ເວັບໄຊ Kapook.com ຂອງໄທ ໄດ້ລາຍງານໃນວັນທີ 31 ພຶດສະພາຜ່ານມານີ້ວ່າ ອົງການທ່ອງທ່ຽວແຫ່ງປະເທດໄທ ໄດ້ຮ່ວມມືກັບຫ້າງສັບພະສິນຄ້າຊັ້ນນຳທົ່ວປະເທດ ສ້າງຂະບວນການໃສ່ຊຸດໄທໄປຊັອບປິ້ງ ເປັນເວລາ 2 ເດືອນເຕັມ ນັບຕັ້ງແຕ່ວັນທີ 18 ມິຖຸນາ ໄປຈົນເຖິງວັນທີ 18 ສິງຫານີ້ ເພື່ອຮັບສ່ວນຫລຸດພິເສດ ພ້ອມກັບບັດຂອງຂັວນຕ່າງໆ.
ແຫລ່ງຂ່າວໄດ້ລະບຸວ່າ ໂຄງການດັ່ງກ່າວນີ້ແມ່ນກວມເອົາຫ້າງຊັບພະສິນຄ້າຊັ້ນນຳ ໃນຂອບເຂດທົ່ວປະເທດເຊັ່ນຫ້າງ ເດິມໍກຣຸບ ເຊັນທຣັນ ໂຣບິນສັນ ໄດ້ຈັດໃຫ້ມີການຫລຸດລາຄາ ແລະ ແຈກບັດຂອງຂັວນໃຫ້ແກ່ລູກຄ້າຄົນໄທ ແລະ ຊາວຕ່າງປະເທດ ທີ່ພາກັນແຕ່ງຊຸດໄທມາຈັບຈ່າຍໃຊ້ສອຍພາຍໃນຫ້າງ ໃນໄລຍະງານ “Amazing Thailand Grand Sale 2015” ທີ່ຈະຈັດຂຶ້ນໃນລະຫວ່າງວັນທີ 18 ມິຖຸນາ – 18 ສິງຫານີ້.
ທັງນີ້ ການຈັດໂຄງການດັ່ງກ່າວ ແມ່ນເພື່ອສ້າງສີສັນເອກະລັກຂອງປີທ່ອງທ່ຽວວິຖີໄທ ເຊິ່ງຕ້ອງການໃຫ້ນັກທ່ອງທ່ຽວຕ່າງປະເທດ ໄດ້ຮັບຮູ້ເຖິງການແຕ່ງກາຍຊຸດໄທບູຮານ ແລະ ທັງເປັນການຊຸກຍູ້ໃຫ້ປະເທດໄທ ກາຍເປັນສູນກາງການຄ້າ ແລະ ການທ່ອງທ່ຽວໃນອາຊຽນອີກດ້ວຍ.
