ກອງປະຊຸມຄະນະກໍາມະການຄຸ້ມຄອງຫລັກຊັບ (ຄຄຊ) ຄັ້ງທີ I ປະຈໍາປີ 2015 ໄດ້ໄຂຂື້ນ ໃນຕອນເຊົ້າວັນທີ 27 ພຶດສະພານີ້ ທີ່ຫ້ອງປະຊຸມໃຫ່ຍທະ ນາຄານແຫ່ງ ສປປ ລາວ ໃນນະຄອນ ຫລວງວຽງຈັນ ໂດຍການເປັນກຽດເຂົ້າ ຮ່ວມເປັນປະທານຂອງທ່ານ ດຣ. ບຸນປອນ ບຸດຕະນະວົງ ກຳມະການກົມການ ເມືອງສູນກາງພັກ, ຮອງນາຍົກລັດຖະມົນຕີ, ຜູ້ຊີ້ນຳວຽກງານເສດຖະກິດມະຫາ ພາກ ພ້ອມວິຊາການທີ່ກ່ຽວຂ້ອງເຂົ້າຮ່ວມເປັນຈຳນວນຫລາຍ.
ກອງປະຊຸມດັ່ງກ່າວໄດ້ຮັບຟັງການລາຍງານກ່ຽວກັບຜົນການຈັດຕັ້ງປະຕິບັດມະຕິກອງປະຊຸມ ຄຄຊ ຄັ້ງທີ III ປະຈໍາປີ 2014 ໂດຍຫຍໍ້ ແລະ ທົບທວນຄືນສັນຍາຮ່ວມທຶນກ່ຽວກັບການສ້າງຕັ້ງຕະຫຼາດຫຼັກຊັບລາວ (JVA), ການກໍານົດບັນຊີ ລາຍຊື່ເປົ້າໝາຍຈົດທະບຽນ, ຄວາມຄືບໜ້າໃນການກະກຽມເຂົ້າເປັນສະມາຊິກຂອງອົງການຄຸ້ມຄອງຫຼັກຊັບສາກົນ
(IOSCO), ການພັດທະນາຕະຫຼາດພັນທະບັດ ແລະ ຮັບຟັງລາຍງານການກະກຽມການອອກຈໍາໜ່າຍຮຸ້ນເພີ່ມຂອງບໍລິສັດ ຜະລິດໄຟຟ້າລາວມະຫາຊົນ ແລະ ໄດ້ຄົ້ນຄວ້າພິຈາລະນາຮັບຮອງເອົາລະບຽບຂອງ ຄຄຊ ຈໍານວນ 2 ສະບັບຄື: ລະບຽບວ່າດ້ວຍການຄຸ້ມຄອງຕະຫຼາດຫຼັກຊັບ (ສະບັບປັບປຸງ) ແລະ ລະບຽບວ່າດ້ວຍການອອກຈໍາໜ່າຍຮຸ້ນ (ສະບັບປັບປຸງ), ພ້ອມທັງຮັບຟັງລາຍງານການສະເໜີຂໍສ້າງຕັ້ງຫ້ອງການຜູ້ຕາງໜ້າບໍລິສັດຫຼັກຊັບປາຊີຟິກຢູ່ ສປປ ລາວ.
ທ່ານ ດຣ. ບຸນປອນ ບຸດຕະນະວົງ ຮອງນາຍົກລັດຖະມົນຕີ, ຜູ້ຊີ້ນຳວຽກງານເສດຖະກິດມະຫາພາກ ໄດ້ໃຫ້ທິດຊີ້ນຳວ່າ: ໃນປີ 2014 ຜ່ານມາ, ພວກເຮົາໄດ້ເອົາໃຈໃສ່ຈັດຕັ້ງປະຕິບັດການເຄື່ອນໄຫວວຽກງານຄຸ້ມຄອງຫຼັກຊັບຢ່າງຕັ້ງໜ້າ, ໃນນັ້ນ ອັນພົ້ນເດັ່ນແມ່ນໄດ້ສຳເລັດການຮັບຮອງແຜນຍຸດທະສາດການພັດທະນາຕະຫຼາດທຶນຂອງ ສປປ ລາວ ແຕ່ປີ 2016-2025 ຈາກລັດຖະບານ ເພື່ອເປັນແນວທາງໃນການພັດທະນາຕະຫຼາດທຶນໃນຕໍ່ໜ້າໃຫ້ມີການຂະຫຍາຍໂຕ ແລະ ຄຽງຄູ່ກັນນັ້ນ ເພື່ອສືບຕໍ່ຈັດຕັ້ງປະຕິບັດວຽກງານຄຸ້ມຄອງຫຼັກຊັບໃຫ້ມີຄວາມໜັກແໜ້ນເຂັ້ມແຂງກວ່າເກົ່າ, ໃນປີ 2015 ນີ້ ພວກເຮົາຕ້ອງໄດ້ເອົາໃຈໃສ່ພັດທະນາຕະຫຼາດທຶນລາວ ໂດຍສະເພາະການຈັດຕັ້ງປະຕິບັດແຜນການເຄື່ອນໄຫວວຽກງານປະຈໍາປີ 2015 ທີ່ກອງປະຊຸມ ຄຄຊ ຄັ້ງທີ III ປະຈໍາປີ 2014 ໄດ້ຮັບຮອງເອົາ ແລະ ກະກຽມຄວາມພ້ອມໃນການເຊື່ອມໂຍງຕະຫຼາດທຶນໃນພາກພື້ນ ແລະ ສາກົນ ເຊິ່ງເຫັນໄດ້ວ່າພວກເຮົາຈະຕ້ອງໄດ້ຜະເຊີນກັບຄວາມສ່ຽງ ແລະ ສິ່ງທ້າທາຍອີກຫຼາຍ ປະການ. ແຕ່ເຖິງຢ່າງໃດກໍຕາມ, ຂ້າພະເຈົ້າເຊື່ອໜັ້ນວ່າບັນດາທ່ານຈະສືບຕໍ່ເອົາໃຈໃສ່ສູ້ຊົນ, ສຸມເຫື່ອແຮງ ແລະ ສະຕິປັນຍາເຂົ້າໃນການພັດທະນາວຽກງານຫຼັກຊັບຂອງພວກເຮົາໃຫ້ມີປະສິດທິພາບ, ມີຄວາມເຊື່ອຖື ແລະ ມີມາດຕະຖານສາກົນ.
ແຫລ່ງຂ່າວ: ລາວພັດທະນາ