ສຳນັກຂ່າວຕ່າງປະເທດ ລາຍງານໃນວັນທີ 16 ມິຖຸນານີ້ວ່າ  ເກຣັກ ໄດ້ບັນລຸຂໍ້ຕົກລົງເລື່ອງເປົົ້າໝາຍງົບປະມານ ປະຈຳປີ 2015 ກັບ EU ແລະ IMF ແລ້ວ ໂດຍໂຄສົກຂອງສະຫະພາບເອີຣົບໄດ້ກ່າວວ່າ EU ແລະ IMF ໄດ້ຍອມຫລຸດຜ່ອນເງື່ອນໄຂໃນການປະຕິຮູບເສດຖະກິດໃຫ້ກັບເກຣັກ ເພື່ອໃຫ້ສາມາດບັນລຸຂໍ້ຕົກລົງດັ່ງກ່າວນີ້ ເຮັດໃຫ້ທ່າທີ່ໃນການເຈລະຈາເພື່ອການປ່ອຍເງິນຊ່ວຍເຫລືອຈຳນວນທີ່ເຫລືອໃຫ້ແກ່ລັດຖະບານເກຣັກ ສຳລັບນຳໃຊ້ເຂົ້າໃນການຊຳລະໜີ້ເງິນກູ້ຂອງ EU ແລະ IMF ເຊິ່ງມີກຳນົດຊຳລະພາຍໃນທ້າຍເດືອນມິຖູນານີ້ ຜ່ານພົ້ນໄປດ້ວຍດີ, ແນວໃດກໍຕາມ ບັນຫາທີ່ນັກວິເຄາະເສດຖະກິດໂລກ ໄດ້ຕັ້ງຂຶ້ນເພື່ອຈັບຕາວິກິດການທາງການເງິນຂອງເກຣັກໃນຕໍ່ໜ້າ ເຖິງແມ່ນວ່າຈະສາມາດບັນລຸຂໍ້ຕົກລົງດັ່ງກ່າວໄດ້ແລ້ວກໍຕາມ ແຕ່ເລື່ອງການປະຕິບັດຕາມຂໍ້ຕົກລົງດັ່ງກ່າວນີ້ ລັດຖະບານເກຣັກ ຈະສາມາດເຮັດໄດ້ສຳເລັດ ຫລື ບໍ່ນັ້ນ ຍັງເປັນສິ່ງທີ່ຈະຕ້ອງໄດ້ເອົາໃຈໃສ່ຕິດຕາມຕໍ່ໄປ.