ຂປລ. ໃນວັນທີ 7 ມິຖຸນາ 2015 ເຈົ້າທີ່ຕໍາຫລວດສະກັດກັ້ນ ແລະ ຕ້ານຢາເສບຕິດແຂວງຫລວງພະບາງຈັບກຸມຍິງ 2 ຄົນພ້ອມກາງເຮໂລອິນ 41 ແທ່ງ, ນໍ້າໜັກ 17 ກິໂລກຣາມຢູ່ບ້ານປາກແວດ ເມືອງຊຽງເງິນ ແຂວງຫລວງພະບາງ.
ເຈົ້າໜ້າທີ່ຕໍາຫລວດແຂວງຫລວງພະບາງເປີດເຜີຍວ່າ: ພາຍຫລັງໄດ້ຮັບຂ່າວວ່າຈະມີການຂົນຍ້າຍຢາເສບຕິດ, ເຈົ້າໜ້າທີ່ຕໍາຫລວດແຂວງຫລວງພະບາງໄດ້ສົມທົບກໍາລັງກັບຫ້ອງການຕ້ານຢາເສບຕິດທະຫານຊາຍແດນແຂວງດຽ່ນບຽນ ສສ.ຫວຽດນາມໃນວັນທີ 2 ມິຖຸນາ 2015ເພື່ອລົງຕິດຕາມ ແລະ ກວດຄົ້ນຫາເບາະແສດັ່ງກ່າວ ມາຮອດວັນທີ 7 ມິຖຸນາ 2015 ເຈົ້າໜ້າທີ່ຕໍາຫລວດແຂວງພະບາງໄດ້ເຂົ້າກວດຄົ້ນ ແລະ ສາມາດຈັບຜູ້ຍິງ 2 ຄົນພ້ອມກາງເຮໂລອິນ 41 ແທ່ງ, ນໍ້າໜັກ 17 ກິໂລກຣາມໄວ້ໃນຄອບຄອງພ້ອມລົດວີໂກ້ 2 ຄັນປ້າຍທະບຽນ: ວນ 4555 ກໍາແພງນະຄອນ, ກຜ 1187 ກໍາແພງນະຄອນ ຢູ່ບ້ານປາກແວດ ເມືອງຊຽງເງິນ ແຂວງຫລວງພະບາງ, ຍິງທັງສອງຊື່: ນາງ ໄມເຮີ ອາຍຸ 37 ປີ ອາຊີບຄ້າຂາຍ ຢູ່ບ້ານພອນໄຊ ເມືອງ ແລະ ແຂວງຫລວງພະບາງ, ນາງ ປາຢາງຢາງ ອາຍຸ 27 ປີ ພະນັກງານ ຢູ່ບ້ານປາກຂັນ ເມືອງຊຽງເງິນ ແຂວງຫລວງພະບາງ. ທັງສອງຮັບສາລະພາບຢາເສບຕິດທັງໝົດແມ່ນຂອງຕົນເອງ ປັດຈຸບັນນີ້ ເຈົ້າໜ້າທີ່ຕໍາຫລວດພວມສືບຕໍ່ສືບສວນສອບສວນເພື່ອຂະຫຍາຍຜົນຕໍ່ໄປ.

ຂອບໃຈຂ່າວຈາກ: ຂ່າວສານປະເທດລາວ