ໃນລະຫວ່າງວັນທີ 17-19 ມີຖຸນານີ້, ທີ່ນະຄອນຫຼວງວຽງຈັນ, ວິທະຍຸກະຈາຍສຽງແຫ່ງຊາດລາວ, ໄດ້ຈັດການຝຶກອົບຮົມ ເພື່ອປັບປຸງເຕັກນິກດ້ານສຽງ-ໄອທີ ໃຫ້ຜູ້ຈັດລາຍການທຸກຂະແໜງການ ໂດຍການເປັນປະທານທ່ານ ສີພາ ນົງລາດ ຫົວໜ້າອຳນວຍການວິທະຍຸກະຈາຍສຽງແຫ່ງຊາດລາວ, ມີທ່ານ ໂພສີ ແກ້ວມະນີວົງ ຮອງຜູ້ອຳນວຍການວິທະຍຸກະຈາຍສຽງແຫ່ງຊາດລາວ, ທ່ານ ຄຳຜອງ ດວງລິລາດ ຮອງພະແນກ ການສຽງ-ໄອທີ, ວິທະຍຸກະຈາຍສຽງແຫ່ງຊາດລາວ ແລະ ນັກສຳມະນາກອນ ຈາກວິທະຍຸທຸກຂະແໜງການ ເກືອບ 50 ຄົນເຂົ້າຮ່ວມ.
ທ່ານ ສີພານົງລາດ ຫົວໜ້າວິທະຍຸກະຈາຍສຽງແຫ່ງຊາດລາວ ກ່າວວ່າ: ການຝຶກອົບຮົມຄັ້ງນີ້, ເພື່ອຍົກລະດັບຄວາມຮູ້ຄວາມສາມາດທາງດ້ານໄອທີ, ເຕັກນິກການນຳໃຊ້ອຸປະກອນສຽງ ເພື່ອໃຫ້ມີຄວາມເປັນເອກະພາບ ເຂົ້າໃນລາຍການວິທະຍຸກະຈາຍສຽງຕ່າງໆ ເພື່ອໃຫ້ມີຄວາມຊັດເຈນ ມີຄວາມມ່ວນ, ເຊິ່ງມັນເປັນໝາກຫົວໃຈໃຫ້ແກ່ຜູ້ຟັງ. ຜູ້ເຂົ້າຮ່ວມຝຶກອົບຮົມຍັງໄດ້ຮູ້ພື້ນຖານການສຽງ, ອຸປະກອນການສຽງ, ຮຽນຮູ້ກ່ຽວກັບເລື່ອງອັດ, ຕັດຕໍ່ດ້ວຍລະບົບ IT ແລະ ວິທີແກ້ໄຂບັນຫາຕ່າງໆກ່ຽວກັບການບັນທຶກສຽງ ໃຫ້ມີຄຸນນະພາບຫຼາຍຂື້ນກວ່າເກົ່າ.
ການຝຶກອົບຮົມຄັ້ງນີ້, ມີນັກຂ່າວ, ຜູ້ຈັດລາຍການ ວິທະຍຸສາກົນແຫ່ງປະເທດຈີນປະຈຳລາວ ເຂົ້າຮ່ວມຮັບຟັງ 1 ທ່ານ, ເພື່ອຮຽນຮູ້ການປັບປຸງດ້ານເຕັກນິກສຽງ-ໄອທີ ຂອງຜູ້ຈັດລາຍການ ວິທະຍຸສາກົນແຫ່ງປະເທດຈີນປະຈຳລາວ.
