ສຳນັກຂ່າວຕ່າງປະເທດ ລາຍງານໃນວັນທີ 21 ມິຖຸນາຜ່ານມານີ້ວ່າ ຕຳຫລວດນ້ຳຂອງຫວຽດນາມ ໄດ້ຖະແຫລງຜົນການຈັບກຸມໂຈນສະຫລັດ 8 ຄົນ ເຊິ່ງໄດ້ເຂົ້າບຸກຍຶດເຮືອບັນທຸກນ້ຳມັນ ເອັມທີ ອໍຄິມ ຮາໂມນີ( MT Orkim Harmony) ທີ່ບັນທຸກນ້ຳມັນມາກ່ວາ 6,000 ໂຕນ ເຊິ່ງຕິດທຸງຊາດຂອງມາເລເຊຍ ໃນຂະນະທີ່ກຳລັງແລ່ນຜ່ານນ່ານນ້ຳທະເລຈີນໃຕ້ ມື້ວັນທີ 11​ ມິຖຸນາຜ່ານມາ ໂດຍເຈົ້າໜ້າທີ່ຫວຽດນາມລະບຸວ່າ ພົບຂອງກາງເປັນເງິນໂດລາສະຫະລັດຈຳນວນຫລາຍ ລວມທັງໂທລະສັບມືຖືອີກຫລາຍໜ່ວຍ ເຊິ່ງຜູ້ທີ່ຖືກຈັບກຸມເທື່ອນີ້ ບໍ່ສາມາດຊີ້ແຈງໄດ້ວ່າ ຊັບສິນດັ່ງກ່າວແມ່ນໄດ້ມາຄືແນວໃດ.

ຜູ້ທີ່ຖືກຈັບກຸມທັງໝົດແມ່ນເປັນເພດຊາຍ ອາຍຸລະຫວ່າງ 19-61 ປີ ໂດຍພວກກ່ຽວເວົ້າພາສາອິນໂດເນເຊຍ ແລະ ຄາດວ່າເປັນອາຊະຍາກອນມືອາຊີບ ທີ່ກໍ່ເຫດມາແລ້ວຫລາຍຄັ້ງ ເນື່ອງຈາກມີທ່າທີສະຫງົບນິ່ງ ພ້ອມທັງປະຕິເສດບໍ່ໃຫ້ການຮ່ວມມືໃດໆໃນການໃຫ້ປາກຄຳແກ່ເຈົ້າໜ້າທີ່ຕຳຫລວດ.