ໃນລະຫວ່າງກາງເດືອນພຶດສະພາຜ່ານມາ, ຂະແໜງການກ່ຽວຂ້ອງຂອງນະຄອນຫລວງວຽງຈັນ ເປັນຕົ້ນຂະແໜງພະລັງງານ ແລະ ບໍ່ແຮ່ ພ້ອມຂະແໜງອຸດສາຫະກຳ ແລະ ການຄ້າ ໄດ້ດຳເນີນມາດຕະການຢ່າງເຂັ້ມງວດກັບບັນດາບໍລິສັດທີ່ເຄື່ອນໄຫວບໍ່ໄປຕາມລະບຽບກົດໝາຍ ໂດຍສະເພາະແມ່ນການເຄື່ອນໄຫວທີ່ບໍ່ມີຜົນກຳໄລ ແລະ ບໍ່ຖືກຕ້ອງຕາມລະບຽບກົດໝາຍຂອງ ສປປ ລາວ ໄດ້ກຳນົດໄວ້.
ຕໍ່ບັນຫາທີ່ກ່າວມາຂ້າງເທິງນີ້ ໃນເບື້ອງຂະແໜງການພະລັງງານ ແລະ ບໍ່ແຮ່ ໄດ້ສັ່ງຍົກເລີກ ຫລື ໂຈະດຳເນີນທຸລະກິດດ້ານບໍ່ແຮ່ຢູ່ນະຄອນຫລວງວຽງຈັນລວມ 23 ບໍລິສັດ ທີ່ບໍ່ມີການເຄື່ອນໄຫວ ແລະ ບໍ່ເຂົ້າພົວພັນວຽກງານນຳພະແນກພະລັງງານ ແລະ ບໍ່ແຮ່ປະຈຳນະຄອນຫລວງ ໃນນີ້ສ່ວນໃຫຍ່ແມ່ນບໍລິສັດທີ່ໄດ້ຮັບສຳປະທານຂຸດຄົ້ນຫີນດານ, ຫີນພູກໍ່ສ້າງ ແລະ ຫີນປູນ. ບັນດາບໍລິສັດທີ່ຖືກຖອນໃບອະນຸຍາດຈະເປັນບໍລິສັດດຳເນີນທຸລະກິດຂະໜາດນ້ອຍມີເນື້ອທີ່ສຳປະທານຫີນດານ, ຫີນພູກໍ່ສ້າງ ແລະ ຫີນປູນສູງສຸດແມ່ນ 10 ເຮັກຕາລົງມາ, ຈຳນວນບໍລິສັດທີ່ຖືກຖອນໂຕຈະບໍ່ມີສິດເຄື່ອນໄຫວທຸລະກິດດ້ານບໍ່ແຮ່ ແລະ ຜູກຂາດການຂຸດຄົ້ນທີ່ທາງພະແນກອະນຸຍາດໃຫ້ເມື່ອກ່ອນແຕ່ຢ່າງໃດ ເພາະໃບອະນຸຍາດດ້ານບໍ່ແຮ່ຖືວ່າໝົດອາຍຸການນຳໃຊ້ແລ້ວ ນັບແຕ່ວັນທີ 25 ພຶດສະພາ 2015 ເປັນຕົ້ນໄປ. ໃນຂະນະດຽວກັນ, ທາງພະແນກອຸດສາຫະກຳ ແລະ ການຄ້ານະຄອນຫລວງວຽງຈັນ ຍັງໄດ້ສັ່ງໂຈະ 10 ບໍລິສັດທີ່ບໍ່ແຈ້ງເສຍອາກອນໃຫ້ແກ່ລັດ ເນື່ອງຈາກຂາດການເຂົ້າມາພົວພັນແຈ້ງເສຍພາສີອາກອນ. ດັ່ງນັ້ນ ທາງພະແນກອຸດສາຫະກຳ ແລະ ການຄ້າ ຈຶ່ງໄດ້ສັ່ງໂຈະການເຄື່ອນໄຫວຂອງບໍລິສັດດັ່ງກ່າວ ຕາມແຈ້ງການສະບັບເລກທີ 0952/ອຄ.ນວ.ທຄວ, ລົງວັນທີ 20 ພຶດ ສະພາ 2015 ຂອງເຈົ້າໜ້າທີ່ທະບຽນວິສາຫະກິດ ພະແນກອຸດສາຫະກຳ ແລະ ການຄ້ານະຄອນຫລວງວຽງຈັນ, ໃນກໍລະນີລະເມີດຈະຖືກປະຕິບັດມາດຕະການຢ່າງເຂັ້ມງວດຕາມມາດຕາ 212 ຂອງກົດໝາຍວ່າດ້ວຍວິສາຫະກິດ (ສະ ບັບປັບປຸງ 2013) ແລະ ຕ້ອງນຳເອົາໃບທະບຽນວິສາຫະກິດ(ສະບັບຕົ້ນ) ມາໃຫ້ເຈົ້າໜ້າທີ່ລະບຽບວິສາຫະກິດຊ້າສຸດບໍ່ໃຫ້ເກີນວັນທີ 2 ມິຖຸນາ 2015. ຖ້າກໍລະນີບຸກຄົນ ຫລື ນິຕິບຸກຄົນໃດຫາກນຳໃບທະບຽນວິສາຫະກິດຂອງບັນດາວິສາຫະກິດດັ່ງກ່າວໄປນຳໃຊ້ ນອກຈາກຈະຖືກປະຕິບັດມາດຕະການແລ້ວ ຍັງຕ້ອງໄດ້ຮັບຄວາມຮັບຜິດຊອບທັງໝົດຕໍ່ໜ້າກົດໝາຍຈາກຜົນເສຍຫາຍທີ່ຕົນໄດ້ສ້າງຂຶ້ນ ແລະ ຕ້ອງການດຳເນີນການຍຸບເລີກຕາມຂັ້ນຕອນ ແລະ ກຳນົດເວລາທີ່ບົ່ງບອກໄວ້ໃນກົດໝາຍວ່າດ້ວຍວິສາຫະກິດ (ສະບັບປັບປຸງ 2013).
ຂ່າວຈາກໜັງສືພິມລາວພັດທະນາ