ທ່ານນາງ ວີປະສົງ ສຸວັນນະວົງ ປະທານໜ່ວຍສະຫະພັນແມ່ຍິງ ໄດ້ຂຶ້ນລາຍງານການເຄື່ອນໄຫວຈັດຕັ້ງປະຕິບັດໃນໄລຍະ 3 ປີ ຜ່ານມາວ່າ: ໄດ້ມີການເຄື່ອນໄຫວກິດຈະກຳໃນຂົງເຂດກະຊວງ ຖວທ ແລະ ກະຊວງອ້ອມຂ້າງ, ໄດ້ເຂົ້າຮ່ວມຝຶກອົບຮົມແລກປ່ຽນບົດຮຽນໃນບັນດາຫົວຂໍ້ຕ່າງໆ ຢູ່ພາຍໃນ ແລະ ຕ່າງປະເທດ, ຍົກລະດັບດ້ານພາສາຕ່າງປະເທດ, ຍົກລະດັບທິດສະດີການເມືອງ 45 ວັນ, ປະດິດບົດຟ້ອນຮັບໃຊ້ໃນວັນສຳຄັນ ແລະ ອື່ນໆ ສ່ວນທິດທາງແຜນການໃນຕໍ່ໜ້າ ຕ້ອງເອົາໃຈໃສ່ສຶກສາອົບຮົມການເມືອງແນວຄິດ ໃຫ້ຖັນແຖວແມ່ຍິງ ໃນຂົງເຂດຕົນຮັບຜິດຊອບໃຫ້ມີຄວາມເຊື່ອໝັ້ນ ເຊື່ອມຊຶມຕໍ່ແນວທາງ ແລະ ການນຳພາຂອງພັກ, ປັບປຸງແບບແຜນວິທີນຳພາ, ການເຄື່ອນໄຫວວຽກງານຂອງໜ່ວຍສະຫະພັນແມ່ຍິງ ໃຫ້ມີການເຄື່ອນໄຫວຖືກຕ້ອງແທດເໝາະຕົວຈິງ, ສາມາດປະຕິບັດບົດບາດ ເປັນຕົວແທນໃຫ້ແມ່ຍິງ ແລະ ເດັກນ້ອຍ ກໍ່ສ້າງບຳລຸງພະນັກງານເພດຍິງ ໃຫ້ສົມຄູ່ກັບຄວາມຮຽກຮ້ອງຕ້ອງການຂອງໜ້າທີ່ວຽກງານທີ່ຖືກມອບໝາຍ.
ກອງປະຊຸມ ໄດ້ປ່ອນບັດຄັດເລືອກເອົາປະທານສະຫະພັນແມ່ຍິງຊຸດໃໝ່ ເຊິ່ງມີຜູ້ສະໝັກທັງໝົດ 5 ຄົນ ເລືອກເອົາ 3 ຄົນ ຄື: ທ່ານນາງ ພູນນິວັດ ດວງດາລາ ເປັນປະທານສະຫະພັນແມ່ຍິງ , ທ່ານນາງ ນຸດ ພຸດທະວົງສາ ເປັນຮອງປະທານ ແລະ ທ່ານນາງ ເຮືອງ ສີວິໄລ ເປັນຄະນະ.
ຂອບໃຈຂ່າວຈາກ: http://www.kpl.gov.la/