ໜ່ວຍກູ້ໄພຂອງຈີນກຳລັງເລັ່ງຄົ້ນຫາຜູ້ສູນຫາຍ ເຫດເຮືອໂດຍສານນຳທ່ຽວຫລົ້ມໃນແມ່ນ້ຳແຢງຊີ ມື້ວັນຈັນທີ 1 ມິຖຸນາຜ່ານມາ ລ່າສຸດພົບຜູ້ລອດຊີວິດພຽງແຕ່ 14 ຄົນ ຈາກຜູ້ໂດຍສານ ແລະ ລູກເຮືອທັງໝົດ 456 ຄົນ.
ສຳນັກຂ່າວຕ່າງປະເທດ ລາຍງານໃນວັນທີ 3 ມິຖຸນານີ້ວ່າ ເຈົ້າໜ້າທີ່ກູ້ໄພຫລາຍພັນຄົນຂອງຈີນ ກຳລັງແຂ່ງກັບເວລາເພື່ອຄົ້ນຫາຜູ້ລອດຊີວິດ ໃນເຫດເຮືອໂດຍສານນຳທ່ຽວ Eastern Star ຫລົ້ມໃນແມ່ນ້ຳແຢງຊີ ແຂວງຫູເປີ່ຍ ຈາກສະພາບອາກາດທີ່ຮ້າຍແຮງ ໃນມື້ວັນທີ 1 ມິຖຸນາຜ່ານມາ ໂດຍລ່າສຸດ ເຈົ້າໜ້າທີ່ໄດ້ພົບຜູ້ເສຍຊີວິດແລ້ວ 7 ຄົນ ແລະ ຊ່ວຍຜູ້ລອດຊີວິດໄດ້ພຽງແຕ່ 14 ຄົນ ສ່ວນທີ່ເຫລືອອີກ 400 ກ່ວາຄົນ ເຊິ່ງສ່ວນຫລາຍເປັນຜູ້ໂດຍສານອາຍຸສູງ ແມ່ນຍັງຄົງສູນຫາຍ.
ເຈົ້າໜ້າທີ່ຕຳຫລວດ ໄດ້ຄວບຄຸມຕົວກັບຕັນເຮືອ ແລະ ວິສະວະກອນປະຈຳເຮືອທີ່ລອດຊີວິດ ລວມ 2 ຄົນ ໄວ້ເພື່ອສອບປາກຄຳ ໂດຍຜ່ານການໃຫ້ການຂອງກັບຕັນເຮືອໄດ້ລະບຸວ່າ ເຮືອລຳດັ່ງກ່າວປະເຊີນກັບພາຍຸຢ່າງຮຸນແຮງ ແລະ ຈົມລົງໃນເວລາບໍ່ພໍເທົ່າໃດນາທີຕໍ່ມາ.