ປັດຈຸບັນພະຍາດຄໍຕີບອັກເສບໄດ້ລະບາດຢູ່ 6 ບ້ານຂອງເມືອງແມດແຂວງວຽງ ຈັນຄື ບ້ານສາມັກຄີໄຊ, ນາສະຫວ່າງ,ນາອຸດົມ,ປາກແພນ, ຫ້ວຍຕົມ ແລະ ນາດີ, ເຮັດໃຫ້ມີຜູ້ເສຍຊີວິດແລ້ວ 2 ຄົນ ແລະ ພົບຜູ້ຕິດເຊື້ອພະຍາດດັ່ງກ່າວຫລາຍກວ່າ 10ຄົນ.
ຕາມການລາຍງານຂອງ ທ່ານ ດຣ. ສີທົນ ຕັນມິງ ຫົວໜ້າຫ້ອງການສາທາ ລະນະສຸກເມືອງແມດໃນວັນທີ 24 ມິຖຸນານີ້ວ່າ: ນັບແຕ່ຕົ້ນເດືອນມິຖຸນານີ້ ຫ້ອງ ການສາທາລະນະສຸກເມືອງໄດ້ຮັບແຈ້ງວ່າມີເຊື້ອພະຍາດລະບາດເກີດຂຶ້ນທີ່ບ້ານສາມັກຄີໄຊ, ເຊິ່ງເຮັດໃຫ້ມີຄົນເສຍຊີວິດ 2 ຄົນເປັນເດັກຊາຍອາຍຸ 8 ປີ ແລະ 5 ປີ,ຈາກນັ້ນ ທາງຫ້ອງການສາທາລະນະສຸກເມືອງຈິ່ງໄດ້ລົງເກັບກຳຂໍ້ມູນຈິ່ງຮູ້ວ່າເປັນພະ
ຍາດຄໍຕີບອັກເສບ ແລະ ໄດ້ກວດພະຍາດໃຫ້ປະຊາຊົນບ້ານດັ່ງກ່າວສາມາດພົບຜູ້ຕິດເຊື້ອອີກ 6 ຄົນ, ຈາກນັ້ນຈິ່ງໄດ້ລາຍງານ ໃຫ້ແຂວງ ແລະ ສູນກາງຮັບຊາບ ແລະ ໄດ້ສົ່ງທີມງານມາຊ່ວຍ, ເຊິ່ງມາຈາກອົງການລະບາດວິທະຍາກະຊວງສາທາລະນະ ສຸກ, ອົງການອະນາໄມໂລກ, ສາທາລະນະສຸກແຂວງ ແລະ ແພດຈາກເມືອງເຟືອງ ແລະ ເມືອງອ້ອມຂ້າງມາຊ່ວຍ, ມາຮອດ ປັດຈຸບັນເຊື້ອພະຍາດດັ່ງກ່າວໄດ້ຂະຫຍາຍໄປເປັນ 6 ບ້ານ ແລະ ພົບຜູ້ມີເຊື້ອພະຍາດດັ່ງກ່າວທັງຫມົດ 12 ຄົນ ແລະ ຜູ້ມີອາການສົງໄສອີກຈຳນວນໜຶ່ງ.
ຕໍ່ກັບເຫດການດັ່ງກ່າວທາງເມືອງໄດ້ສົມທົບກັບສູນກາງ, ແຂວງ ແລະ ເມືອງອ້ອມຂ້າງລົງສັກຢາວັກແຊງປ້ອງກັນພະຍາດດັ່ງກ່າວໃຫ້ເດັກນ້ອຍອາຍຸ 14 ປີລົງມາຢູ່ບ້ານເປົ້າໝາຍ, ພ້ອມທັງມີແຜນລົງສັກຢາວັກແຊງໃຫ້ຄົບທຸກບ້ານພາຍໃນເມືອງ ແລະ ແຈກຢາກິນໃຫ້ຜູ້ທີ່ມີອາການສົງໄສ, ຄອບຄົວຜູ້ທີ່ມີເຊື້ອພະຍາດ ແລະ ໃຫ້ຄວາມຮູ້ດ້ານສຸຂະສຶກສາວິທີປ້ອງກັນພະຍາດດັ່ງກ່າວ, ແນະນຳບໍ່ໃຫ້ບຸກຄົນພາຍໃນບ້ານເປົ້າໝາຍເຄື່ອນຍ້າຍໄປບ່ອນອື່ນເພາະຈະເປັນການຂະຫຍາຍເຊື້ອພະຍາດ, ພ້ອມນີ້ທາງທີມງານຂອງເມືອງ, ແຂວງ ແລະ ສູນກາງ ໄດ້ລົງຕິມຕາມກຸ່ມເປົ້າຫມາຍຢ່າງໃກ້ຊິດມາຮອດປັດຈຸບັນ ແມ່ນສາມາດຄວບຄຸມເຊື້ອພະຍາດດັ່ງກ່າວໄດ້ແລ້ວ.
ແຫລ່ງຂ່າວ: ລາວພັດທະນາ