ສຳນັກຂ່າວຕ່າງປະເທດ ລາຍງານໃນວັນທີ 29 ມິຖຸນານີ້ວ່າ ປະຊາຊົນຊາວເກຣັກ ໄດ້ເກີດຄວາມແຕກຕື່ນພາກັນໄປຖອນເງິນຈາກຕູ້ເອທີເອັມຢ່າງແຜ່ຫລາຍ ນັບຕັ້ງແຕ່ນາຍົກລັດຖະມົນຕີ ອະເລັກຊິດ ຊີປຣາດ ປະກາດວ່າ ລັດຖະສະພາມີມະຕິເຫັນດີໃຫ້ມີການລົງປະຊາມະຕິ ກ່ຽວກັບໂຄງການຟື້ນຟູເສດຖະກິດ ເນື່ອງຈາກເກຣັກບໍ່ສາມາດບັນລຸຂໍ້ຕົກລົງກັບບັນດາປະເທດເຈົ້າໜີ້ໄດ້ ໂດຍ ທ່ານ ສະຕາຟຣອດ ໂຄຄອດ ປະທານສະຫະພັນກຳມະບານທະນາຄານ ໄດ້ເປີດເຜີຍວ່າ ນັບຕັ້ງແຕ່ມື້ວັນເສົາ (27 ມິຖຸນາ) ມີເງິນສົດຖືກຖອນອອກໄປແລ້ວ ປະມານ 1,3 ຕື້ເອີໂຣ ໂດຍແຫລ່ງຂ່າວເປີດເຜີຍວ່າ ທົ່ວປະເທດມີຕູ້ເອທີເອັມຢູ່ພຽງແຕ່ 40% ໃຫ້ສາມາດຖອນເງິນສົດອອກໄດ້ ເນື່ອງຈາກມີເງິນຖືກຖອນອອກໄປຫລາຍ  ເຮັດໃຫ້ພະນັກງານທະນາຄານໄປຕື່ມເງິນເຂົ້າບໍ່ທັນກັບຄວາມຕ້ອງການຂອງປະຊາຊົນ.