ຄະນະນັກກິລາລາວ ເກືອບ 200 ຄົນ ທີ່ເຂົ້າຮ່ວມແຂ່ງຂັນ 20 ປະເພດກິລາໃນມະຫະກຳກິລາຊີເກມ ຄັ້ງທີ XXVIII ຢູ່ ສິງກະໂປ ບໍ່ອາດຍາດໄດ້ຫລຽນຄຳກັບບ້ານ ເຊິ່ງຄະນະຮັບຜິດຊອບອ້າງວ່າ ຍ້ອນເຮົາມີເວລາເຝິກຊ້ອມສັ້ນ ເນື່ອງຈາກເຈົ້າພາບ ຍ້າຍມາແຂ່ງຂັນໃນເດືອນ ມິຖຸນາ ທັງທີ່ວ່າຕາມປົກກະຕິແລ້ວ ແມ່ນແຂ່ງຂັນໃນເດືອນ ທັນວາ.
ກ່ອນໜ້າທີ່ນັກກິລາລາວຈະໄປຮ່ວມແຂ່ງຂັນຊີເກມ ທ່ານ ແສງພອນ ພົນອາມາດ ຫົວໜ້າກົມກິລາ ລະດັບສູງ ກະຊວງ ສຶກສາທິການ ແລະ ກິລາ ໄດ້ແຈ້ງໃຫ້ຮູ້ເຖິງຂໍ້ຫຍຸ້ງຍາກທີ່ຈະເຮັດໃຫ້ນັກກິລາລາວ ບໍ່ອາດໄດ້ຫລຽນຄຳວ່າ: ພວກເຮົາມີເວລາເຝິກຊ້ອມສັ້ນ ເນື່ອງຈາກເຈົ້າພາບປ່ຽນເວລາແຂ່ງຂັນ, ຂະນະດຽວກັນ ການອະນຸມັດງົບປະມານ ແລະ ການຖອນງົບຮັບໃຊ້ມີຄວາມຊັກຊ້າ ບໍ່ທ່ວງທັນກັບການເຄື່ອນໄຫວຕົວຈິງ ໂດຍສະເພາະບໍ່ທັນກັບໄລຍະເຝິກຊ້ອມ.
ໃນເບື້ອງຕົ້ນຄະນະຮັບຜິດຊອບຕັ້ງເປົ້າ 5 ຫລຽນຄຳ ແລະ ສູ້ຊົນໃຫ້ໄດ້ອັນດັບທີ 8 ຂອງຕາຕະລາງເໝືອນກັບ ຊີເກມ ຄັ້ງທີ່ຜ່ານມາ ແຕ່ຜ່ານການເຂົ້າຮ່ວມແຂ່ງຂັນຕົວຈິງແລ້ວ ບໍ່ອາດຍາດໄດ້ຫລຽນຄຳເລີຍ ແລະ ຮັກສາອັນດັບທີ 8 ບໍ່ໄດ້ເພາະຢູ່ອັນດັບທີ 9 ຂອງຕາຕະຫລຽນຈາກການເຂົ້າຮ່ວມ 11 ປະເທດ.
ສາເຫດທີ່ພາໃຫ້ນັກກິລາລາວບໍ່ໄດ້ຫລຽນຄຳ ເນື່ອງຈາກມີເວລາເຝິກຊ້ອມສັ້ນ ເພາະຕາມລະບຽບຂອງຊີເກມແລ້ວ ແມ່ນໃຫ້ຈັດໃນທ້າຍປີ 2015 ແຕ່ເຈົ້າພາບ ສິງກະໂປ ອ້າງວ່າໄລຍະນັ້ນ ສະພາບອາກາດບໍ່ດີ ຈຶ່ງຍ້າຍມາໃສ່ເດືອນ ມິຖຸນາ.
ສຳລັບນັກກິລາລາວ ຍາດໄດ້ 4 ຫລຽນເງິນ ຈາກ ນັກກິລາ ກະຕໍ້ຊິນລອນ 2 ຫລຽນ, ນັກກິລາເທຢູໂດ 1 ຫລຽນ ແລະ ນັກກິລາປັນຈັກສິລັດ 1 ຫລຽນ, ສ່ວນ 25 ຫລຽນທອງ ໄດ້ຈາກ ນັກກິລາເປຕັງ 8 ຫລຽນ, ເທຄວັນໂດ 4 ຫລຽນ, ມວຍສາກົນ 3 ຫລຽນ, ປັນຈັກສິລັດ 3 ຫລຽນ, ກະຕໍ້ 3 ຫລຽນ, ວູຊູ 2 ຫລຽນ ແລະ ນັກກິລາຢູໂດ 2 ຫລຽນ.
ຂ່າວຈາກ: ຂປລ