ທ່ານ ອີມາມ ນາຣາວີ ລັດຖະມົນຕີວ່າການກະຊວງເຍົາວະຊົນ ແລະ ກິລາ ອິນໂດເນເຊຍ ກ່າວວ່າ:
ອິນໂດເນເຊຍ ກຽມສົ່ງນັກກິລາເຂົ້າຮ່ວມແຂ່ງຂັນກິລາ ຊີເກມ ຄັ້ງທີ 28 ທີ່ປະເທດສິງກາໂປເປັນເຈົ້າພາບໃນລະຫວ່າງວັນທີ 5-16 ມິຖຸນາ 2015, ຈຳນວນ 500 ຄົນ, ໃນ 33 ປະເພດກິລາໂດຍຕັ້ງເປົ້າຢ່າງໜ້ອຍ 70 ຫຼຽນຄຳຫວັງຕິດໜຶ່ງໃນ 2 ຂອງຕາລາງສະຫຼຸບຫຼຽນລາງວັນ
“ຊີເກມ ຄັ້ງຜ່ານມາ ທີ່ມຽນມາ ເປັນເຈົ້າພາບ ເມື່ອປີ 2013 ອິນໂດໄດ້ອັນດັບ 4 ເຊິ່ງເປັນຜົນງານທີ່ໜ້າຜິດຫວັງຫຼາຍຊີເກມໃນປີນີ້ເຮົາຈຶ່ງຕັ້ງເປົ້າໝາຍໃໝ່ວ່າຕ້ອງເປັນອັນດັບ 2 ໃຫ້ໄດ້” ທ່ານ ອີມາມ ກ່າວ.
ນອກຈາກນັ້ນ ທ່ານ ອີມາມ ກ່າວຕື່ມອີກວ່າ ສິງກະໂປ ເຈົ້າພາບໄດ້ຕັດ ແລະ ຫຼຸດກາຈັດການແຂ່ງຂັນກິລາຫຼາຍປະເພດທີ່ເປັນຄວາມຫວັງຂອງອິນໂດເນເຊຍອອກໄປເຊັ່ນ: ໝາກລຸກ, ຄາຣາເຕ, ຍົກກນ້ຳໜັກ, ມວຍປ້ຳ ແລະ ບານສົ່ງຫາດຊາຍ ຈຶ່ງເຮັດໃຫ້ ອິນໂດເນຍເຊຍ ສົ່ງນັກກິລາເຂົ້າຮ່ວມບໍ່ໄດ້ຫຼາຍເທົ່າທີ່ຄວນ.
ໃນຂະນະທີ່ທ່ານ ຊູວາໂນ ປະທານຄະນະກຳມະການກຽມທີມຊາດອິນໂດເນເຊຍ (ພຣີມາ) ເປີດເຜີຍວ່າກ່ອນໜ້ານີ້ ພຣີມາ ກຽມສົ່ງນັກກິລາ 556 ຄົນໄປຮ່ວມແຂ່ງຂັນ ສິງກະໂປ ເກມ ແຕ່ຫຼັງຈາກພິຈາລະນາຖີ່ຖ້ວນຈຶ່ງຕັດໃຫ້ເຫຼືອພຽງ 500 ຄົນ ແລະ 56 ຄົນ ທີ່ຖືກຕັດອອກຈະເກັບຕົວເຝິກຊ້ອມຕໍ່ໄປເພື່ອກຽມທີມໄລຍະຍາວສຳລັບກິລາ ຊີເກມ ຄັ້ງທີ 29 ທີ່ປະເທດມາເລເຊຍ ແລະ ກິລາ ເອຊຽນ ເກມ ຄັ້ງທີ 18 ທີ່ອິນໂດເນເຊຍ ເປັນເຈົ້າພາບ ໃນປີ 2018.
