ໃນວັນທີ 26 ມິຖຸນານີ້, ທ່ານ ສົມພັນ ແພງຄຳມີ ຮອງປະທານສະພາແຫ່ງຊາດ, ໄດ້ຖະແຫລງຂ່າວຕໍ່ສື່ມວນຊົນວ່າ: ກອງປະຊຸມສະໄໝສາມັນ ເທື່ອທີ 9 ຂອງສະພາແຫ່ງຊາດຊຸດທີ VII ຈະໄດ້ຈັດຂຶ້ນໃນວັນທີ 1-21 ກໍລະກົດ 2015 ນີ້, ຢູ່ຫໍປະຊຸມແຫ່ງຊາດ ນະຄອນຫລວງວຽງຈັນ ເພື່ອຮັບຟັງການລາຍງານຂອງລັດຖະ ບານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ແລະ ນະໂຍບາຍເງິນຕາປະຈຳສົກປີ 2014-2015 ແລະ ທິດທາງແຜນການສົກ 2015-2016, ພ້ອມນີ້ ຍັງຈະໄດ້ພິຈາລະນາການສະເໜີແຕ່ງຕັ້ງ ສະມາຊິກລັດ ຖະບານໃໝ່ຈຳນວນໜຶ່ງ ຕາມການສະເໜີຂອງນາຍົກລັດຖະມົນຕີ ແລະ ຮັບຟັງລາຍງານກ່ຽວກັບການເຄື່ອນໄຫວວຽກງານຂອງອົງການກວດສອບແຫ່ງລັດ ປະຈຳປີ 2014-2015 ແລະ ທິດທາງແຜນການປະຈຳສົກປີ 2015-2016, ຜົນການກວດສອບຄືນຕາມມະຕິຂອງສະພາແຫ່ງຊາດ ແລະ ຮັບຟັງລາຍງານຂອງ
ອົງການກວດກາລັດຖະບານ ກ່ຽວກັບການຕິດຕາມກວດກາຜົນການກວດສອບຕາມມະຕິຂອງສະພາແຫ່ງຊາດ, ຮັບຟັງລາຍງານຂອງອົງການໄອຍະການປະຊາຊົນສູງສຸດ, ສານປະຊາຊົນສູງສຸດ ແລະ ສະພາແຫ່ງຊາດ ກ່ຽວກັບການເຄື່ອນໄຫວວຽກງານ ປະຈຳສົກປີ 2014-2015 ແລະ ທິດທາງແຜນການ 2015-2016 ທາບທາມ ແລະ ພິຈາລະນາ ການສະເໜີຮ່າງກົດໝາຍໃໝ່, ຮ່າງກົດໝາຍສະບັບປັບປຸງ ຈຳນວນ 6 ສະບັບ ໃນນັ້ນມີກົດໝາຍສ້າງໃໝ່ 2 ສະບັບຄື: ກົດໝາຍວ່າດ້ວຍການຕ້ານອາຊະຍາກຳທາງລະບົບຄອມພິວເຕີ້ ແລະ ກົດໝາຍວ່າດ້ວຍການແຂ່ງຂັນທາງທຸລະກິດ; ຮ່າງກົດໝາຍປັບປຸງ 1 ສະບັບຄື: ກົດໝາຍວ່າດ້ວຍການສຶກສາ ແລະ ທາບທາມຮ່າງກົດໝາຍ 3 ສະບັບຄື: ກົດໝາຍວ່າດ້ວຍສະພາແຫ່ງຊາດ ສະບັບປັບປຸງ, ກົດໝາຍວ່າດ້ວຍສະພາປະຊາຊົນທ້ອງຖິ່ນ ສ້າງໃໝ່ ແລະ ກົດໝາຍວ່າດ້ວຍການເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນທ້ອງຖິ່ນ ສະບັບປັບປຸງ ແລະ ພິຈາລະນາບັນຫາສຳຄັນອື່ນໆອີກຈຳນວນໜຶ່ງ.
ແຫລ່ງຂ່າວ: ລາວພັດທະນາ