ສຳນັກຂ່າວຕ່າງປະເທດ ລາຍງານວ່າ ໃນມື້ນີ້ (29 ມິຖຸນາ) ບັນດາຜູ້ແທນຈາກ 57 ປະເທດສະມາຊິກ ຮ່ວມກໍ່ຕັ້ງທະນາຄານເພື່ອການລົງທຶນໂຄງສ້າງພື້ນຖານອາຊີ (Asian Infrastructure Investment Bank – AIIB) ໄດ້ເຂົ້າຮ່ວມໃນພິທີລົງນາມ ຮັບຮອງເອົາທຳມະນູນຂອງທະນາຄານ ເຊິ່ງຈັດຂຶ້ນທີ່ນະຄອນຫລວງປັກກິ່ງ ສາທາລະນະລັດປະຊາຊົນຈີນ ເຊິ່ງໃນນັ້ນມີ 50 ປະເທດໄດ້ລົງນາມຮັບຮອງຢ່າງເປັນທາງການແລ້ວ ສ່ວນຍັງເຫລືອອີກ 7 ປະເທດ ແມ່ນລໍຖ້າການອະນຸມັດຈາກລັດຖະສະພາຂອງຕົນເອງ ເຊິ່ງປະກອບມີ ແດນມາກ, ກູເວດ, ມາເລເຊຍ, ຟິລິບປິນ, ໂຮນລັງ, ອາຟຣິກາໃຕ້ ແລະ ປະເທດໄທ.
ທັງນີ້ ທຳມະນູນຂອງທະນາການ AIIB ແມ່ນເປັນນິຕິກຳລວມ ເຊິ່ງກຳນົດຫລັກການຖື້ນຖານ ວ່າດ້ວຍການກໍ່ຕັ້ງ ແລະ ທິດທາງການບໍລິຫານງານຂອງ ສະຖາບັນການເງິນສາກົນແຫ່ງນີ້ ເຊິ່ງເປັນໝາກຜົນທີ່ໄດ້ຈາກການເຈລະຈາລະຫວ່າງປະເທດຜູ້ກໍ່ຕັ້ງ ເປັນເວລາດົນເຖິງ 6 ເດືອນ.
ລັດຖະບານ ແຫ່ງ ສປ ຈີນ ປະກາດສະໜັບສະໜູນເງິນແກ່ AIIB ທັງໝົດ 2,978 ລ້ານໂດລາ ຈາກທຶນເລີ່ມຕົ້ນຂອງທະນາຄານແຫ່ງດັ່ງກ່າວ ຈຳນວນທັງໝົດ 100,000 ລ້ານໂດລາ ເຮັດໃຫ້ຈີນກາຍເປັນຜູ້ຖືຮຸ້ນລາຍໃຫຍ່ ກວມອັດຕາສ່ວນ 30.34% ໂດຍຜູ້ຖືຮຸ້ນລາຍໃຫຍ່ຖັດລົງມາ ໄດ້ແກ່ອິນເດຍ ຕາມມາດ້ວຍຣັດເຊຍ ແລະ ເຢຍລະມັນ.
ທະນາຄານ AIIB ຈະນຳໃຊ້ພາສາອັງກິດເປັນພາສາກາງໃນການດຳເນີນງານ ແລະ ມີສຳນັກງານໃຫຍ່ຕັ້ງຢູ່ນະຄອນຫລວງປັກກິ່ງ ສປ ຈີນ ພ້ອມທັງມີແຜນທີ່ຈະເປີດສຳນັກງານລະດັບພາກພື້ນ ໃນປະເທດອື່ນໆອີກດ້ວຍ.
