ສະຫະພັນບານເຕະແຫ່ງຊາດລາວ ຫຼື ສຕລ ປະກາດລາຍຊື່ 20 ນັກເຕະທີມຊາດລາວ ຮຸ່ນອາຍຸບໍ່ເກີນ 23 ປີ ຫຼື ຢູ-23 ຢ່າງເປັນທາງການແລ້ວກ່ອນລົງປະເດີມສະໜາມນັດທຳອິດພົບກັບ ທີມຊາດໄທ ໃນວັນທີ 29 ພຶດສະພານີ້ໃນການແຂ່ງຂັນກິລາ ຊີເກມ ຄັ້ງທີ 28 ທີ່ປະເທດສິງກາໂປ “ສິງກາໂປເກມ” ເປັນເຈົ້າພາບ ລະຫວ່າງວັນທີ 5-16 ມິຖຸນານີ້.

ອີງຕາມຂໍ້ມູນຈາກເວັບໄຊ໊ສະຫະພັນບານເຕະແຫ່ງຊາດລາວລະບຸໄວ້ວ່າ :
ສຳລັບລາຍຊື່ທີມຊາດລາວ ຮຸ່ນອາຍຸບໍ່ເກີນ 23 ປີ ທີ່ກຽມເຂົ້າຮ່ວມການແຂ່ງຂັນເຕະບານຊາຍ ຊີເກມ ຄັ້ງທີ 28 ທີ່ປະເທດສິງກາໂປ ພາຍໃຕ້ການຄຸມທີມຂອງທ່ານ ເດວິດ ບູດ ຄູເຝິກຊາວອັງກິດ ຈາກສະໂມສອນ ລາວ ໂຕໂຢຕ້າ ເອັຟຊີ ແມ່ນໄດ້ຕົກລົງຄັດເລືອກເອົານັກເຕະ 20 ຄົນສຸດທ້າຍເປັນທີ່ຮຽບຮ້ອຍແລ້ວ ປະກອບມີ ຕຳແໜ່ງຜູ້ຮັກສາປະຕູ ວັດທະນາ ແກ້ວດວງເດດ ຈາກ ສະໂມສອນ ລາວ ໂຕໂຢຕ້າ ເອັຟຊີ ແລະ ສຸກທະວີ ສູນດາລາ ຈາກສະໂມສອນ ຮວ່າງແອັງ ອັດຕະປື, ຕຳແໜ່ງກອງຫຼັງ : ແທ່ນທອງ ພອນເສດຖາ ຈາກສະໂມສອນ ລາວ ໂຕໂຢຕ້າ ເອັຟຊີ, ບຸນທະວີ ສີປະສົງ, ແສງດາວ ອິນທິລາດ ແລະ ສອນວິໄລ ສີຫາວົງ ຈາກສະໂມສອນ ຮວ່າງແອັງ ອັດຕະປື, ທິນນະກອນ ວົງສາ ແລະ ສິນນະລອນ ສີຫາລາດ ຈາກສະໂມສອນ ປກສ, ຕຳແໜ່ງກອງກາງ ແລ່ມໂບ້ ໄຊຊະນະ, ວິລະຍຸດ ໄຊຍະບຸນຊູ, ຄອນສະຫວັນ ສີຫາວົງ ແລະ ພຸດທະໄຊ ໂຄຈະເລີນ ຈາກສະໂມສອນ ຮວ່າງແອັງ ອັດຕະປື, ໄມຕີ ສີຫາລາດ, ຂວັນຕາ ສີວົງທອງ ຈາກສະໂມສອນ ລາວ ໂຕໂຢຕ້າ ເອັຟຊີ, ແກ້ວວຽງເພັດ ລິດທິເດດ ຈາກສະໂມສອນ SHB ວຽງຈັນ ແລະ ຕີນີ່ ບຸນມາໄລ ສະໂມສອນ ປກສ, ຕຳແໜ່ງກອງໜ້າ : ສຸຈິນດາ ນັດຜາສຸກ ຈາກສະໂມສອນ ປກສ, ສິດທິເດດ ຂັນທະວົງ, ໄຊສົງຄາມ ຈຳປາທອງ ຈາກສະໂມສອນ ລາວ ໂຕໂຢຕ້າ ເອັຟຊີ ແລະ ສຸກອາພອນ ວົງຈຽງຄຳ ຈາກສະໂມສອນ ລ້ານຊ້າງ ຢູໄນເຕັດ.

ສຳລັບ ການແຂ່ງຂັນເຕະບານຊາຍໃນງານມະຫາກຳກິລາຊີເກມ ຄັ້ງທີ 28 ທີ່ປະເທດສິງກາໂປ ແມ່ນຈະທຳການແຂ່ງຂັນໃນລະຫວ່າງວັນທີ 29 ພຶດສະພາ ຫາ 13 ມິຖຸນາ 2015 ໂດຍທີມຊາດລາວ ຈັດຢູ່ໃນກຸ່ມ B ເຊິ່ງນັດທຳອິດທີມຊາດລາວ ຈະລົງປະເດີມສະໜາມພົບກັບ ທີມຊາດໄທ ໃນວັນທີ 29 ພຶດສະພາ 2015 ເວລາ 16:00 ໂມງ, ນັດທີ 2 ພົບກັບ ທີມຊາດບຣູໄນ ໃນວັນທີ 31 ພຶດສະພາ 2015 ເວລາ 20:30 ໂມງ, ນັດທີ 3 ພົບກັບ ທີມຊາດ ສສ ຫວຽດນາມ ໃນວັນທີ 4 ມິຖຸນາ 2015 ເວລາ 20:30 ໂມງ, ນັດທີ 4 ພົບກັບ ທີມຊາດຕີມິ ເລສເຕ ໃນວັນທີ 9 ມິຖຸນາ 2015 ເວລາ 20:30 ໂມງ ແລະ ນັດສຸດທ້າຍຂອງຮອບແບ່ງກຸ່ມ ພົບກັບ ທີມຊາດມາເລເຊຍ ໃນວັນທີ 11 ມິຖຸນາ 2015 ເວລາ 20:30 ໂມງ.