ການ​ເກີດ​ອຸບັດເຫດ​ຕາມ​ທ້ອງ​ຖະໜົນ​ທົ່ວ​ນະຄອນຫຼວງ​ວຽງ​ຈັນ ລະຫວ່າງ​ວັນ​ທີ 11-17 ມີນາ 2013 ທີ່​ຜ່ານ​ມາ ເກີດ​ຂຶ້ນ 33 ກໍລະນີ ເຮັດ​ໃຫ້​ມີ​ຜູ້​ເສຍ​ຊີວິດ 6 ຄົນ ຫຼຸດ​ລົງ​ຈາກ​ອາທິດ​ກ່ອນ 1 ຄົນ ລວມ​ມູນ​ຄ່າ​ຄວາມ​ເສຍ​ຫາຍ​ທັງ​ໝົດ 544 ລ້ານ​ກວ່າ​ກີບ.

ຈາກ​ອຸບັດເຫດ​ໃນ​ແຕ່​ລະ​ຄັ້ງ ເຮັດ​ໃຫ້​ມີ​ຜູ້​ບາດເຈັບ​ເລັກ​ນ້ອຍ 17 ຄົນ ສົມຄວນ 21 ຄົນ ສາຫັດ 8 ຄົນ ແລະ ເສຍ​ຊີວິດ 6 ຄົນ ຜົນ​ເສຍ​ຫາຍ​ທາງ​ດ້ານ​ພາຫະນະ​ເປ່​ເພ​ເລັກ​ນ້ອຍ 32 ຄັນ ສົມຄວນ 33 ຄັນ ໃຊ້​ການ​ບໍ່​ໄດ້ 1 ຄັນ ເຊິ່ງ​ອຸບັດເຫດ​ສ່ວນ​ໃຫຍ່ ແມ່ນ​ເກີດ​ຢູ່​ໃນ​ກຸ່ມ​ອາຊີບ​ກຳມະກອນ ຮອງ​ມາ​ພະນັກງານ ສຳລັບ​ປະເພດ​ຄົນ​ບາດເຈັບ ແລະ ເສຍ​ຊີວິດ ຄົນ​ຂັບ​ບາດເຈັບ​ເລັກ​ນ້ອຍ 15 ຄົນ ສົມຄວນ 18 ຄົນ ສາຫັດ 7 ຄົນ ເສຍ​ຊີວິດ 4 ຄົນ ຜູ້​ຊ້ອນ​ທ້າຍ​ບາດເຈັບ​ເລັກ​ນ້ອຍ 2 ຄົນ ສົມຄວນ 2 ຄົນ ສາຫັດ 1 ຄົນ ເສຍ​ຊີວິດ 1 ຄົນ ແລະ ຄົນ​ຍ່າງ 1 ຄົນ.

ເມືອງ​ທີ່​ເກີດ​ອຸບັດເຫດ​ໄດ້ແກ່ ເມືອງ​ຈັນທະ​ບູ​ລີ 3 ຄັ້ງ ສີ​ໂຄດ​ຕະບອງ 5 ຄັ້ງ ສີ​ສັດຕະ​ນາກ 5 ຄັ້ງ ໄຊ​ເຊດ​ຖາ 7 ຄັ້ງ ຫາດ​ຊາຍ​ຟອງ 2 ຄັ້ງ ໄຊ​ທານີ 9 ຄັ້ງ ນາ​ຊາຍ​ທອງ 2 ຄັ້ງ ປະເພດ​ພາຫະນະ​ທີ່​ເກີດ​ອຸບັດເຫດ​ລົດຈັກ 40 ຄັນ ລົດ​ເບົາ 22 ຄັນ ລົດ​ບັນທຸກ​ໜັກ 3 ຄັນ ສາຍ​ທາງ​ທີ່​ເກີດ​ອຸບັດເຫດ​ຫຼາຍ​ກວ່າ​ໝູ່​ແມ່ນ​ຖະໜົນ 13 ໃຕ້ ເວລາ​ທີ່​ມັກ​ເກີດ​ເຫດ​ແມ່ນ​ເລີ່ມ​ແຕ່​ເວລາ 16:00 ໂມງ ຫາ 23:00 ໂມງ.

ສາຍເຫດ​ຫຼັກ​ຂອງ​ການ​ເກີດ​ອຸບັດເຫດ​ໃນ​ແຕ່​ລະ​ຄັ້ງ ທີ່​ເຮັດ​ໃຫ້​ມີ​ຜູ້​ໄດ້​ຮັບ​ບາດເຈັບ ແລະ ເສຍ​ຊີວິດ ກໍ​ຍ້ອນ​ຜູ້​ທີ່​ໃຊ້​ລົດ​ໃຊ້​ຖະໜົນ ຍັງ​ລະເມີດ​ຕໍ່​ກົດ​ລະບຽບ​ຈະລາຈອນ ບໍ່​ໃສ່​ໝວກ​ກັນ​ກະທົບ ໃຊ້​ຄວາມ​ໄວ​ເກີນ​ກຳນົດ ບໍ່​ໃຫ້​ກຽດ​ເຊິ່ງ​ກັນ ແລະ ກັນ ມີ​ຄວາມ​ປະ​ມາດ ເມົາ​ແລ້ວ​ຂັບ ບວກ​ກັບ​ສະພາບ​ເສັ້ນທາງ​ເປັນ​ຂຸມ​ເປັນ​ບໍ່ ແລະ ບາງ​ສາຍ​ມີ​ການ​ສ້ອມແປງ ຍິ່ງ​ເຮັດ​ໃຫ້ການ​ສັນຈອນ​ມີ​ຄວາມ​ສັບສົນ ການ​ເກີດ​ອຸບັດເຫດ​ໃນ​ແຕ່​ລະ​ຄັ້ງ​ມັນ​ໄດ້​ສົ່ງ​ຜົນ​ເສຍ​ຫາຍ​ທາງ​ດ້ານ​ຊີວິດ ວັດຖຸ ຈິດໃຈ ແລະ ອື່ນໆ.

ຂໍ້​ມູນ​ດັ່ງກ່າວ ແມ່ນ​ອີງ​ຕາມ​ບົດ​ສະຫຼຸບ​ການ​ເກີດ​ອຸບັດເຫດ​ຕາມ​ທ້ອງ​ຖະໜົນ​ປະຈຳ​ອາທິດ ຂອງ​ພະ​ແນກ​ຈະລາຈອນ​ນະຄອນຫຼວງ​ວຽງ​ຈັນ.

ທີ່ມາhttp://www.vientianemai.net