ນາງ ພອນນາລີ ໄຊຍະລາດ ນັກກິລາຢູໂດທີມຊາດລາວຮຸ່ນນ້ຳໜັກ -52 ກິໂລກຣາມເຈົ້າຂອງຫຼຽນຄຳຊີເກມ 3 ສະໄໝຕັ້ງເປົ້າຈະຂໍປ້ອງກັນແຊ໋ມຫຼຽນຄຳຊີເກມສະໄໝທີ 4 ໃຫ້ໄດ້ໃນການເຂົ້າຮ່ວມງານມະຫາກຳກິລາຊີເກມຄັ້ງທີ 28 ຫຼື “ສິງກາໂປເກມ” ທີ່ປະເທດສິງກາໂປເປັນເຈົ້າພາບລະຫວ່າງວັນທີ 5-16 ມິຖຸນານີ້.
ນາງພອນນາລີໄຊຍະລາດນັກກິລາຢູໂດທີມຊາດລາວເຈົ້າຂອງຫຼຽນຄຳຊີເກມ 3 ສະໄໝ (ວຽງຈັນເກມປີ 2009 ທີ່ສປປລາວ, ອິນໂດເນເຊຍເກມ 2011 ທີ່ປະເທດອິນໂດເນເຊຍແລະມຽນມາເກມ 2013 ທີ່ປະເທດມຽນມາ)ເຜີຍຕໍ່ສື່ມວນຊົນເມື່ອບໍ່ດົນມານີ້ວ່າ: ໃນການກຽມຄວາມພ້ອມເຂົ້າຮ່ວມງານມະຫາກຳກິລາຊີເກມຄັ້ງທີ 28 ທີ່ປະເທດສິງກາໂປເປັນເຈົ້າພາບໃນຕົ້ນເດືອນມິຖຸນານີ້ຕົນເອງແມ່ນໄດ້ເລີ່ມເຂົ້າສູນເກັບຕົວເຝິກຊ້ອມຢ່າງເປັນທາງການພ້ອມກັບໝູ່ເພື່ອນນັບຕັ້ງແຕ່ເດືອນມັງກອນເປັນຕົ້ນມາມາຮອດປັດຈຸບັນເຫັນວ່າມີຄວາມພ້ອມແລ້ວຮອບດ້ານບໍ່ວ່າຈະເປັນທາງພະລະກຳລັງ, ຮ່າງກາຍແລະຈິດໃຈ.
ເຈົ້າຂອງຫຼຽນຄຳຊີເກມ 3 ສະໄໝກ່າວອີກວ່າ: ສຳລັບການເຂົ້າຮ່ວມງານມະຫາກຳກິລາຊີເກມຄັ້ງນີ້ຕົນເອງກໍ່ຍັງບໍ່ທັນຮູ້ເທື່ອວ່າຄູ່ຕໍ່ສູ້ຈະແມ່ນຄົນເກົ່າຫຼືຄົນໃໝ່ແຕ່ກໍ່ເຊື່ອໝັ້ນໃນສັກກະຍະພາບ ແລະ ຄວາມພ້ອມທີ່ມີຢູ່ໃນຕົວຄິດວ່າຕົນເອງຈະສາມາດຜ່ານໄປໄດ້ທັງໝົດເພື່ອຄວ້າຫຼຽນຄຳຊີເກມສະໄໝທີ 4 ມາຄອງໄດ້ຕາມລະດັບຄາດໝາຍທີ່ຕັ້ງໄວ້.
ທັງນີ້, ຖ້າຫາກຕົນເອງສາມາດປ້ອງກັນແຊ໋ມຫຼຽນຄຳທີ່ປະເທດສິງກາໂປໄວ້ໄດ້ເປົ້າໝາຍຕໍ່ໄປແມ່ນຢາກເຂົ້າຮ່ວມງານມະຫາກຳກິລາໂອແລມປິກເພື່ອຫວັງສ້າງຜົນງານແລະກຽດຊື່ສຽງໃຫ້ກັບຕົນເອງແລະຄອບຄົວກໍ່ຄືປະເທດຊາດໃນເວລາພາກພື້ນແລະສາກົນ. ນາງພອນນາລີໄຊຍະລາດກ່າວ.
ຢ່າງໃດກໍ່ຕາມ, ສະເພາະສະຫະພັນກິລາຢູໂດແຫ່ງຊາດລາວແມ່ນຈະສົ່ງຄະນະນຳ, ຄູເຝິກ ແລະ ນັກກິລາ ຈຳນວນ 16 ຄົນ ເຂົ້າຮ່ວມຊີງໄຊໃນສິງກາໂປເກມ, ໃນນັ້ນເປັນນັກກິລາ 10 ຄົນ, ຍິງ 5 ຄົນພ້ອມຕັ້ງເປົ້າຈະສູ້ຊົນຍາດໃຫ້ໄດ້ຢ່າງຕ່ຳ 2 ຫຼຽນຄຳ, ເຊິ່ງຈະອອກເດີນທາງຢ່າງເປັນທາງໃນວັນທີ 2 ມິຖຸນາ 2015 ແລະຈະທຳການແຂ່ງຂັນໃນລະຫວ່າງວັນທີ 6-8 ມິຖຸນານີ້.
