ການແຂ່ງຂັນບານເຕະ ອາຍຸບໍ່ເກີນ 20 ປີ ຫຼື U-20 ຊີງແຊ້ມໂລກ 2015 (2015 FIFA U-20 World Cup) ທີ່ປະເທດນິວຊີແລນ ເປັນເຈົ້າພາບ ລະຫວ່າງວັນທີ 30 ພຶດສະພາ ຫາ 20 ມິຖຸນາ 2015.
ເມື່ອວັນທີ 30 ພຶດສະພາ ຜ່ານມາ ເປັນການລົງສະໜາມຂອງກຸ່ມ A ຄູ່ທີ່ໜ້າສົນໃຈ ທີມຊາດມຽນມາ 1 ໃນ 4 ຊາດຕົວແທນຈາກທະວີບອາຊີ ລົງສະໜາມພົບກັບ ທີມຊາດສະຫະລັດອາເມຣິກາ.

ເລີ່ມເກມໄດ້ພຽງ 9 ນາທີ ຢານນຽງໂອ ຍິງປະຕູໃຫ້ ມຽນມາ ອອກນຳໄປກ່ອນ 1-0 ຢ່າງໄວວາ, ແຕ່ຫຼັງຈາກນັ້ນ ອີກ 8 ນາທີ ຕໍ່ມາ ສະຫະລັດອາເມຣິກາ ໄລຕີສະເໝີເປັນ 1-1 ຈາກການຍິງຂອງ ມາກິ ທອລ, ຈົບເຄິ່ງເວລາທຳອິດ ທັງ 2 ທີມ ສະເໝີກັນຢູ 1-1 ປະຕູ.

ກັບມາແຂ່ງຂັນຕໍ່ໃນເຄິ່ງເວລາທີ 2 ນາທີ 56 ສະຫະລັດອາເມຣິກາ ໄດ້ປະຕູພິກຂຶ້ນນຳ 2-1 ຈາກການຍິງຂອງ ເອເມີສັນ ໄຮມັນ ເວລາທີ່ເຫຼືອບໍ່ມີປະຕູເພີ່ມເກີດຂຶ້ນ ຈົບເກມການແຂ່ງຂັນ ມຽນມາ ພາດທ່າເສຍໃຫ້ ສະຫະລັດອາເມຣິກາ ຫວຸດຫວິດ 1-2 ປະຕູ ໂດຍນັດຕໍ່ໄປ ມຽນມາ ຈະພົບກັບ ຢູເຄຣນ ທີ່ສະເໝີ ນິວຊີແລນ ເຈົ້າພາບ 0-0 ປະຕູ.