ສຳນັກຂ່າວຕ່າງປະເທດ ລາຍງານໃນວັນທີ 1​ ກໍລະກົດນີ້ວ່າ ສະຫະລັດອາເມຣິກາ ແລະ ກູບາ ໄດ້ບັນລຸຂໍ້ຕົກລົງເປີດສະຖານທູດ ໃນນະຄອນຫລວງວໍຊິງຕັນ ດີຊີ ແລະ ນະຄອນຫລວງຮາວານາ ເຊິ່ງເປັນເຫດການອັນສຳຄັນ ຢຸດຕິຄວາມບາດໝາງລະຫວ່າງ 2 ປະເທດ ທີ່ກິນເວລາຍາວນານຫລາຍສິບປີ ນັບຕັ້ງແຕ່ຍຸກສົງຄາມເຢັນ ເມື່ອສະຫະລັດອາເມຣິກາ ດຳເນີນມາດຕະການຂວ້ຳບາດຕໍ່ກູບາເປັນຕົ້ນມາ ແລະ ໄດ້ມີການປະກາດຢຸດຕິການຂວ້ຳບາດ ແລ້ວຮື້ຟື້ນຄວາມສຳພັນກັບກູບາຄືນໃໝ່ ເມື່ອເດືອນທັນວາປີ 2014 ພ້ອມກັນນັ້ນ ແຫລ່ງຂ່າວຍັງລະບຸອີກວ່າ ທຳນຽບຂາວຂອງສະຫະລັດອາເມຣິກາ ໄດ້ລະບຸເຖິງຄວາມເປັນໄປໄດ້ກ່ຽວກັບ ທ່ານປະທານາທິບໍດີ ບາຣັກ ໂອບາມາ ແຫ່ງສະຫະລັດອາເມຣິກາ ຈະເດີນທາງໄປຢ້ຽມຢາມປະເທດກູບາ ກ່ອນຈະໝົດວາລະບໍລິຫານປະເທດ ໃນປີ 2017 ທີ່ຈະມາເຖິງນີ້ອີກດ້ວຍ.