຼື ໂຄປາ ອາເມລິກາ 2015 ທີ່ປະເທດ ຊິລີ ເປັນເຈົ້າພາບ ເມື່ອວັນທີ 30 ມິຖຸນາ ຜ່ານມາ ຮອບຮອງຊະນະເລີດ ຫຼື ຮອບ 4 ທີມສຸດທ້າຍ ທີ່ສະໜາມ ເອັສຕາດິໂອ ນະຄອນຊານຕິອາໂກ ປະເທດຊິລີ ລະຫວ່າງທີມຊາດອາເຈນຕິນາ ອະດີດແຊ້ມ 14 ສະໄໝ ພົບກັບ ປາຣາໄກວ ອະດີດແຊ້ມ 2 ສະໄໝ ທັງເປັນຮອງແຊ້ມເກົ່າ, ເຊິ່ງໃນຮອບ 8 ທີມ ອາເຈນຕິນາ ເອົາຊະນະ ໂຄລອມເບຍ ໃນການຍິງຈຸດໂທດ 5-4 ຂະນະທີ່ ປາຣາໄກວ ເອົາຊະນະ ບຣາຊິລ ດ້ວຍການຍິງຈຸດໂທດ ເຊັ່ນດຽວກັນ.
ຜ່ານການແຂ່ງຂັນປະກົດວ່າ ອາເຈນຕິນາ ຄືນຟອມ ດ້ວຍການຖະຫຼົ່ມ ປາຣາໄກວ ໄປເຖິງ 6-1 ໂດຍໄດ້ປະຕູຈາກ ມາກອສ ໂຣໂຮ ນາທີ 15, ຮາເວຍ ປາສຕໍເຣ ນາທີ 27, ອັງເຄລ ດິມາເຣຍ ນາທີ 47 ກັບ 53, ເຊຄິໂອ ອະເກວໂຣ ນາທີ 80 ແລະ ກອນຊາໂລ ອິກວາອິນ ນາທີ 83 ສ່ວນ ລິໂອເນລ ເມສຊີ ເຖິງແມ່ນວ່າຍິງບໍ່ໄດ້ ແຕ່ກໍ່ຈ່າຍໃຫ້ໝູ່ຍິງ ເຖິງ 3 ປະຕູ ຂະນະທີ່ ປາຣາໄກວ ໄດ້ປະຕູຕີໄຂແຕກຈາກ ລູຄັສ ບາຣິອອສ ນາທີ 43. ສົ່ງຜົນໃຫ້ ອາເຈນຕິນາ ຜ່ານເຂົ້າສູ່ຮອບຊີງຊະນະເລີດ ພ້ອມລຸ້ນແຊ້ມສະໄໝທຳອິດ ນັບແຕ່ປີ 1993 ໂດຍຈະພົບກັບ ຊິລີ ເຈົ້າພາບ ໃນວັນທີ 5 ກໍລະກົດນີ້ ຖ້າຫາກຊະນະ ຈະເປັນການໄດ້ແຊ້ມ ໂຄປາ ອາເມລິກາ 15 ສະໄໝ ເທົ່າກັບ ອຸຣຸໄກວ.