ອີງຕາມການລາຍງານຂ່າວຈາກ ສື່ສັງຄົມອອນລາຍຕອນແລງມື້ນີ ວັນທີ 26 ມິຖຸນາ 2015 ເວລາ 13:45 ນາທີ ໄດ້ມີສຽງດັງລະເບີດແຕກຢູ່ເທິ່ງຟ້າທົ່ວ ເມືອງເຊໂປນ ແຂວງສະຫວັນນະເຂດ ແລະອີກ 15 ນາທີ, ໄດ້ມີສິ້ນສ່ວນບາງຢ່າງ ທີ່ມີລັກສະນະເປັນແຜ່ນໂລຫະ ຄ້າຍຄືສ່ວນປະກອບຂອງເຄື່ອງຈັກ ບາງຊິ້ນສ່ວນມີລັກສະນະເປັນແຂ້ວ ຕົກລົງມາທາງຫຼັງເຮືອນປະຊາຊົນ ທີ່ບ້ານເມືອງແສນແລະບ້ານແກ້ງກີ ເມືອງເຊໂປນ ແຂວງສະຫວັນນະເຂດ ເຊິ່ງລະຫວ່າງບ້ານເມືອງແສນ ແລະບ້ານແກ້ງກີໄກກັນທາງນ້ຳແມ່ນປະມານ 10 ກິໂລແມັດ ຫຼືຖ້າໄປທາງລົດແມ່ນໄກກັນ 25 ກິໂລແມັດ. ເຫດການດັ່ງກ່າວ ສ້າງຄວາມງຸນງົງແກ່ປະຊາຊົນ ບ້າງກໍວ່າອາດຈະເປັນຍານອະວະກາດ ບ້າງກໍວ່າເປັນຍານຂອງມະນຸດຕ່າງດາວ (UFO). ສ່ວນຂໍ້ມູນຄວາມຈິງແທ້ໆ ເຈົ້າໜ້າທີ່ທາງການແຂວງສະຫວັນນະເຂດ ກໍຍັງບໍ່ສາມາດໃຫ້ຄຳຕອບໄດ້ວ່າແມ່ນຫຍັງ ກັນແທ້ ແລະກຳລັງສຶກສາຄົ້ນຄວ້າຢູ່ວ່າ ແມ່ນຫຍັງກັນແທ້.
