ອົງການອະນາໄມໂລກ ຫລື WHO ຊີ້ແຈງ ການລະບາດຂອງພະຍາດ MERS ຢູ່ເກົາຫລີໃຕ້ ເປັນການເຕືອນໃຫ້ເຫັນວ່າ ເຊື້ອໄວຣັດອັນຕະລາຍ ສາມາດລະບາດໄດ້ຕະຫລອດເວລາ.

ສຳນັກຂ່າວຕ່າງປະເທດ ລາຍງານໃນວັນທີ 18 ມິຖຸນານີ້ວ່າ ອົງການອະນາໄມໂລກ ໄດ້ລະບຸຢູ່ໃນຖະແຫລງການຂອງຕົນ ຫລັງຈາກປະຊຸມຄະນະກຳມະການພາວະສຸກເສີນ ກ່ຽວກັບພະຍາດ MERS ວ່າ ການລະບາດຂອງເຊື້ອໄວຣັດ MERS ແມ່ນເປັນສັນຍານເຕືອນໄພແກ່ຊາວໂລກ ເຊິ່ງສະແດງໃຫ້ເຫັນວ່າ ໃນໂລກທີ່ມີການເຄື່ອນໄຫວຢ່າງວ່ອງໄວດັ່ງທຸກວັນນີ້ ທຸກໆປະເທດຈະຕ້ອງກຽມພ້ອມເພື່ອຮັບມືກັບການແຜ່ລະບາດຂອງເຊື້ອພະຍາດ ທີ່ບໍ່ໄດ້ຄາດໝາຍມາກ່ອນ ເຊັ່ນພະຍາດ MERS ແລະ ພະຍາດຕິດເຊື້ອຮຸນແຮງອື່ນໆອີກ.