ສຳນັກຂ່າວຕ່າງປະເທດ ລາຍງານໃນວັນທີ 22 ມິຖຸນາຜ່ານມານີ້ວ່າ ທາງການຣັດເຊຍ ມີແຜນຂະຫຍາຍມາດຕະການຫ້າມນຳເຂົ້າອາຫານ ຈາກບັນດາປະເທດຕາເວັນຕົກອອກໄປອີກ 6 ເດືອນ ຫລັງຈາກມາດຕະການດັ່ງກ່າວຈະໝົດກຳນົດໃນວັນທີ 8 ສິງຫານີ້ ເພື່ອເປັນການຕອບໂຕ້ ມາດຕະການຂວ້ຳບາດຂອງສະຫະພາບເອີຣົບ ທີ່ໄດ້ພາກັນຕົກລົງຈະຂວ້ຳບາດເສດຖະກິດຕໍ່ຣັດເຊຍໄປອີກ ຈົນເຖິງວັນທີ 31 ມັງກອນ 2016 ດ້ວຍເຫດຜົນທີ່ສືບເນື່ອງມາຈາກວິກິດການໃນປະເທດອູແກຣນ.
ທ່ານ ດິມິທຣີ ເມດເວເດບ ນາຍົກລັດຖະມົນຕີຣັດເຊຍ ໄດ້ສັ່ງໃນກອງປະຊຸມຄະນະລັດຖະບານ ເພື່ອໃຫ້ຄົ້ນຄ້ວາພິຈາລະນາ ຂະຫຍາຍມາດຕະການດັ່ງກ່າວ ແລ້ວນຳສະເໜີໃຫ້ປະທານາທິບໍດີ ປູຕິນ ເປັນຜູ້ອອກຄຳສັ່ງຕາມກົດໝາຍ.
ທັງນີ້ ມາດຕະການດັ່ງກ່າວ ແມ່ນໄດ້ສັ່ງຫ້າມນຳເຂົ້າອາຫານຈາກສະຫະລັດອາເມຣິກາ, ສະຫະພາບເອີຣົບ, ອົດສະຕາລີ, ການາດາ ແລະ ນອກແວ ມູນຄ່າກ່ວາ 9 ຕື້ໂດລາສະຫະລັດ ເຊິ່ງໄດ້ຖືກກຳນົດຂຶ້ນເປັນເວລາ 1 ປີ ນັບຕັ້ງແຕ່ວັນທີ 8 ສິງຫາປີ 2014 ເປັນຕົ້ນມາ.