ເມື່ອທ້າຍອາທິດຜ່ານມານີ້, ທ່ານ ດຣ ບຸນຈັນ ສິນທະວົງ ລັດຖະມົນຕີວ່າການກະຊວງໂຍທາທິການ ແລະ ຂົນສົ່ງ, ໄດ້ອອກມາຊີ້ແຈງຕອບຂໍ້ຂ້ອງໃຈຂອງປະຊາຊົນກ່ຽວກັບກໍລະນີການຄຸ້ມຄອງພາຫະນະຂອງລັດ, ພາຍຫລັງເຫັນວ່າມີຈຳ ນວນບໍ່ໜ້ອຍຖືກນຳໃຊ້ບໍ່ຖືກເປົ້າໝາຍເຊັ່ນ: ໃຫ້ລູກຂີ່ໄປໂຮງຮຽນ, ຈອດຕາມຮ້ານ ອາຫານ ແລະ ສະຖານບັນເທິງຕ່າງໆ, ເຊິ່ງນັບວ່າບໍ່ມີຄວາມເໝາະສົມ ແລະ ຕໍ່ບັນຫາດັ່ງກ່າວ, ທ່ານລັດຖະມົນຕີກະຊວງໂຍທາທິການ ແລະ ຂົນສົ່ງກໍໄດ້ໃຫ້ຄຳຕອບຢ່າງກົງໄປກົງມາຕໍ່ປະກົດການທີ່ສັງຄົມມີຄວາມເປັນຫ່ວງວ່າ: ໃນໄລຍະຜ່ານມາສັງເກດເຫັນວ່າລົດທີ່ລັດຖະບານຈັດຊື້ເພື່ອປະກອບໃຫ້ບັນດາການນຳ ຫລືບັນດາກະຊວງຈັດຊື້ເພື່ອມາຮັບໃຊ້ວຽກພາຍໃນກະຊວງ ແລະ ລົດທີ່ນຳເຂົ້າມາຮັບໃຊ້ບັນດາໂຄງການຕ່າງໆຂອງລັດແມ່ນມີການປະກອບເອກະສານຄົບຖ້ວນ ແລະ ນຳເຂົ້າຖືກຕ້ອງຕາມຂັ້ນຕອນທີ່ກຳນົດໄວ້. ສຳລັບລົດທີ່ແຂວງອອກຂໍ້ຕົກລົງນຳເຂົ້າໃຫ້ແກ່ພະນັກງານ, ບັນດາຂະແໜງການຕ່າງໆພາຍໃນແຂວງກໍແມ່ນມີຈຳນວນບໍ່ໜ້ອຍທີ່ໄປຂໍຂຶ້ນທະບຽນກ່ອນ ແລະ ນຳໃຊ້ໃບທະບຽນຊົ່ວຄາວ, ຂະນະດຽວກັນກໍມີລົດຈຳນວນໜຶ່ງບໍ່ສາມາດປະກອບເອກະສານຄົບຖ້ວນໄດ້ເນື່ອງຈາກບໍ່ມີເອກະສານຈົດທະບຽນເປັນຊັບສິນຂອງລັດ, ບໍ່ມີໃບຢັ້ງຢືນການເສຍພາສີ, ເຊິ່ງໃນກໍລະນີນີ້ກະຊວງໂຍທາທິການ ແລະ ຂົນສົ່ງແມ່ນບໍ່ສາມາດພິມໃບທະບຽນຖາວອນໃຫ້ໄດ້. ສ່ວນລົດລັດທີ່ຂາຍນະໂຍບາຍໃຫ້ແກ່ພະນັກງານບຳນານ, ພະນັກງານຜູ້ທີ່ມີຜົນງານ ຫລື ສະສາງຂາຍອອກໃຫ້ບຸກຄົນທົ່ວໄປ, ພາຍຫລັງທີ່ໄດ້ຮັບສິດແລ້ວບໍ່ມາລົບລ້າງເອກະສານ ແລະ ຖອດປ້າຍ ໝາຍວ່າຍັງນຳໃຊ້ປ້າຍລັດເພື່ອເຄື່ອນໄຫວວຽກງານສ່ວນຕົວ ເຊິ່ງກໍລະນີດັ່ງກ່າວແມ່ນຍັງມີເປັນຈຳນວນຫລາຍ, ດັ່ງນັ້ນເພື່ອຈຳກັດ ແລະ ແກ້ໄຂການນຳໃຊ້ລົດລັດຄືດັ່ງກ່າວມານີ້ຈຶ່ງສະເໜີຫາທຸກພາກສ່ວນຕ້ອງເປັນເຈົ້າການຮ່ວມກັນໃນການກວດກາຕິດຕາມຍານພາຫະນະຂອງລັດທີ່ຢູ່ພາຍໃຕ້ຄວາມຮັບຜິດຊອບຂອງຕົນໃຫ້ເຂັ້ມກວ່າເກົ່າ, ໂດຍສະເພາະໃນເມື່ອສະສາງຂາຍອອກແລ້ວກໍຄວນລົບລ້າງເອກະສານ ແລະ ປົດປ້າຍລັດອອກທັນທີ, ນອກນັ້ນກໍຕ້ອງຢຸດຕິການອອກອະນຸຍາດໃຫ້ລົດທີ່ບໍ່ຖືກຕ້ອງຂຶ້ນທະບຽນເປັນປ້າຍລັດຖະການເພື່ອຕັດຂັ້ນຕອນການນຳເຂົ້າພາຫະນະໃຫ້ກະທັດຮັດລົງທັງສະດວກໃນການຈັດຕັ້ງປະຕິບັດ ແລະໃນຕໍ່ໜ້າກະຊວງໂຍທາທິການ ແລະ ຂົນສົ່ງ ມີທິດຈະມອບວຽກກວດກາຜ່ານເຕັກນິກພາຫະນະນຳເຂົ້າໃຫ້ພາກສ່ວນພາສີປະຈຳດ່ານສາກົນເປັນຜູ້ຮັບຜິດຊອບເລີຍ, ເຊິ່ງການອະນຸຍາດນຳເຂົ້າຕ້ອງມີເປົ້າໝາຍນຳໃຊ້ໃນວຽກງານຂອງລັດແທ້ ແລະ ປະຕິບັດໃຫ້ຖືກຕ້ອງຕາມລະບຽບການວາງອອກ.
ແຫລ່ງຂ່າວ: ລາວພັດທະນາ