ໃນວັນທີ 4 ມິຖຸນານີ້ ຢູ່ບ້ານນາບົງ-ທ່າກົກໄຮ ທ່ານ ສາຍທອງ ແກ້ວດວງດີ ຮອງເຈົ້າຄອງນະຄອນຫຼວງວຽງຈັນ ພ້ອມຄະນະ ໄດ້ມອບເງິນຈຳນວນ 350 ລ້ານກີບ ທີ່ໄດ້ມາຈາກພາກລັດ ເອກະຊົນ ແລະ ພໍ່ແມ່ປະຊາຊົນທີ່ມີນ້ຳໃຈ ໃຫ້ຄອບຄົວຂອງເດັກຜູ້ເສຍຊີວິດ ແລະ ສູນຫາຍ ຈຳນວນ 10 ຄອບຄົວ ຄອບຄົວລະ 35 ລ້ານກີບ ເພື່ອເປັນການຊ່ວຍເຫຼືອໃນເບື້ອງຕົ້ນ.
ທ່ານ ສາຍທອງ ແກ້ວດວງດີ ກ່າວວ່າ: ປັດຈຸບັນ ການແກ້ໄຂບັນຫາດັ່ງກ່າວ ແມ່ນຈະໄດ້ທຳການກໍ່ສ້າງຂົວຂ້າມນ້ຳງື່ມ ລະຫວ່າງບ້ານນາບົງ-ບ້ານທ່າກົກໄຮ ໂດຍຈະມີຜູ້ຊ່ຽວຊານລົງສຳຫຼວດພື້ນທີ່ ໃນການກໍ່ສ້າງໃນອາທິດທີ່ຈະມາເຖິງນີ້ ໂດຍແມ່ນການຊ່ວຍເຫຼືອລ້າຈາກທ່ານ ໂຊກໄຊ ວົງມະນາສິດ ປະທານບໍລິສັດ ລາວເວີນວິສະວະກຳກໍ່ສ້າງ ຈຳກັດ ໃນມູນຄ່າ 150 ຕື້ກວ່າກີບ ພ້ອມກັນນັ້ນ ລັດຖະບານກໍ່ຍັງໄດ້ອະນຸມັດໃຫ້ສ້າງທາງປູຢາງແຕ່ທາງເຂົ້າ (ເຂດຫຼັກ 40) ໄປຈົນເຖິງຂົວດັ່ງກ່າວ.
ມາເຖິງປັດຈຸບັນ ການຄົ້ນຫານ້ອງນັກຮຽນຜູ້ສູນຫາຍທັງສາມລາຍທີ່ຍັງເຫຼືອ ຄື: ນາງ ປູນາ ທ້າວ ແສງຈັນ ນັກຮຽນບ້ານຫົວນາທົ່ງ ແລະ ນາງ ລັດສະໝີ ນັກຮຽນບ້ານໂພນຂາມ ແມ່ນທາງເມືອງຍັງສືບຕໍ່ປະສານສົມທົບກັບອຳນາດການປົກຄອງບ້ານ ແລະ ປະຊາຊົນໃນບ້ານຢູ່ລຽບຕາມແຄມງື່ມໃນເຂດເມືອງຂອງຕົນ ສືບຕໍ່ຄົ້ນຫາ ແລະ ຕິດຕາມຢ່າງຕໍ່ເນື່ອງ ຈົນກວ່າຈະພົບສົບຂອງບັນດານ້ອງດັ່ງກ່າວ.
ແຫລ່ງຂ່າວ: ວຽງຈັນໃໝ່