12 ມິຖຸນາ 2015: ເວລາປະມານ 12:00 ມີເຫດລົດຂົນສົ່ງຂອງ ຫວຽດນາມ ປີ້ນສອງຄັນທີ່ທາງ ເລກ 8, ທີ່ເຂດ ພູຜາມ່ານ (ທາງຫຼັກຊາວ, ແຂວງບໍລິຄຳໄຊ). ລົດຄັນທຳອິດແມ່ນປີ້ນຂວາງທາງ ແລະ ອີກຄັນ ແມ່ນປີ້ນທີ່ຂ້າງທາງ ເຊິ່ງຫ່າງຈາກ ຄັນທຳອິດໄປ 150 ແມັດ.
ເຫດການດັ່ງກ່າວ ເຮັດໃຫ້ເສັ້ນທາງ ເກີດອຳມະພາດດົນກວ່າ 2 ຊົ່ວໂມງ ຈິ່ງສາມາດ ຍ້າຍລົດອອກ ແລະ ໃຫ້ການສັນຈອນສາມາດໄປໄດ້. ແລະບໍ່ມີລາຍງານຜູ້ບາດເຈັບ ຫຼື ເສຍຊີວິດແຕ່ຢ່າງໃດ.
ບັນຫາອຸບັດຕິເຫດ ຕາມເສັ້ນທາງນີ້ ຖືວ່າເກີດຂຶ້ນຫຼາຍຄັ້ງ ເນື່ອງຈາກ ເປັນທາງຄົດໂຄ້ງ ຜ່ານພູສູງ ແລະຊັນ ແຕ່ມີລົດຂົນສົ່ງຂະໜາດໃຫຍ່ ແລະ ຍາວ ຜ່ານເປັນຈຳນວນຫຼວງຫຼາຍ, ບວກກັບຜູ້ຂັບລົດຕ່າງຊາດ ບາງຄົນບໍ່ລຶ້ງເສັ້ນທາງ ຈິ່ງພາໃຫ້ເກີດອຸບັດຕິເຫດ. ດັ່ງນັ້ນ, ນັກຂັບຂີ່ ຈຶ່ງຄວນຂັບຂີ່ດ້ວຍຄວາມລະມັດລະວັງ.
ພາບແລະຂ່າວ: ນັກຂ່າວສັນຈອນ ວົງດາລາ ໄຊຍະ ແລະໂທລະໂຄ່ງ