ການແຂ່ງຂັນດອກປີກໄກ່ ລາຍການ ເດິ ສະຕາຣ໌ ອອສເຕຣລຽນ ໂອເພັນ ຊູເປີຊີຣີ ຊີງເງິນລາງວັນລວມ 7 ແສນກວ່າໂດລາສະຫະລັດ ທີ່ນະຄອນຫຼວງຊິດນີ ປະເທດອອສເຕຣເລຍ ເມື່ອວັນທີ 31 ພຶດສະພາ ຜ່ານມາ.
ຮອບຊີງຊະນະເລີດ ປະເພດຍິງດ່ຽວ ເປັນການພົບກັນລະຫວ່າງ ແຄໂຣລິນາ ມາຣິນ ມືອັນດັບ 3 ຂອງໂລກ ແລະ ແຊ້ມໂລກຄົນຫຼ້າສຸດ ຈາກສະເປນ ພົບກັບ ຫວັງ ຊິສຽນ ມື 6 ຂອງໂລກ ຈາກ ສປ ຈີນ ຜ່ານການແຂ່ງຂັນປາກດວ່າ ມາຣິນ ເປັນຝ່າຍເອົາຊະນະໄປໄດ້ 2-0 ເຊັດ ດ້ວຍຄະແນນ 22-20 ແລະ 21-18 ຄວ້າແຊ້ມເປັນລາຍການທີ 3 ຈາກ 5 ລາຍການທີ່ເຂົ້າຊີງໃນປີນີ້ ພ້ອມຮັບເງິນລາງວັນ 56.250 ໂດລາສະຫະລັດ, ສ່ວນ ຫວັງ ຊິສຽນ ໄດ້ຮອງແຊ໋ມ ພ້ອມຮັບເງິນ 28.500 ໂດລາສະຫະລັດ.
ຂະນະທີ່ປະເພດ ຊາຍດ່ຽວ ເສິນ ຫຼົງ ມືອັນດັບ 1 ຂອງໂລກ ແລະ ແຊ້ມໂລກຄົນປັດຈຸບັນ ຈາກ ສປ ຈີນ ເອົາຊະນະ ວິກເຕີ ອະເຊລເຊນ ມືອັນດັບ 9 ຂອງໂລກ ຈາກເດນມາກ ທີ່ເຂ່ຍລິນຕັນ ຕົກຮອບທຳອິດ 2 ເຊັດລວດ ດ້ວຍຄະແນນ 21-14 ແລະ 21-18.

ສ່ວນປະເພດຄູ່ ລີຢອງແດ ກັບ ຢູຢອນເຊືອງ ຄູ່ມື 1 ຂອງໂລກ ຈາກ ສ ເກົາຫຼີ ເອົາຊະນະ ຫຼິວເສີງ ກັບ ລູໄຄ ຈາກ ສປ ຈີນ 21-16 ແລະ 21-17, ປະເພດຄູ່ຍິງ ມາຈິນ ກັບ ຖັງຢວນຕິງ ຄູ່ມື 10 ຂອງໂລກ ຈາກຈີນ ເອົາຊະນະ ທຽນສິງ ກັບ ຖັງ ຈິນຮວາ ເພື່ອນຮ່ວມຊາດ 21-19, 16-21 ແລະ 22-20