ຂປລ, ບໍລິສັດລ້ານຊ້າງມິເນໂຣນ ຈຳກັດ ຫລື MMG LXML ເຊໂປນ ໄດ້ມອບເງິນຄ່າຊັບພະ ຍາກອນ ສຳລັບໄຕມາດ 1 ຂອງປີ 2015 ມູນຄ່າ 5.299.290 ໂດລາສະຫະລັດ ໃຫ້ແກ່ກະຊວງການເງິນ ແລະ ໄດ້ຈ່າຍອາກອນກຳໄລ ຂອງປີ 2014 ຈຳນວນ 71.338.680 ໂດລາສະຫະລັດ ໃຫ້ແກ່ລັດຖະບານລາວ ໃນເດືອນມິີນາ ຜ່ານມາ ລວມຄ່າຊັບພະຍາກອນ, ຄ່າເຊົ່າ, ອາກອນລາຍໄດ້ , ອາກອນຊົມໃຊ້ນ້ຳມັນ ແລະ ເງິນປັນຜົນ ລາຍຮັບທັງໝົດ ໃຫ້ລັດຖະບານ ຈຳນວນ 117.264.840 ໂດລາສະຫະລັດ, ພ້ອມນີ້ ບໍລິສັດລ້ານຊ້າງມິເນໂຣນ ຍັງໄດ້ມອບເງິນທີ່ເປັນລາຍໄດ້ໂດຍກົງໃຫ້ແກ່ ລັດຖະບານລາວ ຈຳນວນ 1,3 ຕື້ໂດລາສະຫະລັດ ນັບແຕ່ LXML ໄດ້ເລີ່ມດຳເນີນງານ ແຕ່ປີ 2003 ເປັນຕົ້ນມາ, ຊຶ່ງລັດຖະບານລາວ ຖືຮຸ້ນ 10 % ໃນບໍລິສັດ LXML .
ພິທີມອບ-ຮັບເງິນ ຈຳນວນດັ່ງກ່າວ ໄດ້ຈັດຂຶ້ນໃນວັນທີ 12 ມິຖຸນາ 2015 ຢູ່ ນະຄອນຫລວງວຽງຈັນ ກ່າວຮັບໂດຍ ທ່ານ ບຸນໂຈມ ອຸບົນປະເສີດ ລັດຖະມົນຕີ ຊ່ວຍວ່າການກະຊວງການເງິນ , ແລະ ກ່າວມອບໂດຍ ທ່ານ ຊູເຮັດ ວາດນາກຣາ ຜູ້ຈັດການໃຫຍ່ບໍລິສັດ MMG LXML ເຊໂປນ.
ຂ່າວສານປະເທດລາວ