ຕອນຄ່ຳຂອງວັນທີ 30 ມິຖຸນາ 2015 ນີ້ ພາຍຫຼັງຂ່າວເລື່ອງການປິດເລກລີງແລະນາກນ້ຳແລ້ວ ຕໍ່ມາກໍມີຂ່າວເລື່ອງເລກອອກວ່າແມ່ນ ເລກນາກນ້ຳແທ້ໆ ແລະບໍ່ພໍທໍ່ໃດນາທີ ກໍມີຜູ້ໂພສຮູບເຊັກເລກລົງໃນເຟສບຸກ ສະແດງໃຫ້ເຫັນວ່າຍັງມີຜູ້ຖືກເລກນາກຢູ່ ແລະເປັນການສວນທາງກັບຂ່າວລືທີ່ວ່າ ທາງຫວຍພັດທະນາປິດບໍ່ຈຳໜ່າຍ ເລກລີງແລະເລກນາກນ້ຳ.
ແນວໃດກໍຕາມ ກໍມີຜູ້ສັງເກດເຫັນວ່າ ໃບເຊັກເລກທີ່ຜູ້ຖ່າຍຮູບລົງວ່າຖືກເລກນັ້ນ ມີເລກທີ່ລຽງລຳດັບກັນ ອັນເປັນທີ່ໜ້າສົງໄສວ່າ ເປັນຫຍັງຊື້ເລກໂຕດຽວກັນ ແຕ່ຕ້ອງຊື້ຫຼາຍໃບຂະໜາດນັ້ນ ເພາະເຊັກເລກດັ່ງກ່າວນັ້ນ ເປັນເຊັກເລກທີ່ລຽງລຳດັບ ໃນຫົວໃບເລກດຽວກັນ ແລະຜູ້ສັງເກດສົງໄສວ່າ ຈະເປັນການສ້າງກະແສວ່າ ມີຜູ້ຖືກເລກນາກນ້ຳ ເພື່ອຕອບໂຕ້ກະແສຂ່າວທີ່ວ່າ ບໍ່ຂາຍເລກນາກນ້ຳ. ອີກສິ່ງໜຶ່ງທີ່ໜ້າສັງເກດອີກອັນໜຶ່ງຄື ຜູ້ຊື້ເລກຊື້ເປັນເງິນບາດໃນຫຼັກໝື່ນບາດ ເຊິ່ງເປັນທີ່ໜ້າສົນໃຈວ່າ ຖ້າຫາກຖືກແທ້ໆ ຄົງຈະໄດ້ຮັບເງິນລາງວັນຈຳນວນມະຫາສານ ເຊິ່ງເປັນໄປໄດ້ຍາກທີ່ຜູ້ຂາຍຈະຂາຍ ຈຳນວນຫຼາຍຂະໜາດນີ້.
ໃນຂະນະທີ່ຂ່າວບອກວ່າ ຫຼາຍໜ່ວຍບໍລິການກໍບໍ່ໄດ້ປິດກັ້ນການ ຊື້ເລກລີງແລະເລກນາກນ້ຳແຕ່ຢ່າງໃດ ອາດຈະມີພຽງບາງໜ່ວຍບໍລິການເທົ່ານັ້ນ ທີ່ມີຜູ້ກວາດຊື້ເລກດັ່ງກ່າວ ຈົນເຕັມອັດຕາ ກ່ອນຈະເຖິງເວລາອອກວາງຂາຍກໍໄດ້. ດັ່ງນັ້ນ, ຈຶ່ງຍັງບໍ່ເປັນຂ່າວທີ່ຊັດເຈນເທື່ອ ຂໍໃຫ້ທ່ານຜູ້ອ່ານຕິດຕາມຂ່າວຕໍ່ໄປ ໂດຍສະເພາະແມ່ນໃຫ້ລໍຖ້າ ການອອກມາຖະແຫຼງຂ່າວຂອງພາກສ່ວນ ທີ່ກ່ຽວຂ້ອງໃນໄວໆນີ້ກໍໄດ້.