ກຸ່ມຜູ້ປະທ້ວງຊາວຝຣັ່ງຈຳນວນນັບພັນຄົນ ຮວມຕົວກັນເດີນຂະບວນໃນນະຄອນຫລວງປາຣີ ຮຽກຮ້ອງໃຫ້ລັດຖະບານຝຣັ່ງ ຖອນໂຕອອກຈາກການເປັນສະມາຊິກນາໂຕ້.
ສຳນັກຂ່າວຕ່າງປະເທດ ລາຍງານໃນວັນທີ 1 ມິຖຸນານີ້ວ່າ ກຸ່ມຜູ້ປະທວ້ງໄດ້ພາກັນຍົກປ້າຍ ແລະ ເປັ່ງສຽງຮຽກຮ້ອງ ໃຫ້ລັດຖະບານຝຣັ່ງ ຖອນໂຕອອກຈາກການເປັນສະມາຊິກ ອົງການສົນທິສັນຍາປ້ອງກັນແອັດແລນຕິກເໜືອ ຫລື ນາໂຕ້ (NATO) ໂດຍລະບຸວ່າ ອົງການທາງການທະຫານດັ່ງກ່າວນີ້ ແມ່ນສ້າງພາລະທາງດ້ານງົບປະມານທີ່ເພີ່ມຂຶ້ນໂດຍບໍ່ຈຳເປັນ ໃຫ້ແກ່ປະເທດຝຣັ່ງ ແລະ ຍັງຕັດຮອນອຳນາດອະທິປະໄຕຂອງຝຣັ່ງອີກດ້ວຍ, ພ້ອມນັ້ນ ກຸ່ມຜູ້ປະທ້ວງຍັງໄດ້ລະບຸອີກວ່າ ກຸ່ມນາໂຕ້ ແມ່ນໄດ້ກາຍເປັນເຄື່ອງມືຂອງສະຫະລັດອາເມຣິກາ ໃນການຮຸກຮານ ແລະ ແຊກແຊງປະເທດຕ່າງໆ.
ກ່ອນໜ້ານີ້ ໃນປີ 1966 ອະດີດປະທານາທິບໍດີ ຊາກ ເດີ ໂກນ ໄດ້ຕັດສິນໃຈຖອນຝຣັ່ງອອກຈາກການເປັນສະມາຊິກນາໂຕ້ມາແລ້ວ ໂດຍລະບຸວ່າການເປັນສະມາຊິກນາໂຕ້ ເປັນການທຳລາຍອະທິປະໄຕຂອງປະເທດ, ແນວໃດກໍຕາມ ປະເທດຝຣັ່ງໄດ້ສະໝັກເຂົ້າເປັນສະມາຊິກນາໂຕ້ອີກເທື່ອໜຶ່ງ ໃນສະໄໝປະທານາທິບໍດີ ນິໂກລາດ ຊາໂກຊີ ເຊິ່ງຖືເປັນການກັບເຂົ້າມາຮ່ວມໃນນາໂຕ້ເປັນຄັ້ງທຳອິດ ໃນຮອບ 40 ປີ.
