ໃນວັນທີ 13 ມິຖຸນາ 2015 ພະແນກກະສິກຳ ແລະ ປ່າໄມ້ ສົມທົບກັບບັນດານັກທຸລະກິດນະຄອນຫຼວງວຽງຈັນ ໄດ້ຈັດພິທີປູກຕົ້ນໄມ້ໃສ່ເສັ້ນທາງ 450 ປີ ເພື່ອປະຕິບັດນະໂຍບາຍ 6ສ ຂອງນະຄອນຫຼວງ ຢູ່ຕາມເສັ້ນທາງບ້ານທ່ານາແລ້ງ ເມືອງຫາດຊາຍຟອງ ແລະ ເມືອງໄຊເຊດຖາ ນະຄອນຫຼວງວຽງຈັນ ໂດຍເປັນກຽດເຂົ້າຮ່ວມຂອງທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ ຜູ້ຊີ້ນຳວຽກງານເສດຖະກິດ ແລະ ຈໍລະຈອນ ທ່ານ ດຣ. ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ ພ້ອມດ້ວຍບັນດາທ່ານລັດຖະມົນຕີຈາກກະຊວງຕ່າງໆ ຄະນະການນຳນະຄອນຫຼວງ ເຈົ້າເມືອງ ຫົວໜ້າພະແນກ ກົມ ຫ້ອງການ ອຳນາດການປົກຄອງບ້ານ ຕະຫຼອດຮອດພໍ່ແມ່ປະຊາຊົນບ້ານອ້ອມຂ້າງ ເຂົ້າຮ່ວມຢ່າງພ້ອມພຽງ.
ທ່ານ ຮສ.ດຣ. ລິນຄຳ ດວງສະຫວັນ ຫົວໜ້າພະແນກກະສິກຳ ແລະ ປ່າໄມ້ ນະຄອນຫຼວງວຽງຈັນ ກ່າວວ່າ: ເພື່ອເປັນການປະຕິບັດນະໂຍບາຍ 6ສ ໂດຍສະເພາະ ສ ສີຂຽວ ຂອງນະຄອນຫຼວງວຽງຈັນວາງອອກ ຕິດພັນກັບຂະບວນການຮັກຊາດ ແລະ ພັດທະນາ ທັງເປັນການປູກປ່າ-ປົກປັກຮັກສາປ່າໄມ້ ແນໃສ່ສ້າງເນື້ອທີ່ປ່າປົກຫຸ້ມໃຫ້ໄດ້ 70% ຂອບເຂດທົ່ວປະເທດ ໃນປີ 2020 ແລະ ເພື່ອສ້າງຂະບວນການຄຳນັບຮັບຕ້ອນກອງປະຊຸມໃຫຍ່ ຄັ້ງທີ VI ຂອງອົງຄະນະພັກນະຄອນຫຼວງ ທີ່ຈະໄຂຂຶ້ນໃນມໍ່ໆນີ້ ເຊິ່ງໃນປີນີ້ຕາມແຜນທີ່ວາງໄວ້ຂອງນະຄອນຫຼວງວຽງຈັນແມ່ນ 500 ເຮັກຕາ ຄາດຄະເນຈະປູກໃຫ້ໄດ້ລື່ນຄາດໝາຍ ປັດຈຸບັນ ປູກໄດ້ຫຼາຍກວ່າ 300 ເຮັກຕາ ແລະ ຢູ່ເສັ້ນທາງ 450 ຈະປູກໃຫ້ໄດ້ 1.800 ຕົ້ນ ລວມມູນຄ່າ 4 ຮ້ອຍລ້ານກວ່າກີບ ໃນນີ້ ພວກເຮົາໄດ້ກະກຽມເບ້ຍໄມ້ປູກ ຈຳນວນ 500 ຕົ້ນ ສ່ວນທີ່ເຫຼືອ ພະແນກກະສິກຳ ແລະ ປ່າໄມ້ ຈະສືບຕໍ່ປູກຮ່ວມກັບຜູ້ປະກອບການ ແລະ ປະຊາຊົນໃຫ້ສຳເລັດໃນທ້າຍເດືອນມິຖຸນາ 2015 ນີ້ ຕົ້ນໄມ້ທີ່ນຳມາປູກແມ່ນເນັ້ນໃສ່ໄມ້ປະເພດອຸດສາຫະກຳ ເປັນຕົ້ນ ໄມ້ແຕ້ຂ່າ ໄມ້ຫຳງົວ ໄມ້ແຄນຂະຍອມ ແລະ ໄມ້ສາມສາ ໂດຍນະຄອນຫຼວງວຽງຈັນ ມອບໃຫ້ພະແນກກະສິກຳ ແລະ ປ່າໄມ້ ນວ ບໍລິສັດເຈົ້າຂອງທີ່ດິນຕາມເສັ້ນທາງ ເປັນເຈົ້າການປົກປັກຮັກສາຕົ້ນໄມ້ທີ່ປູກ ພ້ອມນັ້ນ ພະແນກດັ່ງກ່າວ ໄດ້ມີການຂຶ້ນທະບຽນ ແລະ ອອກລະບຽບການປົກປັກຮັກສາ ສຳລັບຕົ້ນໄມ້ທີ່ປູກຕາມເສັ້ນທາງ 450 ປີອີກດ້ວຍ.
ແຫລ່ງຂ່າວ: ວຽງຈັນໃໝ່